Dagskrá 17. júní hátíðarhalda á Akureyri

Hátíðarhöld á Akureyri á þjóðhátíðardaginn 17. júní eru fjölbreytt að venju.

Klukkan 12.45 byrjar Lúðrasveitin á Akureyri undir stjórn Alberto Carmona að spila í Lystigarðinum en þar hefst hefðbundin dagskrá  klukkan 13 með fánahyllingu, hátíðarávarpi Eiríks Björns Björgvinssonar bæjarstjóra og hugvekju flutt af Pétri Björgvini Þorsteinssyni djákna við Glerárkirkju.   Karlakór Akureyrar – Geysir syngur undir stjórn Roars Kvam og grunnskólanemarnir Þóranna Lilja Steinke og Malik Stefán Turay flytja verðlaunaljóð sín úr ljóðasamkeppninni Akureyri – brosandi bær, sem haldin var í tilefni af 150 ára afmæli Akureyrar.   Dagskránni í Lystigarðinum lýkur klukkan 13. 30 en þá verður skrúðganga þar sem leiðin liggur úr Lystigarðinum og á Ráðhústorg.

Dagskráin á Ráðhústorgi er í umsjón Skátafélagsins Klakks og hefst hún klukkan 14-17 og svo aftur um kvöldið frá klukkan 21-01.   Dagskráin er fjölbreytt að vanda.  Bæjarbúar og gestir geta reynt sig við ýmsar þrautir í hinu  sívinsæla skátatívolíi. Kynnar í ár eru Gunnar Helgason og Felix Bergsson og meðal þeirra sem fram koma eru Marimbasveit Oddeyrarskóla, Dansfélagið Vefarinn, sönghópurinn Chorus, Lúðrasveitin á  Akureyri, Leikhópurinn Lotta, Lilli Klifurmús, söngvarar frá Söngskóla Maríu Bjarkar,  Jónsi, Ingó Hansen, atriði úr leikritinu Date, Svenni Þór og  Regína Ósk.  Að vanda marsera nýstúdentar úr Menntaskólanum á Akureyri á Ráðhústorg um miðnætti.

Auk dagskrárinnar á Ráðhústorgi verður árleg bílasýning Bílaklúbbs Akureyrar í Boganum kl 10-20,  sögusigling með eikarbátnum Húna II kl. 17 þar sem fræðst verður um gömlu húsin við Strandgötuna og Oddeyrina og Leikhópurinn Lotta sýnir barnaleikritið Stígvélaði kötturinn í Lystigarðinum kl. 11 og kl. 17.

Deila á samskiptamiðlum