Fjöldi fólks tók þátt í hópdansi frá Ráðhústorgi niður á Torfunefsbryggju í gær.

Hátíðin Ein með öllu, sem nú er haldin á Akureyri hefur gengið miklu meira en vel, að sögn Margrétar Blöndal, skipuleggjanda hátíðarinnar. “Það hefur gengið alveg dásamlega, fullt á alla viðburði og bara eins og mann dreymir um að hátíðin sé sem skipuleggjandi.” sagði Margrét í samtali við blaðamann í gær. Hátíðinni lýkur í kvöld með sparitónleikum á Akureyrarvelli, þar sem fram koma meðal annars Páll Óskar, Sigga Beinteins, Mannakorn og Bravó bítlarnir.

Erfitt er að segja til um fjölda fólks í bænum þar sem ekki er selt inn á svæðið eða á viðburði, en ef marka má fjöldann á Ráðhústorgi í gær er mikill mannfjöldi í bænum vegna hátíðahaldanna. ABBA þema hátíðarinnar hefur eflaust ekki farið fram hjá neinum, en lög og andi ABBA voru allsráðandi í miðbænum í gær. Hápunkturinn var eflaust hópdans bæjarbúa á Torfunefsbryggju, líkt og í kvikmyndinni Mamma Mia!. Þar dönsuðu mörg hundruð manns eins og þeir hefðu aldrei gert annað, eftir stutta danskennslu á Ráðhústorgi. Í myndbrotinu hér fyrir neðan má sjá árangurinn:

Slökkvilið að störfum við Aðalstræti 13 í dag. Mynd/Þórhallur Jónsson.

Slökkvilið Akureyrar var kallað út nú fyrir stundu vegna reyks í húsi að Aðalstræti 13. Kallaður var út auka mannskapur enda er húsið gamalt timburhús og þröngt á milli húsa. Eldurinn virðist hafa komið upp í eldhúsi. Enginn var í íbúðinni þegar eldurinn kom upp, en ungt par í íbúðinni við hliðina komst slysalaust út ásamt ungu barni sínu.

Búið er að slökkva eldinn í húsinu sem var ekki mikill, en þónokkur hiti var í húsinu. Verið er að leita að glóð á milli þilja, en húsið er sennilega talsvert skemmt.

Nágrannar fylgdust með slökkvistörfum.

Körfubíll á vettvangi.

Slökkvilið að störfum í Aðalstræti.

Hermann Jón og sr. Jóna Lísa ásamt friðarhlaupurunum utan við Akureyrarkirkju í gær. Mynd/IngimarB

Það var falleg stund í sólinni utan við Akureyrarkirkju í gær þegar 25 hlauparar allsstaðar að úr heiminum hittu Hermann Jón Tómasson bæjarstjóra og sr. Jónu Lísu Þorsteinsdóttur og báru þeim og Akureyringum öllum boðskap um frið og einingu. Hlaupararnir taka þátt í svokölluðu friðarhlaupi, eða World Harmony Run, sem hlaupið er um allann heim. Þau eru nú hálfnuð í kyndilboðhlaupi sínu umhverfis landið, og kveðja Akureyri klukkan níu, miðvikudaginn 8. júlí. Þá koma þau saman á Akureyrarvelli ásamt leikskólabörnum bæjarins til að sameinast í hinum fallega boðskap hlaupsins.

Friðarhlaupið veitti Hermanni Jóni og Sigrúnu Björk Jakobsdóttur, forseta bæjarstjórnar, medalíu hlaupsins,“Kyndilberi friðar”, en fyrsti viðtakandi þessara verðlauna var nífaldur Ólympíugullverðlaunahafi og talsmaður Friðarhlaupsins, Carl Lewis.  Friðarhlaupið vill leggja áherslu á að medalíurnar sem það veitir Hermanni og Sigrúnu tilheyra jafnframt öllum bæjarbúum Akureyrar, en þar hefur Friðarhlaupið jafnan átt góðan stuðning og hvatningu vísa í gegnum 22 ára sögu sína sem hófst árið 1987.

Það var menntamálaráðherra, Katrín Jakobsdóttir, sem setti Friðarhlaupið, miðvikudaginn 1. júlí síðastliðinn. Við það lagði Friðarhlaupið upp í ferð sína um Ísland og mun heimsækja 46 bæi á leiðinni. Hlaupinu lýkur fimmtudaginn 16. júlí við Tjörnina í Reykjavík.

