Eitt það skemmtilegasta sem börn vita er að sulla. Á leikskólum bæjarins er mikið sullað þessa dagana, enda tilvalið þegar rignir. Á heimasíðu Krógabóls er að finna skemmtilegar myndir frá sulludegi þar á bæ og birtist hér ein þeirra. Sjá www.krogabol.akureyri.is

Hugrún Sigmundsdóttir, settur leikskólastjóri, hefur verið ráðin leikskólastjóri á Pálmholti.

Fræðsludagur starfsfólks í leikskólum Akureyrarbæjar var haldinn þriðjudaginn 25. mars s.l. Stjórnandi var Ingunn H. Bjarnadóttir. Fræðsludagurinn hófst með ávarpi bæjarstjóra, Sigrúnar B. Jakobsdóttur.

Dagskrá fræðsludagsins fjallaði aðallega um stjórnkerfi bæjarins og skóladeildar og hóf Gunnar Gíslason fræðsluna um þessa þætti. Þá hélt Þórgnýr Dýrfjörð erindi sem hann nefndi Þjónusta og ímynd Akureyrarbæjar. Kynning á stoðþjónustu og fjölskyldudeild var í höndum Guðrúnar Sigurðardóttur og síðan kynning á Skólaþróunarsviði Háskólans á Akureyri, sem Anna E. Hreiðarsdóttir annaðist. Eftir hádegishlé var kynning á Alþjóðahúsinu á Norðurlandi, sem Anna Guðný Guðmundsdóttir flutti.

Fleiri erindi voru flutt en að þeim loknum var komið að kynningu á verkefni sem heitir Fiskurinn og notað er í mörgum leikskólum bæjarins. Heimir Bjarni Ingimarsson stjórnaði svo fjöldasöng.
Þá fjallaði Karl Guðmundsson um jafnréttis- og fjölskyldustefnu Akureyrabæjar en í lokin var hópavinna og samantekt á Fjölskyldustefnu Akureyrarbæjar. Gunnar Gíslason, fræðslustjóri sleit svo námskeiðinu.

Frá þessu er greint í Skóla-akri, rafrænu tímariti Skóladeildar Akureyrarkaupstaðar.

Um miðjan mánuðinn tóku nemendur grunn- og leikskólans í Hrísey upp kartöflurnar í garðinum sínum. Þær voru hvorki stórar né margar en börnin stóðu sig með mikilli príði og gerðu sér að góðu kartöflurnar sem bornar voru fram með steikta fiskinum í hádeginu. Leikskólinn hefur sett skemmtilegar myndir frá þessum atburðum inn á síðu sína: http://smabaer.akureyri.is

Börnin á leikskólanum Naustatjörn kíktu aðeins undir grösin í matjurtabeðinu sínu í gær og tóku upp nokkrar radísur (hreðkur) til að smakka með hádegismatnum. Hér eru Kolbrún María, Erna Rún og Katla Snædís með góðgætið, en myndin er fengin af heimasíðu Naustatjarnar, www.naustatjorn.akureyri.is

Þann 27. júní var útileikjadagur hjá börnunum á Sunnubóli. Kisudeild setti upp þrautabraut sem börnin þurftu að glíma við, börnin þurftu að hoppa, ganga á jafnvægislá, klifra, hoppa á trampólinni, skríða í gegnum göng og fleira skemmtilegt. Myndin er tekin af vefsíðu Sunnubóls og þar má sjá fleiri skemmtilegar myndir frá útileikjadeginum: www.sunnubol.akureyri.is

Á laugardaginn  var haldið uppá 25 ára afmæli leikskólans Leikhóla á Ólafsfirði. Öllum bæjarbúum var boðið til veislu í tilefni dagsins og tók Þorsteinn Ásgeirsson forseti bæjarstjórnar skóflustungu að stækkun á leikskólanum. Það var einnig sýning á verkum barnanna og ljósmyndasýning frá 25 ára sögu leikskólans. Boðið var uppá grillaðar pylsur og risa tertu sem listamaðurinn Tolli myndskreytti. Slökkviliðið með hoppukastala fyrir börnin. Kívanis klúbburinn Súlur gaf leikskólanum 40 þúsund krónur og foreldrafélag leikskólans gaf stórt færanlegt brúðuleikhús.

Föstudaginn 1. júní síðastliðinn hlaut leikskólinn Krógaból viðurkenningu sem heilsuleikskóli. Við hátíðlega athöfn afhenti Unnur Stefánsdóttir, leikskólastjóri Heilsuleikskólans Urðarhóls og formaður samtaka heilsuleikskóla, leikskólanum viðurkenninguna.

