Aflið fær ágóðann

Lay Low ánafnar ágóða sínum af sölu nýs geisladisks með tónlistinni úr Ökutímum til Aflsins á Akureyri, samtaka gegn heimilis- og kynferðisofbeldi. Leikfélag Akureyrar ánafnar einnig ágóða af síðustu sýningu ársins til sömu samtaka. Leiksýningin Ökutímar hefur vakið aðdáun gagnrýnenda og áhorfenda en einnig vakið sterk viðbrögð enda umfjöllunarefnið viðkvæmt. Ökutímar lýsir ævi konu sem varð fyrir kynferðislegri misnotkun á unga aldri en Lay Low flytur alla tónlistina í sýningunni. N.k. sunnudag 9. desember er efnt til umræðna að lokinni sýningu í tilefni 16 daga átaks gegn kynbundnu ofbeldi.

Á vormánuðum hafði Leikfélag Akureyrar samband við tónlistarkonuna Lovísu Elísabetu Sigrúnardóttur betur þekkt sem Lay Low.  Hugmyndin var að fá Lovísu til að semja tónlist við leikritið Ökutíma og jafnframt taka þátt í sýningunni.  Eftir að hafa kynnt sér verkið og hrifist af því ákvað Lovísa að taka verkefnið að sér.  Verkið var frumsýnt hjá Leikfélagi Akureyrar 2. nóvember og vakti strax mikla athygli og sterk viðbröð. Uppselt hefur verið á allar sýningar til þessa.  Tónlist Lovísu við verkið og jafnframt frumraun hennar á leiksviðinu hafa fangað athygli leikhúsgesta sem og gagnrýnenda.  Lagið „Saman“ úr Ökutímum hefur mikið verið leikið í útvarpinu.  Sýningartímabil Ökutíma hefur verið framlengt vegna mikils áhuga og eru sýningar nú fyrirhugaðar út febrúar 2008.

Í tilefni 16 daga átaks Sameinuðu þjóðanna gegn kynbundnu ofbeldi hafa Leikfélag Akureyrar og Jafnréttisstofa tekið höndum saman um að vekja athygli á þeirri tegund kynbundins ofbeldis sem er hvað erfiðust viðureignar og mest dulin í samfélagi okkar: misnotkun á börnum. Leikritið Ökutímar lýsir á nærfarin en afhjúpandi hátt ævi konu sem varð fyrir misnotkun á unga aldri.  Leikarar Leikfélags Akureyrar hafa fengið einróma lof fyrir frammistöðu sína í verkinu.  Efnt hefur verið til sérstakrar aukasýningar á Ökutímum sunnudaginn 9. desember kl. 20:00 og umræðna í kjölfarið í Rýminu þarsem meðal þáttakenda verða;  Kristín Ástgeirsdóttir, framkvæmdastýra Jafnréttisstofu, Sigrún Sigurðardóttir, hjúkrunarfræðingur, María Reyndal, leikstjóri og leikhópur Ökutíma.

Í tilefni þessa vill Lovísa nú tilkynna um útgáfu á tónlistinni úr Ökutímum á geisladisk og kemur hann í verslanir mánudaginn 21. janúar n.k.  Geisladiskurinn inniheldur fimm frumsamin lög Lovísu við verkið ásamt átta tökulögum úr smiðju Dolly Parton sem jafnframt eru flutt í sýningunni.

Lovísa vill nota tækifærið og leggja meira af mörkum til baráttunnar og umræðunnar gegn kynbundnu ofbeldi og hefur nú ákveðið að allur ágóðahlutur hennar af sölu geisladiskins muni renna til Aflsins á Akureyri sem eru samtök gegn heimilis – og kynferðisofbeldi.  Einnig ánafnar Leikfélag Akureyrar ágóðahlut sínum af síðustu sýningu ársins á Ökutímum 30. desember til Aflsins.

Aflið var stofnað á Akureyri árið 2002 í framhaldi af tilraunastarfsemi Stígamóta þar sem í ljós kom mikil þörf fyrir samtök af þessu tagi.  Starfsemin byggir á forsendum þolenda kynferðislegs ofbeldis og/eða heimilisofbeldis. Þolendur geta sótt stuðning og fræðslu hjá samtökunum. Aflið er fyrir alla sem hafa orðið fyrir kynferðisofbeldi og/eða heimilisofbeldi og aðstandendur þeirra s.s. maka, foreldra, systkini og vini sem óska eftir ráðgjöf og er öll þjónusta þeim að kostnaðarlausu.

Lovísa mun formlega tilkynna fulltrúum Aflsins þessa ákvörðun sína í tengslum við umræðurnar á sunnudagskvöld.  Í leiðinni hvetur Lovísa og Leikfélag Akureyrar fyrirtæki og einstaklinga til að kynna sér starf Aflsins og helst af öllu láta fé af hendi rakna til góðrar og þarfrar starfsemi þess.