Friðarhlaupið samanstendur af 25 sjálfboðaliðum frá 15 þjóðlöndum sem gefa tíma sinn og vinnu til að kyndillinn geti ferðast um Ísland. Friðarhlaupið safnar ekki fé og leitar ekki eftir stuðningi við pólitískan málstað. Markmið hlaupsins er einfaldlega að auka meðvitund um að friður, vinátta og skilningur hefst í hjarta hvers og eins.

Nokkur hópur íslendinga átti miða á fyrirhugaða tónleika Jacksons í London. Mynd/AP

Flesta daga fjallar Akureyri.net um atburði líðandi stundar á Akureyri. Suma daga teygjum við okkur yfir í Þingeyjarsýslur og alla leið út á Siglufjörð þegar stórtíðindi gerast. Í kvöld verður hins vegar haldið talsvert lengra en flesta aðra daga – alla leið til Los Angeles í Bandaríkjunum þar sem konungur poppsins - Michael Jackson lést í kvöld - fimmtugur að aldri.

Skrifstofa réttarlæknis í Los Angeles staðfesti andlátsfregnina undir miðnætti að íslenskum tíma, en sögusagnir um andlát söngvarans höfðu verið á sveimi í allt kvöld. Jackson hafði skipulagt röð tónleika í Lundúnum á næstu vikum og átti fjöldi íslendinga miða á tónleika hans þar.

Atli Már hefur slegið í gegn með Jackson dansinum sínum. Mynd/ÖHÖ

Hinn 10 ára gamli Jackson aðdáandi, Atli Már Bjarnason frá Akureyri, er meðal þeirra sem hugðust berja goðið augum í Lundúnum. Atli hefur getið sér gott orð á skemmtunum hér í bænum í vetur með dansatriði við lög Jacksons. Móðir Atla segir þau vera döpur yfir fréttunum, enda hafi verið mikil tilhlökkun að sjá kappann og fyrirmyndina á sviði. Þau mæðgin eru nú stödd í Reykjavík, en Atli mun sýna Jackson atriðið sitt í brúðkaupi þar í bæ á morgun.

Til að heiðra minningu poppkongsins látum við hér fylgja með upptöku af dansatriði Atla eins og það kom fyrir augu gesta á keppninnu um Ungfrú Norðurland fyrr í vor.

Lögreglan hélt úti stífu fíkniefnaeftirliti s.l. viku.

Síðastliðna viku hefur lögreglan á Akureyri verið með stíft fíkniefnaeftirit m.a. í tengslum við svokallaða Bíladaga. Að eftirlitinu hafa starfað fíkniefnalögreglumenn á Akureyri með fíkniefnahund embættisins, sérsveitarmenn á Akureyri auk vakthafandi lögreglumanna. Um helgina starfaði einnig með hópnum lögreglumaður með fíkniefnaleitarhund frá Blönduósi og er það hluti af samstarfi lögregluliðanna á norðurlandi í baráttunni við fíkniefni.

Alls komu sex fíkniefnmál upp á Akureyri um helgina þar sem lagt var hald á rúm 40 grömm af amfetamíni, um 5 grömm af kókaíni og rúm 15 grömm af kannabisefnum. Þá hafa ellefu ökumenn verið teknir vegna aksturs undir áhrifum fíkniefna síðustu vikuna.

Virkt fíkniefnaeftirlit var á þjóðveginum við Akureyri þar sem kannað var með gesti á leið í bæinn og einnig voru bifreiðar stöðvaðar innanbæjar. Lögreglumenn óskuðu eftir því að fá að leita sumar af þeim bifreiðum sem stöðvaðar voru með fíkniefnaleitarhundi og var það í flestum tilfellum auðsótt mál af hálfu ökumanna sem í meirihluta tilfella höfðu ekkert að fela. Einnig var eftirlit með fíkniefnaleitarhundi á tjaldsvæðum og í miðbæ Akureyrar.

Aðfaranótt laugardagsins voru lögreglumenn við eftirlit á tjaldsvæðinu við Þórunnarstræti. Þegar fíkniefnaleitarhundur sýndi tjaldi á svæðinu mikinn áhuga og bönkuðu lögreglumenn þar upp á og komu að einum tjaldgestanna við kannabisreykingar. Við leit í tjaldinu framvísaði gesturinn smáræði af kannabisefnum til viðbótar.