Krógaból hefur unnið að því frá 2005 að ná markmiðum heilsustefnunar með því t.d. að bæta mataræði leikskólans, minnka salt ,sykur og unna matvöru en jafnframt aukið grænmetis og ávaxtaneyslu. Hreyfing hefur verið aukin og fá öll börn leikskólans skipulagðar hreyfistundir að lámarki einu sinni í viku.

Krógaból er sjöundi leikskólinn sem hlýtur þessa viðurkenningu og sá fyrsti hér á Norðurlandi, segir í frétt á akureyri.is þaðan sem myndin er fengin.

Börnin á leikskólanum Iðavelli héldu tónleika í sal Tónlistarskólans á Akureyri í dag. Sungu þau ýmsa söngva, þjóðlög og dægurlög, við mikla hrifningu gesta.

Geisladiskur með lögum barnanna, Iðavallarrokk, var til sölu á staðnum og mun ágóðinn renna til kaupa á nýju hljóðkerfi fyrir leikskólann.

Frá þessu er greint á www.akureyri.is þar sem sjá má fleiri myndir frá tónleikunum.

Í dag er nýja húsið á leikskólanum Iðavelli 6 ára og börn og starfsmenn héldu upp á afmælið með því að syngja saman, sjá heimagert leikrit og svo kom slökkviðliðið óvænt í heimsókn þegar einn pabbinn kíkti við. Þá vildu allir skoða bílinn og krakkarnir þyrptust út og fengu að fara inn í bílinn. Starfsmönnum taldist til að slökkviliðsmennirnir hefðu hvor um sig lyft um einu tonni þegar þeir hjálpuðu börnum inn og út úr bílnum. Í hádeginu var á boðstólum uppáhaldsmatur barnanna, kjúklingur með kartöflubátum og svo var kaka í kaffinu. Í dag var sem sagt sannkölluð hátíð á Iðavelli og allir skemmtu sér vel, að sögn starfsfólksins, sem sendi okkur meðfylgjandi myndir.

Lokaspetturinn við stækkun leikskólans Álfasteins er nú hafinn, að því er fram kemur á vef Hörgárbyggðar. Rafvirkjar hafa verið önnum kafnir í viðbyggingunni síðustu daga og smiðir staðið í ströngu við að setja upp kerfisloft. Afhending á föstum innréttingum er áætluð í þessari viku en áætlað er að byggingin verði tilbúin til notkunar um miðjan febrúar. Þá hefjast breytingar á eldra húsnæði leikskólans til að húsnæðið myndi eina heild, segir ennfremur á vefnum, þaðan sem myndin af framkvæmdunum er fengin.

Miðvikudaginn 20. desember heimsóttu tveir elstu árgangar leikskólans Holtakots gamla fólkið á Seli og sungu jólalög fyrir það við undirspil Gunnu Torfa. Þetta var mjög notaleg stund og börnin fengu mikið lof fyrir kurteisi og dugnað, segir á heimasíðu Holtakots, þar sem skoða má fleiri myndir frá heimsókninni og öðru starfi á leikskólanum.

http://holtakot.akureyri.is
 

Í síðustu viku var margt um að vera á Völlum á leikskólanum Tröllaborgum, eins og á flestum leikskóladeildum bæjarins. Rebekka Unnur, 4 ára í Hvammi, spilaði á fiðlu fyrir börnin á deildinni  og svo bauð foreldrafélag Tröllaborga upp á leiksýninguna „Búkollu“ í flutningi leikfélags MA. Nánar á www.trollaborgir.akureyri.is

Nýlega tóku börnin á leikskólanum Smábæ í Hrísey sig til og bjuggu til pappír í stórum stíl ásamt foreldrum sínum og kennurum. Árangurinn varð sá að allar snúrur urðu fullar af pappír. Dagurinn varð hinn skemmtilegasti og sulluðu börnin og þau fullorðnu eins og þau mögulega gátu, að því er fram kemur á heimasíðu Smábæjar, http://smabaer.akureyri.is/

Þá fór fyrir skömmu fram kökusala þar sem selt var bakkelsi sem foreldrar og starfsfólk leikskólans höfðu bakað. Rann ágóðinn til ýmiss konar menningarstarfsemi og skemmtana fyrir börnin. Einnig voru seld kort sem starfsfólk og börn höfðu búið til.

Á heimasíðu Smábæjar má sjá fleiri myndir frá pappírsgerðinni og ýmsum öðrum viðburðum í leikskólanum.