Lið Menntaskólans á Akureyri keppir við lið Verzlunarskóla Íslands í Íþróttahöllinni á Akureyri annað kvöld, föstudagskvöld. Keppnin verður sýnd beint í Sjónvarpinu. Höllin verður opin klukkan 19.30 – 20.00, en þá verður skellt í lás því á því andartaki hefst útsending, að því er fram kemur í frétt á heimasíðu Meenntaskólans.

Þar kemur einnig fram að mikill hugur sé í Menntaskólanemum og þeir muni flykkjast að og styðja lið sitt. Takmarkið sé vissulega að halda hljóðnemanum heima enda fari hann mjög vel í anddyri Hóla. Að sunnan kemur fylking Verzlunarskólanema til að styðja sitt lið, og það má því búast við fjöri og fagnaðarlátum í Höllinni, segir ennfremur í fréttinni. Nýja Gettu betur-liðið í MA er skipað þeim Örnu Hjörleifsdóttur, Svölu Lind Birnudóttur og Konráð Guðjónssyni. Myndina af þeim, sem fengin er af MA-vefnum, tók Vilhelm Ernir Ívarsson.

Söngkeppni VMA fór fram á fimmtudagskvödið sl. sigurvegari kvöldsins var Eyþór Ingi Gunnlaugsson með lagið Perfect Strangers eftir Deep Purple. Í öðru sæti voru Katla og Kolla, þær sungu lagið The Blowers Daughter með Damien Rice og Í þriðja sæti var Stefán Þór, hann sat einn á sviðinu með gítarinn sinn og söng lagið Plush með Stone Temple Pilots.
Símakosninguna unnu Pálmi og Höskuldur, þeir sungu lagið Hleyptu okkur heim, betur þekkt sem Another Brick in the Wall með Pink Floyd.
Allt gekk mjög vel fyrir sig og var keppnin glæsileg í alla staði. Þetta kemur fram á heimasíðu nemendafélags VMA http://www.thorduna.is
Ljósmyndari akureyri.net var á staðnum og myndir úr keppninni verða settar hér inná síðuna á næstu dögum.

Nú er fjórða árið hafið í fyrirtækjarekstri ungra frumkvöðla í VMA. Hugmyndirnar sem nú komu að vörum eða þjónustu voru góðar og margar hverjar mjög frumlegar. Tvö námsfyrirtæki voru stofnuð: Varðstöð Kalla og Liljan og eru vörur þeirra líklega eins ólíkar og hægt er, að því er fram kemur á heimasíðu VMA.

Varðstöð Kalla mun framleiða myndband sem er í raun þrjú myndbönd; stílistamyndband fyrir drengi, stílistamyndband fyrir stúlkur og loks myndband hvernig þrífa skal t.d. salerni, bað og hvernig nota á þvottavél.

Liljan ætlar að framleiða páskaegg þar sem mögulega verður leikið sér með formið eða útlitið. Hugsanlega verður boðið upp á happdrættisvinninga á baki blaðsins sem málshátturinn er á.

Þessa dagana standa starfmenn fyrirtækjanna að markaðskönnun fyrir fyrirtækin þar sem viðbrögð og áhugi almennings fyrir vörum og þjónustu þeirra er kannaður.

www.vma.is

Í gærkvöldi fór fram þriðja og síðasta viðureign í annarri umferð í spurningakeppni framhaldsskólanna, Gettu betur, á Rás tvö. Menntaskólinn á Akureyri vann þá Flensborgarskólann í Hafnarfirði með 24 stigum gegn 12 og Menntaskólinn í Kópavogi vann Menntaskólann Hraðbraut með 23 stigum gegn 19.  

Keppni í sjónvarpi hefst 23. febrúar og föstudaginn 2. mars mætir Menntaskólinn á Akureyri Verzlunarskóla Íslands.