Að kvöldi laugardags stöðvuðu sérsveitarmenn tvo menn á fertugsaldri á bifreið á Akureyri. Ökumaðurinn heimilaði að fíkniefnaleitarhundur fengi að hlaupa hring í bifreiðinni og um leið og hundurinn fór inn í hana vísaði hann lögreglumönnum á pakkningu sem reyndist innihalda um 7 grömm af amfetamíni og 5 grömm af kókaíni. Mennirnir voru því báðir handteknir og fluttir á lögreglustöð þar sem ökumaðurinn féll á fíkniefnaprófi og er því grunaður um akstur undir áhrifum fíkniefna. Í framhaldinu voru framkvæmdar leitir samtímis á dvalarstöðum mannanna. Á dvalarstað ökumannsins vísaði fíkniefnahundur á poka sem reyndist innihalda rúm 30 grömm af amfetamíni til viðbótar og einnig fundust á staðnum hlutir til að vigta niður og pakka fíkniefnum. Við skýrslutökur viðurkenndi ökumaðurinn eign sína á fíkniefnunum og að hafa ætlað hluta þeirra til sölu.

Á sunnudagskvöld var framkvæmd húsleit í íbúð á Akureyri þar sem fundust um 10 grömm af hassi. Drengur um tvítugt var handtekinn vegna málsins og við skýrslutökur viðurkenndi hann að hafa ætlað efnin til sölu. Öll málin teljast upplýst.

Lögreglan minnir á upplýsingasímsvarann 800-5005 og netfangið info@rls.is þar sem fólk getur komið upplýsingum um fíkniefnamisferli nafnlaust á framfæri.

Kristín Lea og Siggi í loftinu fyrr í dag. Mynd/Örlygur Hnefill.

Kristín Lea Sigríðardóttir, fegurðardrottning Norðurlands og nýr liðsmaður Akureyri.net kíkti í útsendingu til Sigga Gunnars á Voice í tilefni afmælis stöðvarinnar, og talaði við þennan lífsglaða útvarpsprins Akureyrar. Hann hefur þrátt fyrir ungan aldur unnið í útvarpi í átta ár, en gleymir enn að slökkva á símanum í útsendingu! Hér fyrir neðan fylgir upptaka af viðtali Kristínar Leu við Sigga, og örfáar myndir frá afmælisveislu Voice, en Helgi Steinar ljósmyndari vefsins leit við og fékk sér köku í gær.

Hermann Jón tók við lyklunum að ráðhúsinu síðdegis í dag. Mynd/Örlygur Hnefill

Hermann Jón Tómasson, bæjarfulltrúi Samfylkingar, tók við starfi bæjarstjóra á fundi bæjarstjórnar nú fyrir stundu. Er það samkvæmt samstarfssamningi Samfylkingar og Sjálfstæðisflokks, en þar kom fram að bæjarstjóri skyldi fyrstu 3 árin koma úr röðum sjálfstæðismanna, en síðasta árið frá Samfylkingunni. Hermann er þriðji bæjarstjóri Akureyrar á kjörtímabilinu, en Sigrún Björk Jakobsdóttir, forveri Hermanns, tók við starfinu þegar Kristján Þór Júlíusson var kosinn á þing árið 2007. Kristján Þór hætti á fundinum sem forseti bæjarstjórnar og var Sigrún Björk kosin í það embætti.

Hermann fæddist árið 1959 og ólst upp á Dalvík. Hann stundaði nám í Dalvíkurskóla, Menntaskólanum á Akureyri, Háskóla Íslands og í Texas Tech University. Hann hefur einnig stundað nám í stjórnun við kennaradeild Háskólans á Akureyri. Hann hefur lengst af unnið við kennslu, ráðgjöf og stjórnun í framhaldsskólum, fyrst við Fjölbrautaskóla Vesturlands, síðan í MA og frá 1989 í VMA. Hermann var varabæjarfulltrúi Samfylkingarinnar 2002-2006. Síðan 2006 hefur Hermann Jón gegnt embætti formanns bæjarráðs.

