Verkmenntaskólinn á Akureyri er í samstarfi við skóla í Finnlandi og Danmörku og hafa þeir skólar nú óskað eftir nemendaskiptum á vorönn 2010. Tveim nemendum af matvælabraut og tveim nemendum á sjúkraliðabraut er boðið að fara til náms í Finnlandi og þrem sjúkraliðanemum að auki er boðið til Danmerkur. Er verkefnið styrkt af Leonardo da Vinci-sjóði Evrópusambandsins og í því felst að hver nemandi fær greiddar 500 evrur í ferðakostnað og 175 evrur á viku í dvalarkostnað. Þetta er því spennandi tækifæri fyrir unga Akureyringa.

Í vetur verður boðið upp á fjöldan allan af námskeiðum fyrir fólk á öllum aldri í Punktinum. Meðal þess sem kennt verður í vetur eru fluguhnýtingar, körfugerð, leikfangasmíði, leirmótun, þæfing og svo mætti lengi telja. Þá eru að vanda kenndar saumar og í vetur verður einnig kennt að endurnýta föt, en það ætti að gagnast mörgum í harnandi árferði. Punkturinn er í möguleikamiðstöðinni Rósenborg, en hægt er að kynna sér námskeiðin betur hér.

Stjórnendur VMA taka við styrkjunum

Í tilefni af 25 ára afmæli Verkmenntaskólans á dögunum komu góðir gestir færandi hendi. Blikksmiðjurnar á Akureyri gáfu skólanum saman hálfa milljón til tækjakaupa auk þess sem eigendur þeirra færðu skólanum jafnháa upphæð frá Félagi blikksmiðjueigenda og Samtökum iðnaðarins. Verður fénu varið til kaupa á búnaði í þágu náms í blikksmíði en tækjabúnaðurinn sem notaður hefur verið til þessa erorðinn gamall og úr sér genginn. Þá hefur Félag málmiðnaðarmanna jafnframt gefið skólanum 850 þúsund krónur til tækjakaupa á málmsmíðabrautinni. Þá fékk skólinn tíu milljónir króna á fjárlögum í þágu þessa verkefnis síðastliðinn vetur.

Málmsmiðabrautin var fyrst til þess að flytja í nýtt húsnæði skólans á Eyrarlandsholtinu og var brautin í upphafi búin gömlum vélum sem teknar voru með úr Iðnskólanum auk þess sem keyptur var notaður búnaður frá Danmörku. Ekki hefur náðst að endurnýja nema hluta hans á síðustu árum – en að sögn skólastjórnenda munu afmælisgjafirnar styrkja deildina mikið.

Brautskráning stúdenta frá MA er löngu orðin mikilvægur hluti af þjóðhátíðardegi akureyringa. Mynd/Ingimar Björn

Þeir verða eflaust stoltir, stúdentarnir sem munu marsera í gegnum bæinn á þjóðhátíðardaginn 17. júní. Menntaskólanum á Akureyri verður slitið við hátíðlega athöfn í Íþróttahöllinni klukkan tíu þann sama dag. Við athöfnina verða brautskráðir 143 stúdentar: 71 af félagsfræðibraut, 24 af málabraut, 48 af náttúrufræðibraut, þar af 16 af eðlisfræðilínu og einn jafnframt af tónlistarkjörsviði listnámsbrautar. Að þessu sinni verður enn fremur brautskráður fyrsti hópur nemenda sem komu í skólann á hraðlínu almennrar brautar, rakleitt úr 9. bekk grunnskóla, harðsnúið lið sem hefur sýnt afar góðan árangur í námi og skólastarfi.

Opið hús verður í Menntaskólanum á Akureyri frá hádegi fram til klukkan 15.30. Þar verða á borðum léttar veitingar og sýnishorn af verkefnum nemenda verða í kennslustofum á Hólum og víðar. Hundruð manna koma á Opið hús 17. júní ár hvert, meðal annars gamlir stúdentar sem koma og ylja sér við að rifja upp sögur frá skólaárunum í MA.

Í tengslum við skólaslit Menntaskólans á Akureyri koma hundruð gamalla nemenda í heimsókn til Akureyrar, koma í gamla skólann sinn, fara margvíslegar ferðir um héraðið og nágrennið og fagna saman stúdentsafmælum á MA-hátíðinni í Íþróttahöllinni að kvöldi 16. júní.

Að kvöldi 17. júní verður stúdentahátíð í Íþróttahöllinni, þar sem saman koma nýstúdentar, ættingjar þeirra og vinir auk kennara og starfsmanna. Þarna verða að þessu sinni á tólfta hundrað manna í hátíðarkvöldverði og skemmtidagskrá nýstúdenta. Þeir munu ganga um bæinn fylktu liði um miðnættið, en síðan verður dansleikur þeirra í Höllinni fram á nótt.

Hátt í þrjúhundruð kandídatar brautskráðust frá Háskólanum á Akureyri í dag.