Lið VMA tapaði fyrir Menntaskólanum Hraðbraut, 13-9, í fyrstu umferð Gettu betur, spurningakeppni framhaldsskólanna. Strákarnir stóðu sig prýðilega í nokkuð þungri keppni – eins og greina má af stigaskorinu – en voru vissulega vonsviknir með niðurstöðuna. Þeir eru þó staðráðnir í að gera betur næst og ætla að hefja undirbúning strax fyrir næstu keppni, segir á heimasíðu VMA.

Fimmtudaginn 11. janúar nk. keppir lið VMA við Menntaskólann Hraðbraut í Gettu betur. Keppnin fer fram á Rás 2 (FM 96,5) og hefst kl. 20:00.

VMA-liðið skipa (f.v.) Jóhann Björgvin Elíasson, Orri Kristjánsson og Helgi Sigurðsson. Um þjálfun liðsins sjá Ómar Kristinsson og Þorsteinn Krüger. Liðið hefur komið saman stuttlega um einu sinni í viku frá upphafi skólaársins en síðustu vikur hefur æfingum fjölgað eins og prófatíð og jólafrí hafa leyft og lokadagana fyrir keppnina er æft daglega, segir á heimasíðu Verkmenntaskólans á Akureyri, þaðan sem myndin af þeim félögum er fengin.

Nú hefur illræmdur reykingaskúr verið fjarlægður af skólalóð VMA og mun ekki koma aftur, segir í frétt á heimasíðu skólans. Þar kemur einnig fram að farið verður í sérstakt átak í skólanum á vorönninni í því skyni að koma í veg fyrir reykingar á skólalóð.

Reykingar og önnur notkun tóbaks þ.m.t. munn- og neftóbaks er bönnuð innan veggja skólans og á lóð hans. Verði nemandi uppvís að notkun tóbaks innan veggja skólans eða á lóð hans þarf viðkomandi að koma í viðtal til skólameistara þar sem nemanda verður veitt skrifleg áminning um brot sitt. Sé nemandi yngri en 18 ára verður foreldrum hans sent afrit af áminningunni. Brjóti nemandi aftur af sér varðar það brottrekstri úr skólanum, segir ennfremur á heimasíðu Verkmenntaskólans, www.vma.is

Að þessu sinni voru 74 nemendur brautskráðir frá Verkmenntaskólanum á Akureyri af hinum ýmsu námssviðum og brautum. Þar af voru 34 stúdentar; 13 af félagsfræðabraut, fjórir af listnámsbraut, 10 af náttúrfræðibraut, fjórir að loknu starfsnámi af ýmsu  tagi og loks þrír að loknu  fjarnámi. Þetta kemur fram á heimasíðu VMA, þaðan sem myndin er fengin.

Jafnframt brautskráðust  frá skólanum 13 sjúkraliðar, 11 rafvirkjar, tveir 4. stigs vélstjórar, tveir matartæknar, tveir húsasmiðir, tveir matartæknar, einn aðstoðarkokkur – sá fyrsti á landinu –  og sjö iðnmeistarar að loknu fjarnámi.

Í ræðu sinni talaði Hjalti Jón Sveinsson skólameistari um ýmsar breytingar sem orðið hafa í skólastarfi, allt frá breittum viðhorfum nemenda til heimanáms til nýrra brauta sem starfrækja á við VMA á komandi árum.

www.vma.is

Á útskriftardaginn 20. desember verður í fyrsta sinn í sögu landsins útskrifaður aðstoðarkokkur frá Verkmenntaskólanum á Akureyri.

Árið 2004 kom út ný námskrá fyrir Matvæla- og veitingagreinar. Samkvæmt þeirri námskrá geta nemendur í matreiðslu og framreiðslunámi valið tvær leiðir í námi sínu.  Orðið aðstoðarkokkar og aðstoðarþjónar eða kokkar og þjónar. Nám til aðstoðarkokks er 38 einingar eða 2 annir í skóla og  síðan samningsbundið nám hjá meistara í 52 vikur.

Fimmtudaginn 7 desember  tók fyrsti nemandi landsins  Sigríður Benediktsdóttir próf sem aðstoðarkokkur og mun brautskrást frá Verkmenntaskólanum 20. desember nk. 

Prófið sem Sigríður tók  skiptist í tvennt. Fyrst var bóklegt prófið sem tók um klukkutíma.  Í því svaraði Sigríður ýmsum spurningum sem Jakob Magnússon, prófdómari og Friðrik Sigurðsson, prófdómari og formaður sveinprófsnefndar lögðu fyrir hana. 

Síðari hluti prófsins var verklegt 5 klukkustunda próf þar sem prófdómararnir fylgdust með vinnubrögðum og afurðum Sigríðar. Í prófinu matreiddi hún einn fiskrétt, tvo kjötrétti og einn aðalrétt.

Á myndinni eru (talið frá vinstri): Borghildur F. Blöndal, kennslustjóri raungreinasviðs, Jakob Magnússon, prófdómari, Sigríður Benediktsdóttir, nemi, Friðrik Sigurðsson, prófdómari og formaður sveinprófsnefndar, og Hjördís Stefánsdóttir, brautarstjóri matvælagreina.

Frá þessu er greint á heimasíðu Verkmenntaskólans, www.vma.is

Nemendur í líffræði í MA voru í fyrradag í verklegum tímum og spreyttu sig á að kryfja innyfli svína og rannsaka það sem fyrir augu bar. Við rákumst á litla frétt um þetta á heimasíðu Menntaskólans, www.ma.is en myndirnar voru teknar þar sem 3. bekkur VX var að störfum í stofu 1 á Möðruvöllum undir stjórn Ástu F. Flosadóttur, Kristínar Sigfúsdóttur og Þóris Haraldssonar.

Í dag, föstudaginn 1. desember, verður árshátíð Menntaskólans á Akureyri haldin. Hana sækja um 900 manns, nemendur og kennarar, og hátíðin er haldin í Íþróttahöllinni á Akureyri.

Hátíðin er stærsta vímefnalausa hátíð landsins, og hefur verið það um árabil, segir í fréttatilkynningu frá Hugin, skólafélagi MA. Nemendur sjá um alla skipulagningu og framkvæmd hátíðarinnar. Hún hefst á hátíðlegu borðhaldi þar sem nemendur flytja skemmtiatriði og ávörp. Eftir að borðhaldi lýkur er dansleikur þar sem stórsveitin Jagúar spilar á neðri hæðinni og tveir plötusnúðar á þeirri efri.

Það er hefð að fjórðubekkingar klæðist íslenska þjóðbúningnum á árshátíðinni. Nemendur og kennarar stíga svo gömlu dansana í hléi, en þá spila Þuríður formaður og hásetarnir harmonikkutónlist. Mikið er lagt upp úr gömlu dönsunum í skólanum, nemendur læra gömlu dansana í íþróttatímum vikurnar fyrir árshátíð og halda auk þess dansæfingar eftir skóla.

Mikill metnaður er lagður í uppsetningu hátíðarinnar, en þrátt fyrir umfang hennar og þá staðreynd að hún er stærsta vímuefnalausa hátíð landsins hefur hún fengið litla umfjöllun í fjölmiðlum, segir í fréttatilkynningunni. Þar segir ennfremur að algengt sé að ungt fólk fái neikvæða athygli í fjölmiðlum en þetta sé dæmi um atburð sem sýni hversu metnaðarfullt og ábyrgt margt ungt fólk sé. Auk þess sé þjóðbúningahefðin sérstök, það sé ekki oft sem 140 nítján ára ungmenni klæða sig í íslenska þjóðbúninginn.

