Alfreð Gíslason handboltakappi heiðraður.

Á hófi sem haldið var í Menningarhúsinu Hofi í gær var handboltakappanum Alfreð Gíslasyni veitt heiðursviðurkenning Íþróttaráðs Akureyrar og Afrekssjóðs Akureyrar, gullmerki HSÍ og við sama tækifæri var hann gerður að heiðursfélaga í KA. 

Alfreð fæddist á Akureyri árið 1959 og ólst þar upp. Hann á ríkan þátt í þeim mikla uppgangi sem  varð hjá KA og undir hans stjórn varð KA m.a. bikarmeistari í tvígang, Íslandsmeistari og deildarmeistari.

Frá árinu 1997 hefur Alfreð þjálfað í Þýskalandi þar sem hann gerði m.a. Magdeburg og Kiel að Þýskalands- og Evrópumeisturum. Auk þess sem honum hefur hlotnast fjöldi einstaklingsverðlauna sem bæði þjálfari og leikmaður. Alfreð þjálfar lið Kiel í dag og þykir einn sá  færasti í sínu fagi.

Afrekaskrá Alfreðs Gíslasonar er einstök.

Á handboltaferlinum lék Alfreð Gíslason á Íslandi, Spáni og í Þýskalandi. Hann á að baki 190 A-landsleiki og skoraði í þeim 542 mörk, tók þátt í mörgum stórmótum með landsliðinu, meðal annars Ólympíuleikunum í Los Angeles 1984 og Seúl 1988. Hann var valinn besti leikmaður B-keppni Heimsmeistaramótsins 1989, sem Íslendingar unnu.

Á ferlinum hefur hann  starfað sem þjálfari hjá félagsliðum á Íslandi og í Þýskalandi og unnið fjölmarga titla og hreinlega ótrúleg afrek sem seint eða aldrei verða leikin eftir. Þá þjálfaði Alfreð íslenska landsliðið um tveggja ára skeið.

Fram til 1980 var hann leikmaður KA – og stundaði reyndar einnig fótbolta alveg upp í annan flokk, spilaði sem miðvörður.
1980 fór hann suður og spilaði með KR til 1983.
Þaðan fór hann til Þýskalands og spilaði með Tusem Essen 1983-1988
1986: Þýskalandsmeistari með Tusem Essen
1987: Þýskalandsmeistari með Tusem Essen
1988: Bikarmeistari í Þýskalandi með Tusem Essen
1988-1989 hélt hann aftur í Vesturbæinn og spilaði með KR.
1989: Sigur í B-keppni Heimsmeistaramótsins með íslenska landsliðinu, einn af lykilmönnum liðsins.
1989: Íþróttamaður ársins á Íslandi, fyrstur Norðlendinga.
1989-1991 Bidasoa Irun á Spáni
1991: Bikarmeistari á Spáni með Bidasoa Irun
Alli spilaði tvo leiki með heimsúrvalinu.

Afrekalisti þjálfarans Alfreðs Gíslasonar er stórkostlegur.

1991-1997: Þjálfari KA
1995: Bikarmeistari með KA
1996: Bikarmeistari með KA
1997: Íslandsmeistari með KA
1997-1999: Þjálfari SG Hameln í Þýskalandi
1999-2006: Þjálfari SC Magdeburg í Þýskalandi
2001: Með SC Magdeburg varð hann Þýskalandsmeistari, meistari meistaranna í Þýskalandi (Super Cup), vann EHF-bikarinn og EHF Champions Trophy, þ.e. meistari meistaranna í Evrópu. Valinn þjálfari ársins í Þýskalandi.
2002: Vann Meistaradeild Evrópu og Champions Trophy með SC Magdeburg.
2006-2008: Landsliðsþjálfari Íslands
2006-2008: Þjálfari VfL Gummersbach í Þýskalandi
Frá 2008: Þjálfari THW Kiel í Þýskalandi
2008: Vann Super Cup í þýskalandi með THW Kiel.
2009: Með THW Kiel varð hann Þýskalandsmeistari, Bikarmeistari. Hann var valinn þjálfari ársins í Þýskalandi 2009 og valinn þjálfari Bundesligunnar tímabilið 2008-2009.
2010: Með THW Kiel varð hann Þýskalandsmeistari og vann Meistaradeild Evrópu.
2011: Með THW KIel vann hann Super Globe keppnina í Katar, keppni sterkustu félagsliða heims, varð Bikarmeistari, vann Super Cup og var valinn þjálfari ársins í Þýskalandi.
2012: Með THW Kiel varð hann Þýskalandsmeistari með fullu húsi stiga, Bikarmeistari og vann Super Cup í Þýskalandi, vann Meistaradeild Evrópu, var valinn þjálfari ársins í Þýskalandi 2012 og þjálfari Bundesligunnar tímabilið 2011-2012.
2013: Með THW Kiel varð hann Þýskalandsmeistari og Bikarmeistari.

Já hreint út sagt frábær afrekaskrá og eins og kynnir kvöldsins (Haraldur Ingólfsson) sagði ,, Afrekalisti þjálfarans Alfreðs Gíslasonar er einfaldlega stórkostlegur og hann á aðeins eftir að lengjast“.

Það var Tryggvi Þór Gunnarsson sem afhenti Alfreð viðurkenningu Afrekssjóð Akureyrar og Íþróttaráðs. Hrefna Gunnhildur Torfadóttir formaður KA afhenti honum viðurkenningarskjal sem heiðursfélaga KA. Einar Þorvarðarson framkvæmdastjóri HSÍ afhenti Alfreð gullmerki HSÍ.

Akureyri.net óskar Alfreð Gíslasyni innilega til hamingu með viðurkenningarnar sem hann er svo sannarlega vel að kominn.

Meðfylgjandi myndir tók Þórir Tryggvason: