Tvö pláss eru laus vegna forfalla á dönskunámskeiðið í tungumálalýðháskólanum á Kalø á Jótlandi. Flogið verður út 13. júní og komið heim 27. júní. Kennsla fer fram á dönsku. Dönskukennsla er 4 kennslustundir fyrir hádegi og frítímakennsla er 3 stundir eftir hádegi. Danskir kennarar sjá um kennsluna en 30 nemendur og 3 kennarar/fararstjórar fara frá Íslandi.

Þetta er frábær möguleiki fyrir þá sem vilja bæta dönskukunnáttuna, segir í tilkynningu frá Norrænu upplýsingaskrifstofunni, góð fermingargjöf og fjárfesting til framtíðar. Verkefnið er styrkt af Nordplus-sprog.

Áhugasamir hafi samband sem fyrst við Maríu í síma 4627000 eða sendi tölvupóst á mariajons@akureyri.is

Sýning grunnskólanema á Akureyri á íkonamálverkum verður haldin í Deiglunni í Listagilinu dagana 31. mars og 1. apríl kl. 14-17.
Allir eru velkomnir.

Verðlaun í stærðfræðikeppni grunnskóla voru veitt við athöfn í Menntaskólanum á Akureyri á laugardaginn. Nemendur í MA léku á hljóðfæri við athöfnina og allir þátttakendur fengu viðurkenningarskjöl en þrír efstu í hverjum flokki verðlaun, sem Kaupþing banki veitti.

Verðlaunahafar í 8. bekk voru: 1. Ómar Friðriksson, Lundarskóla, 2. Agnes Eva Þórarinsdóttir, Lundarskóla og 3. Gunnar Þór Björnsson, Lundarskóla.

Verðlaunahafar í 9. bekk voru: 1. Bjarki Geir Benediktsson, Síðuskóla, 2. Sunna Björnsdóttir, Grenivíkurskóla og 3. Þorsteinn Sævar Kristjánsson, Oddeyrarskóla.

Verðlaunahafar í 10. bekk voru: 1. Magnús Arturo Batista, Síðuskóla, 2. Haukur Björnsson, Lundarskóla og 3. Sindri Snær Rúnarsson, Síðuskóla.

www.ma.is

Í gær fór fram keppni í skólahreysti hér á Akureyri sem er undankeppni fyrir úrslitakeppni á höfuðborgarsvæðinu. Leikar fóru þannig að Brekkuskóli sigraði í keppninni en keppendur stóðu sig með prýði og sömuleiðis áhorfendur, sem studdu sitt fólk dyggilega. Sjá vefsíðu keppninnar, www.icefitness.is

Skólahreysti er hreystikeppni fyrir 9. og 10 bekkinga allra grunnskóla landsins og byggist upp á fimm keppnisgreinum: Upphífingum (strákar), armbeygjum (stelpur), dýfum (strákar), fitnessgreip (stelpur) og hraðaþraut (stelpur/strákar). Hraðaþraut er byggð upp á mörgum mismunandi þrautum.  Byrja þarf inni í lokuðum bíl, hlaupa í 12 dekkjum, fara á höndum 5 m langan stiga, klifra yfir 5 m háan netvegg, skríða undir 5 m langt net, hlaupa með 10-20 kg sekki, lyfta 25-35 kg hnöttóttum kúlum, sippa 10 sinnum og klifra upp í 4–6 m kaðal og enda inni í bíl. 

Alls verða haldnar 10 forkeppnir í Skólahreysti. 6 keppnir eru búnar. Skjár einn tekur upp allar keppnirnar og sýnir þær kl. 20:00 á þriðjudagskvöldum. Stigahæsti skólinn úr hverjum riðli kemst í
úrslitakeppnina sem haldin verður í Laugardalshöll 26. apríl og sýnd í beinni útsendingu á Skjá einum. Það er til mikils að vinna því að sá skóli sem hreppir fyrsta sæti í úrslitum fær 200 þúsund í  verðlaunafé sem rennur til nemendafélags, annað sæti fær 100 þúsund og þriðja sæti fær 50 þúsund.

Byrjað var á Stór-Reykjavíkursvæðinu. Selfoss og Egilsstaðir eru að baki, nú er það Akureyri, síðan Ísafjörður og loks Borgarnes.

Þeir skólar sem komnir eru í úrslit úr fyrstu sex riðlunum eru:
Breiðholtsskóli, Hagaskóli, Lindaskóli, Áslandsskóli, Flúðaskóli og
Heppuskóli í Höfn í Hornafirði.