Hermann er kvæntur Báru Björnsdóttur leikskólakennara og eiga þau þrjú börn, Tómas, fæddur 1981, Harpa, fædd 1988 og Bjarki, fæddur 1996.

Enginn aukakostnaður verður vegna skiptanna. Bæði Hermann Jón og Sigrún Björk, fráfarandi bæjarstjóri hafa lýst því yfir að þau muni ekki þiggja biðlaun í lok starfstíma síns sem bæjarstjórar.

Slökkvilið Grýtubakkahrepps á vettvangi á Kljáströnd fyrr í morgun. Mynd/Örlygur Hnefill

Eldri kona lést í eldsvoða í sumarhúsi á Kljáströnd, skammt frá Grenivík í morgun. Kallað var eftir aðstoð slökkviliðs um klukkan 9 í morgun og komu bílar bæði frá Grenivík og Akureyri á vettvang, en mikill eldur var í húsinu þegar að var komið. Eiginmaður konunnar var einnig í húsinu og var hann fluttur til aðhlynningar á Fjórðungssjúkrahúsið á Akureyri.

Greiðlega gekk að ráða niðurlögum eldsins. Eldsupptök eru ókunn en lögreglan á Akureyri vinnur að rannsókn málsins. Ekki er unnt að greina frá nafni hinnar látnu að svo stöddu.

Slökkviliðsmenn hafa stöðvað lekann um borð í Frosta. Mynd/Örlygur Hnefill

Slökkviliðsmönnum í eiturefnabúningum hefur tekist að stöðva lekann um borð í Frosta, sem liggur við bryggju á Grenivík, en tilkynnt var um ammóníakleka um borð á sjöunda tímanum í kvöld. Lekinn var nokkuð alvarlegur, en að sögn lögreglu á vettvangi var bæjarbúum aldrei hætta búin. Þá var maður sem var um borð er lekans varð vart heill á húfi.

Björgunarsveit og lögregla fóru á milli húsa í bænum og athuguðu líðan fólks, en enginn kenndi sér meins eða óþæginda. Einhverjir hestar voru færðir til, og íbúum var bent á að kynda hús sín til að mynda yfirþrýsting. Nú er unnið að því að fella ammoníakið með vatnsúða. Um það bil eitt og hálft tonn af ammoníaki var í kerfi skipsins, og er efnið mjög eitrað, svo að verr hefði getað farið. Að sögn lögreglu á vettvangi hefði þó alltaf mátt sigla skipinu í burtu, hefði bæjarbúum verið hætta búin.

Slökkvilið frá Akureyri að störfum á Grenivík.

Frá vettvangi á Grenivík.

Lögreglan fylgist með gangi mála.

Lekinn varð um borð í frystitogaranum Frosta sem lá við bryggju á Grenivík.

Eiríkur rauði og Þórhallur veiðimaður gantast við Guðfinn prest í sýningunni Vínlandi.

Þeir sem misstu af rokksöngleiknum Vínlandi í Freyvangsleikhúsinu í vor fá nú tækifæri til að bæta úr því. Eins geta mikir aðdáendur verksins fagnað og farið aftur, því ákveðið hefur verið að taka Vínland til sýninga á nýjan leik. Aðeins verða tvær sýningar hér norðan heiða en svo heldur leikhópurinn suður yfir heiðar þar sem verkið verður sett upp í Þjóðleikhúsinu. Vínland var eins og lesendur Akureyri.net vita, valið áhugaverðasta áhugaleikverkið á þessu leikári. Sýningarnar í Freyvangi verða fimmtudaginn 4. júní og föstudaginn 5. júní en sýningin í Þjóðleikhúsinu verður svo 12. júní næstkomandi.

Ökuþórinn Einar Þór í drulluspyrnu um árið

Einar Þór Gunnlaugsson sigraði Greifatorfæruna sem fór fram á akstursíþróttasvæði Bílaklúbbs Akureyrar í dag. Einar var jafnframt stigahæsti maður dagsins og hlýtur því titilinn Greifinn 2009. Leo Viðar Björnsson hafnaði í öðru sæti en Hafsteinn Þorvaldsson var í þriðja, en hnn velti bíl sínum hressilega eins og sjá má í meðfylgjandi myndbandi. Björgvin Ólafsson hjá Bílaklúbbi Akureyrar segir keppnirnar hafa gengið vel. “Þetta hefur gengið framar vonum og aðsóknin var frábær. Það var mikið um veltur og þessvegna drógst dagskráin en þetta var samt rosalega gaman,” sagði Björgvin í samtali við Akureyri.net síðdegis.