Háskólinn á Akureyri brautskráði í dag 289 kandídata á Háskólahátíð sem haldin var í Íþróttahöllinni á Akureyri í dag. Flestir brautskráður af félags- og hugvísindadeild, eða 156. Þá brautskráðust 69 nemendur af viðskipta- og raunvísindadeild, og 64 af heilbrigðisdeild. Í fyrsta sinn voru svo brautskráðir fimm kandídatar með MS gráðu í viðskiptafræði. Konur eru í miklum meirihluta hópsins, eða 226 á móti 63 körlum. Forseti Íslands var viðstaddur brautskráningu í ár og afhenti styrki úr Háskólasjóði KEA í móttöku í Háskólanum á Akureyri að lokinni brautskráningu.

Brautskráningin í dag var síðasta brautskráning Þorsteins Gunnarssonar, rektors, en hann lætur af störfum um næstu mánaðarmót. Þorsteinn sagðist í ræðu sinni telja þrótt og uppbyggingu einkenna starf skólans þrátt fyrir erfiða tíma. Þá varaði rektor við þeim hugmyndum sem uppi eru um fækkun háskóla, og að aðeins yrðu tveir háskólar á landinu sem hefðu höfuðstöðvar sínar í Reykjavík: “Með því yrði öll sjálfstæð háskólastarfsemi á landsbyggðinni lögð af en komið yrði á fót óskilgreindum útibúum sem ættu allt undir miðstýrðu valdi höfuðstöðvanna í Reykjavík. Ég dreg í efa ágæti slíkrar útibúastarfsemi á landsbyggðinni.”  Þorsteinn sagðist þó vel getað hugsað sér að háskólum yrði fækkað, þannig að tveir væru með höfuðstöðvar í Reykjavík, en einn á Akureyri.

Ræða Þorsteins í heild sinni verður aðgengileg hér á vefnum fljótlega.

Þorsteinn Gunnarsson háskólarektor segir tillögurnar of höfuðborgarmiðaðar

Þorsteinn Gunnarsson rektor Háskólans á Akureyri segir hugmyndir vinnuhóps um sameiningu háskóla aðför að háskólamenntun á landsbyggðinni. Tillögurnar voru ræddar á fundi háskólaráðs HA í dag. “Það sem við setjum helst fyrir okkur er að þessar tillögur eru allt of höfuðborgarmiðaðar. Í raun og veru er verið að tala um að leggja niður sjálfstæða háskóla á landsbyggðinni og setja upp fjóra háskóla á höfuðborgarsvæðinu,” sagði Þorsteinn í samtali við Akureyri.net síðdegis. Vinnuhópurinn starfaði á vegum Menntamálaráðuneytisins.

Í fréttatilkynningu frá Háskólaráði segir að upplýstri umræðu um vísindi og háskólamál sé fagnað og að ráðið taki undir ýmis sjónarmið sem koma fram í þessum úttektum, sérstaklega hvað varðar aukna samvinnu milli háskóla. Ráðið er þó mótfallið hugmyndum um að Háskólinn á Akureyri verði gerður að útibúi frá háskóla með höfuðstöðvar í Reykjavík og telur skorta fullnægjandi rökstuðning fyrir slíkum hugleiðingum.

Sigurvegararnir í stígvélakastinu

Nemendur Þelamerkurskóla héldu í vikunni fyrstu Þelamerkurleikana, en stefnt er að því að gera þá að árvissum viðburði. Leikarnir tókust afskaplega vel og var keppt í fjölda greina. Mikið og öflugt íþróttastarf hefur verið í skólanum, en skemmst er að minnast þess þegar skólinn náði í úrslit Skólahreystis í síðasta mánuði, eftir keppni við rúmlega eitthundrað skóla víðsvegar að af landinu.

Meðal keppnisgreina á þessum fyrstu Þelamerkurleikum voru hreystigripi, reipitogi, hreystitogi, boltakasti, langstökki, stígvélakasti, olsen-olsen og stinger. Eftir skemmtilega útivist voru nemendur svo kallaðir á sal síðdegis þar sem verðlaunaafhending fór fram.

Nemendur VMA sigruðu keppnina um besta fyrirtækið

Fyrir skemmstu héldu námsmannafyrirtækin Losti og Skellur til Reykjavíkur að keppa við önnur námsmannafyrirtæki um besta fyrirtækið 2009.  Keppnin var í ár haldin í húsnæði Háskólans í Reykjavík og í stuttu máli, þá vann fyrirtækið Skellur tvenn verðlaun; besta viðskiptaáætlunin og svo aðalverðlaunin, besta fyrirtækið 2009.  Skellur framleiddi nú í vetur Gaurinn sem er nokkurskonar klósettsetu dempari og má með sanni segja að hann hafi slegið í gegn.  Losti framleiddi gosdrykkinn Losta sem líka hefur vakið verðskuldaða athygli.

Stjórnendur Skells munu nú í apríllok og í maíbyrjun fara í þann fasa að koma raunverulegu fyrirtæki á koppinn, sem og að undirbúa sig að fara til Hollands í sumar þar sem þau munu keppa í Evrópukeppni ungra frumkvöðla. Vefur VMA greindi frá.