Þeir skólar sem keppa á Akureyri:
Fyrri riðill kl. 16.00: Borgarhólsskóli, Dalvíkurskóli, Grunnskóli Siglufjarðar, Grunnskóli Skútustaðahrepps, Grunnskólinn á Hofsósi, Grunnskólinn á Ólafsfirði, Höfðaskóli og Þelamerkurskóli. Seinni riðill hefst kl. 18.00 og í honum eru: Brekkuskóli, Giljaskóli, Glerárskóli, Hrafnagilsskóli, Oddeyrarskóli, Síðuskóli, Valsárskóli og Varmahlíðarskóli.   

Ívar Guðmundsson útvarps og fitnesskappi verður kynnir. Gunnlaugur Helgason útvarpsmaður tekur viðtöl við keppendur og íþróttakennara.  Sterku bræðurnir Andrés og Pétur Guðmundssynir verða dómarar. Enginn aðgangseyrir er og allir velkomnir.

Þrjátíu verðandi nemendur í 1. bekk haustið 2007 frá leikskólunum Hólmasól og Pálmholti komu nýlega í heimsókn í Brekkuskóla ásamt starfsfólki leikskólanna. Börnin gengu um ganga skólans og fengu að líta við í skólastofum, skrifstofum stjórnenda og litu við í mötuneytinu og bókasafninu. Ljósritunarvélin vakti sérstaka athygli þeirra í skrifstofuhluta skólans. Á eftir fengu þau örlitla fræðslu um umferð og umferðareglur og voru dugleg að hjálpa aðstoðarskólastjóranum við að leita svara við spurningum tengdum umferðinni. Að lokum fóru þau heim með bækling um umferðina sem foreldrarnir geta farið yfir með þeim og bæklingnum fylgdu tvö endurskinsmerki með merki skólans á. Frá þessu er sagt á heimasíðu Brekkuskóla.

Þar er einnig frá því greint að fimmtudaginn 1. febrúar héldu nemendur í 5.- 7.bekk árshátíð sína með pompi og prakt. Sýndu þau nemendum, foreldrum og starfsfólki skólans nútímalega útgáfu af ævintýrinu Öskubuska sem allflestir þekkja. Nemendurnir sungu sig inn í hjörtu foreldra og starfsfólks og var hin mesta skemmtun. Á eftir var kaffihlaðborð á vegum foreldra 6. bekkjabarna, en þau eru í fjáröflun fyrir Reykjaferð í haust. Sjá www.brek.akureyri.is

Norræna upplýsingaskrifstofan á Akureyri, í samstarfi við Skóladeild
Akureyrarbæjar og Europahøjskolen í Danmörku, hefur staðið fyrir vellukkuðum tungumálanámskeiðum fyrir íslenska grunnskólanema (7.-10. b.) undanfarin þrjú ár. Þátttakendur, 85 nemendur og 8 kennarar, hafa verið ánægðir með dvölina ytra og námskeiðið hefur skilað sér vel þegar horft er til áhuga og færni nemenda í dönsku að því loknu sem og fleiru, segir í frétt frá skrifstofunni. Verkefnið hefur hlotið styrk frá Nordplus-Sprog en án hans væri það vart
framkvæmanlegt.

Michael Dal, lektor við KHÍ, tók saman mat á námskeiðinu 2005.  Skýrslan er aðgengileg á heimasíðu Norrænu upplýsingaskrifstofunnar, www.akmennt.is/nu. Á heimasíðunni er einnig aðgengileg heimasíða námskeiðsins 2006. Þar má lesa dagbókarfærslur nemenda og kennara og skoða myndir frá dvölinni. Nú er skráning hafin á næsta námskeið í júní 2007. Upplýsingar er að finna á heimasíðu Norrænu upplýsingaskrifstofunnar.

Fyrir nokkrum dögum fengu nemendur 2. bekkjar Oddeyrarskóla sent skjal frá Hjálparstarfi kirkjunnar þar sem þeim er þakkað fyrir framlag til vatnsöflunar í Mósambik. Nemendur 2. bekkjar og Ragnheiður Lilja kennari þeirra héldu styrktarsamkomu fyrir jólin, þar sem krakkarnir sungu og lásu upp og buðu síðan upp á kaffi. Fulltrúi frá Hjálparstarfi kirkjunnar tók síðan á móti ágóða af samkomunni. 

Í bréfinu til þeirra segir m.a.: ,,Kæru nemendur! Fyrir framlag ykkar, 19.982 krónur til vatnsöflunar, verður hægt að útvega 166 manns í Mósambik í Afríku hreint og gott vatn í mörg ár. Við þökkum ykkar góða hug og framkvæmdasemi. Haldið áfram að hjálpa öðrum, þannig gerum við heiminn betri.” 

Á eftirfarandi frétt rákumst við á heimasíðu Brekkuskóla: ,,Sparifatafélagið Finnbogi er félag nokkurra vaskra drengja í Brekkuskóla sem hefur það eitt að markmiði að mæta spariklæddir í skólann á föstudögum. Skemmtileg hugmynd sem lífgar óneitanlega upp á lífið og tilveruna í skólanum. Félagið var stofnað þann 10.nóvember 2006 á þemadögum – nánar tiltekið á bókasafni skólans. Þeir sem áttu hugmyndina eru þeir Brynjar, Sverrir og Daníel og eru þeir allir nemendur í 10. bekk. Í félaginu eru nú alls 13 drengir og má því segja að það fari ört vaxandi!” Myndin af glæsimennunum er fengin af síðu Brekkuskóla.

Við upphaf skólaársins 2006-2007 munu u.þ.b. 2600 nemendur setjast á skólabekk á Akureyri. Nemendurnir eiga að koma í skólana mánudaginn 21. ágúst. n.k. sem hér segir:

Lundarskóli, Oddeyrarskóli, Síðuskóli, Glerárskóli, Giljaskóli og Hlíðarskóli:

Nemendur í 2., 3. og 4. bekk klukkan 9.00.
Nemendur í 5., 6. og 7. bekk klukkan 10.00.
Nemendur í 8., 9. og 10. bekk klukkan 11.00.
Sérdeild Giljaskóla – Nemendur mæti klukkan 09.00

Hlíðarskóli – Drengja- og stúlknadeild mæti klukkan 9.00.

Skjöldur- Nemendur mæti kukkan 11.00.

Nemendur Brekkuskóla verða boðaðir sérstaklega til viðtals við umsjónarkennara bréflega.

Grunnskólinn í Hrísey verður settur þann 23. ágúst n.k. kl. 17.00.

Nemendur sem hefja nám í 1. bekk verða boðaðir sérstaklega með bréfi til viðtals í skólunum ásamt aðstandendum sínum.

Foreldrar eru hvattir til að koma með börnum sínum fyrsta skóladaginn.

Sjá www.akureyri.is

Nemendur í 6. bekk Síðuskóla fóru Eyjafjarðarhringinn í síðustu viku og rákumst við á þessa mynd á heimasíðu skólans. Komið var við í fjósi í Hrafnagili, nesti borðað í Grundarreit, Svifflugfélagið heimsótt á Melgerðismelum og að lokum var farið að veiða á Hólavatni, segir í frétt á vef Síðuskóla, þar sem skoða má fleiri myndir af viðburðum, vettvangsferðum og uppákomum síðustu daga skólahaldsins í vor: www.sida.akureyri.is/

Föstudagurinn 12. maí var umhverfis- og útivistardagur í Glerárskóla. Nemendur í 2. bekk fylltu nokkra ruslapoka þegar þeir tíndu rusl í nágrenni skólans. Myndin er fengin af heimasíðu Glerárskóla og sýnir nokkur af þessum harðduglegu snyrtimennum.

Miðstig fór inn í Kjarnaskóg þar sem nemendur léku sér í leiktækjunum sem þar eru. Myndir af ruslatínslunni og ferð miðstigsnemenda má sjá á vef Glerárskóla, www.gler.akureyri.is

Þriðjudaginn 2. maí fengu nemendur í 2. bekk Brekkuskóla sér göngutúr inn í gróðrarstöð og þar sem hann Jóhann tók á móti þeim. Þar fengu allir fræðslu um sáningu, hvernig væri best að planta og hirða um blóm. Krökkunum voru svo gefin blóm sem þau munu koma fyrir í pottum í skólanum og hugsa um, skrifar ÁFJ á vef Brekkuskóla, þaðan sem myndin er tekin. Fleiri myndir má sjá á síðu Brekkuskóla, www.brek.akureyri.is

Það er ýmislegt gert til að lífga upp á tilveruna í skólanum og nú um daginn fengu nemendur í Brekkuskóla skemmtilega heimsókn, sem frá er sagt á vef skólans, www.brek.akureyri.is . Þar voru á ferðinni nokkrir litlir hvolpar sem heilsuðu upp á nemendur í yngri bekkjunum og nutu aðdáunar góða stund. Myndin er fengin af heimasíðu Brekkuskóla.

10. bekkur Brekkuskóla var í skólanum fram á nótt föstudaginn 17. mars við lærdóm og íþróttir af hinu ýmsasta tagi. Var þetta liður í fjáröflun fyrir vorferðalag 10. bekkjar og söfnuðu nemendur áheitum gegn því að læra alveg ógurlega, eins og segir í frétt á heimasíðu Brekkuskóla, www.brek.akureyri.is . Þar má einnig finna fleiri myndir frá námsmaraþoni og ýmsum öðrum viðburðum í skólastarfinu.