Í flokki götubíla var Steingrímur Bjarnason í fyrsta sæti, Haukur Þorvaldsson í öðru og Hlynur B. Sigurðsson í þriðja.

Þessi mynd var tekin rétt eftir að torgið var þökulagt síðasta sumar. Myndin er tekin af síðu hópsins.

Ört vaxandi fjöldi notenda á Facebook samskiptavefnum hefur nú gengið til liðs við hóp á síðunni sem skorar á bæjaryfirvöld, eða bara hvern sem er, að þökuleggja Ráðhústorgið á ný í sumar. Hópurinn telur þegar þetta er skrifað rúmlega 3100 manns, eða tæplega nítján prósent bæjarbúa.

Hermann Jón Tómasson, formaður bæjarráðs, segir bæjaryfirvöld hafa tekið vel í þökulagninguna í fyrra og þau séu að skoða málið með jákvæðu hugarfari. Þá vill Sigurður Guðmundsson, verslunareigandi sem bar ábyrgð á verkinu síðasta sumar, sjá bæjarbúa taka höndum saman og grænka torgið í sameiginlegu átaki.

Sigrún Björk Jakobsdóttir bæjarstýra er sammála þessu, en hún skrifar á “vegg” hópsins í gærkvöld: ” Það er best að gera þetta í lok júní/ byrjun júlí og gaman væri ef að við íbúarnir tækjum okkur saman einn laugardag og sæjum um framkvæmdina. Bærinn kæmi með þökur og sumarblóm en við gerðum þetta sjálf.” Það er því von á grænu torgi í sumar, í krafti samvinnu bæjarbúa.

Sjá síðu hópsins: http://www.facebook.com/group.php?gid=102469246296

Rúmlega 400 nemendur komu fram á sviði Samkomuhússins um helgina. Mynd/Örlygur Hnefill

Nokkuð líklegt má telja að fjöldamet hafi verið slegin í Samkomuhúsinu á Akureyri um helgina þegar vorsýningar Point dans stúdíós fóru fram. Alls komu rúmlega 400 nemendur fram á sviði gamla leikhússins og þá voru þéttskipaðir bekkir á öllum sex sýningum helgarinnar og raunar var aðsóknin það mikil að margir máttu standa.

Sýningin var öll hin glæsilegasta og góður vitnisburður þess starfs sem unnið hefur verið í dansskólanum í vetur. Sigyn Blöndal, stofnandi skólans segir undirbúning sýningarinnar hafa staðið frá því í desember á síðasta ári en nemendurnir lögðu undir sig leikhúsið um síðustu helgi og voru stífar æfingar alla vikuna. Myndir frá fyrri sýningardeginum eru komnar á Akureyri.net og eru myndir frá seinni sýningardeginum væntanlegar hingað í kvöld.

.
Myndir frá fyrri sýningardegi:

Myndir frá seinni sýningardegi:

Ráðherrar funda með blaðamönnum í Sólborg. Mynd/Auðunn

Samræmd sóknaráætlun fyrir landsbyggðina var meðal þess sem ríkisstjórnin ræddi á fundi sínum á Akureyri í dag. Fundurinn á Akureyri var í senn fyrsti starfsfundur nýrrar ríkisstjórnar og fyrsti fundur ríkisstjórnar utan Reykjavíkur ef frá eru taldir hátíðarfundir á Þingvöllum. Að fundi loknum ræddu ráðherrar við blaðamenn á fundi í Háskólanum á Akureyri. Þar sagðist Jóhanna Sigurðardóttir forsætisráðherra gera sér vonir um að koma lögum um persónukjör, þjóðaratkvæðagreiðslur og ráðgefandi stjórnlagaþing í gegnum þingið.

“Þetta lá þannig á síðasta þingi að fjórir af fimm flokkum voru sammála um að koma á stjórnlagaþingi. Sjálfstæðisflokkurinn var einn á móti því,” segir forsætisráðherra.

Verk eins útskriftarnema við Myndlistaskólann.