Hið vel gefna og forkunnarfallega Morfíslið Menntaskólans á Akureyri mætti liði Verzlunarskólans í æsispennandi ræðukeppni í Kvosinni þann 24. nóvember sl. í fyrstu og einu keppni Morfísliðs MA í vetur þar sem lið Versló fór með sigur úr býtum að þessu sinni.
Á heimasíðu Munins segir:  "Það er erfitt að gæta hlutleysis í svona málum þannig að Muninn ákveður að reyna það ekki einusinni en mun fara rólega í stóryrðin. Sem MA-ingar viljum við auðvitað að MA hljóti gull og græna skóga í öllum þeim keppnum sem við tökum þátt í og mælskulist og gáfum þá helst, þó að fótbolti sé vitanlega ásættanlegur.
Eftir að hafa setið í salnum og fengið að heyra úrslit kvöldsins, ræðumann og lokasigur, þá hlýtur hver menntskælingur að furða sig á ákvörðun dómnefndar í þessum efnum, hvort að þeir hafi á annað borð setið í sama sal og heyrt og séð sömu framkomu".

"Það virðist sem stigagjöf í keppninni einkennist af desíbelum en ekki rökum".

Myndir frá keppninni sem Axel Darri tók má sjá með því að smella hér

Athöfn verður í nýbyggingu heimavistar Menntaskólans og Verkmenntaskólans á Akureyri í dag klukkan 16.20. Þá mun séra Svavar Alfreð Jónsson sóknarprestur Akureyrarkirkju blessa heimavistina, en við sama tækifæri verða herbergjunum í nýbyggingunni formlega gefin nöfn. Um er að ræða rammíslensk nöfn, fengin úr öllum héruðum landsins, enda heimavistin heimili nemenda, sem sækja skóla hér á Akureyri um langan veg. Sigurður Helgi Oddsson og Tryggvi Aðalbjörnsson, stúdentar úr MA síðastliðið vor og fyrrum íbúar á heimavist, höfðu veg og vanda af að velja nöfnin. Þetta kemur fram á heimasíðu MA.

Það er Heimavistarráð sem stendur að þessari athöfn, en það þótti vel við hæfi að opinbera nýju herbergjanöfnin á degi íslenskrar tungu. Til athafnarinnar er boðið, auk íbúa vistarinnar, starfsfólki Menntaskólans og Verkmenntaskólans, stjórn Lundar, sem annast rekstur heimavistarinnar, öðru nafni nemendagarðanna, Tryggva Gíslasyni fyrrverandi skólameistara, sem einarðlegast barðist fyrir byggingu þessa glæsilega húss og Kristjáni Þór Júlíussyni, sem studdi framkvæmdina og tók meðal annars fyrstu skóflustunguna. Við athöfnina mun Sigurður Helgi Oddsson, fyrrum konsertmeistari MA, leika á píanó.

Fimmtudaginn 2. nóvember verður haldin árleg söngvakeppni nemenda á starfsbrautum framhaldsskólanna í Verkmenntaskólanum á Akureyri. Á starfsbrautum stunda nemendur með sérþarfir nám.

Nemendur á starfsbraut VMA unnu keppnina sem haldin var í Menntaskólanum í Kópavogi í fyrra og því er keppnin haldin á Akureyri í ár.

9 skólar keppa í ár og reiknað er með að um 170 manns taki þátt í keppninni á einn eða annan hátt.

Keppnin hefst klukkan 20:00 og eru allir velkomnir. Miðaverð verður 500 kr.

Byggingadeild VMA var í síðustu viku veitt viðurkenning frá Félagi byggingamanna Eyjafirði og Vinnueftirliti ríkisins fyrir að standa vel að öryggismálum ungs fólks í byggingariðnaði.  Á viðurkenningarskjalinu stendur að það sé veitt byggingadeild Verkmennaskólans á Akureyri fyrir góðan aðbúnað, gott vinnuumhverfi og góðan undirbúning fyrir nemendur deildarinnar fyrir þátttöku á vinnumarkaði. Frá þessu er greint á heimasíðu VMA.