58 biskupsatkvæði á Eyjafjarðar- og Þingeyjarsýslusvæðinu

Dr. Sigurður Árni Þórðarson

Pétur Björgvin Þorsteinsson djákni í Glerárkirkju skrifar um biskupskjör

Framundan eru biskupskosningar. Tæplega 500 manns af landinu öllu munu ganga að kjörborðinu, eða réttara sagt koma kjörseðli sínum í póst. Þar á meðal eru 58 einstaklingar sem búsettir eru í Eyjafjarðar- og Þingeyjarsýslum, 34 karlar og 24 konur. Rúm 11% atkvæðanna eru semsagt hér í prófastsdæminu, en 10,5% þeirra einstaklinga 16 ára og eldri á landinu sem skráðir eru í Þjóðkirkjuna búa á þessu svæði. Við ættum því að geta vel við þetta atkvæðamagn unað, þó vissulega heyrist margar raddir um að allt Þjóðkirkjufólk eigi að fá að kjósa.

Þegar hafa þó nokkrir einstaklingar tilkynnt að þeir gefi kost á sér til biskups, en rúmar tvær vikur eru enn eftir þar til framboðsfrestur rennur út og aldrei að vita hvað gerist á þeim tíma. Vel má vera að einhver hætti við, eða að nýir frambjóðendur bætist í hópinn. Spennan verður svo í hámarki fyrstu tvær vikurnar í mars, þ.e. frá því að ljóst er hve stór hópur frambjóðanda er þar til gengið er til kosninga um miðjan mars.

Við biskupsefnunum blasir nú nýr veruleiki. Aldrei áður hafa jafn margir haft kosningarétt við biskupskjör. Auk þess voru það hingað til einungis prestar sem fengu að kjósa. Einstaklingur sem bauð sig fram þurfti því fyrst og fremst að koma sér á framfæri meðal presta landsins og tryggja sér meirihluta atkvæða, eða í það minnsta nægilegt atkvæðamagn til þess að komast í gegnum fyrri umferðina, í þeirri von að verða svo hlutskarpari í þeirri seinni.

Formenn sóknarnefnda á svæðinu eru í lykilhlutverki í þessum kosningum hér á svæðinu. Þeir eru 36 talsins. Þetta eru konur og karlar sem hafa valið að axla það ábyrgðarhlutverk að sjá um rekstur í sinni sókn, dugnaðarfólk sem leggur ómælda sjálfboðavinnu í að halda kirkjum og safnaðarheimilum við og sjá um fjármál sóknarnefndar og ýmsa þá umsýslu sem fylgir félagsstarfinu í söfnuðinum.  Það var löngu orðið tímabært að mikilvægt starf þeirra fengi þá virðingu sem því ber með því að atkvæðisréttur í biskupskjöri næði einnig til þeirra. Vonandi verður næsta skref að allt sóknarnefndarfólk fái að kjósa.

Þetta nýja landslag þýðir gerbreytt vinnulag í kynningarstarfi í aðdraganda kosninga. Því er fagnaðarefni að biskupsefnin skuli sjá sér fært að heimsækja okkur hér fyrir norðan og taka upp samtalið við fólkið í kirkjunni.

Dr. Sigurður Árni Þórðarson hefur ferðast um landið síðustu vikurnar til þess að hlusta á fólkið, bæði prestana sem sinna mikilvægri þjónustu um landið allt og safnaðarmeðlimina. Undirtektirnar hafa verið mjög góðar og öllum ljóst að framboð Sigurðar er mjög líklegt til árangurs. Þá er ánægjuefni hve margir taka undir þau orð Sigurðar að tími biskupskjörsins sé tími kirkjunnar, samtalið við biskupsefnið sé ekki síður samtal um framtíð kirkjunnar. Sjálfur segir hann í fundarboði á sigurdurarni.is:

Hverjir koma á svona fundi? Það er fólk, sem vill ræða um biskupskjör, stöðu kirkjunnar og framtíð. Fundarboðendur eru vissulega stuðningsfólk mitt og ég mun ræða um stefnu og áherslur mínar. En auk þess er tilgangur fundarins samtal um kirkjuna. Því eru allir velkomnir til fundar hvaða stefnu eða afstöðu sem menn hafa í biskupskjöri. Að sækja svona fund er ekki yfirlýsing um stuðning við biskupsefni heldur yfirlýsing um stuðning við kirkjuna.

Laugardaginn 18. febrúar býður Sigurður til fundar í Kirkjumiðstöðinni við Vestmannsvatn í Aðaldal kl. 13:00. Á sunnudeginum 19. febrúar er svo fundur í safnaðarheimili Akureyrarkirkju kl. 13:00. Það eru allir velkomnir á fundina með Sigurði Árna. Þeim sem ekki eiga heimangengt er bent á að fjöldi stuðningsmanna hafa ritað pistla á sigurdurarni.is, en þar er einnig að finna allt um framboð prestsins geðþekka úr Neskirkju sem á ættir að rekja í Svarfaðardalinn og þjónaði hér eitt sinn í Staðarfellsprestakalli í Suður-Þingeyjarsýslu.