Þrítugasta og fimmta starfsári Myndlistaskólans á Akureyri lýkur með veglegri sýningu á verkum nemenda í húsnæði skólans efst í Listagilinu nú um helgina. Sýnd verða verk  nemenda fornámsdeildar, listhönnunar- og fagurlistadeildar. Þar gefur  að líta sýnishorn af því helsta sem nemendur hafa verið að fást við í  myndlist og hönnun á þessu skólaári.

Fimmtíu og fjórir nemendur stunduðu nám í dagdeildum skólans í ár og af  þeim munu þrjátíu og tveir brautskrást frá skólanum að þessu sinni -  átta grafískir hönnuðir og níu myndlistarmenn eftir þriggja ára  sérhæft nám. Sextán ljúka alhliða undirbúningsnámi í fornámsdeild. Einnig verða sýnd verk eftir nemendur sem voru á barna- og  unglinganámskeiðum á vorönn. Sýningin verður opin kl. 14:00  til 18:00 bæði á laugardag og sunnudag.

Gangan í dag var sú fjölmennasta í áratugi

Mikið fjölmenni tók þátt í kröfugöngu stéttarfélaganna á Akureyri í dag. Björn Snæbjörnsson formaður Einingar-Iðju sagði í ræðu sinni að þetta væri besta mæting sem hann hefði séð á nær 30 ára ferli sínum. Veðrið lék við Akureyringa og mikill baráttuhugur var í göngumönnum.

Gengið var frá Alþýðuhúsinu í Sjallann við undirleik Big-bands og trommusveitar Tónlistarskólans á Akureyri. Í göngugötunni spiluðu nokkrir gítarleikarar ljúfa tóna á meðan gangan fór framhjá. Hátíðardagskrá fór fram í Sjallanum að göngu lokinni og þar var einnig boðið upp á kaffihlaðborð. Aðal ræðu dagsins flutti Sigurður Bessason, formaður stéttarfélagsins Eflingar.

Björn Snæbjörnsson flutti ávarp 1. maínefndar stéttarfélaganna, Elsa Sigmundsdóttir, ráðgjafi Starfsendurhæfingarsjóðs í Eyjafirði, hélt ávarp þar sem hún fjallaði um tilurð sjóðsins og tilgang og Sigurður Bessason, formaður Eflingar stéttarfélags, flutti aðalræðu dagsins. Fjölbreytt skemmtidagskrá var í boði. Kristján Edelstein og Pétur Hallgrímsson léku nokkur vel valin lög er gengið var í salinn og eins þegar kaffið var drukkið, Big-band Tónlistarskólans á Akureyri spilaði nokkur lög, Freyvangsleikhúsið sýndi atriði úr Vínlandi og sungu nokkur lög og Æskulýðskór Glerárkirkju undir stjórn Ástu Magnúsdóttur endaði dagskránna með ljúfum tónum. Allir sem tóku þátt í kröfugöngunni fengu afhenta happdrættismiða og var dregið í Sjallanum. Vefur Einingar-Iðju greindi frá.

Grétar spáir því að tvö þingsæti færist frá Sjálfstæðisflokki og Framsóknarflokki til Samfylkingar og VG

Kosið verður til Alþingis á laugardag og er útlit fyrir góða kosningaþátttöku. Akureyri.net fékk Grétar Þór Eyþórsson, prófessor í stjórnmálafræði við Háskólann á Akureyri, til að rýna í kannanir og spá fyrir um úrslit kosninganna í Norðausturkjördæmi. Grétar segir að skýrt hafi verið kallað eftir þessum kosningum, en þær hafi ef til vill komið of snemma til að verulegar breytingar gætu átt sér stað.

“Það virðist vera að fjórflokkurinn ætli að standa þessar kosningar af sér, eins og svo oft áður. Lengi vel hélt maður að hann stæði einn eftir, þar sem Frjálslyndi flokkurinn virðist nú vera að hverfa, en allra síðustu kannanir benda eindregið til þess að Borgarahreyfingin muni fá menn kjörna á þing.” Grétar segir að það séu auðvitað ákveðin tíðindi ef svo verði. Hann spáir Samfylkingu og Vinstri-Grænum hvorum um sig þrem mönnum á þing í Norðausturkjördæmi og að sama skapi tapi Sjálfstæðisflokkur og Framsóknarflokkur því hvor sínu þingsætinu nú á laugardag.