Í kvöld fer árshátíð Menntaskólans á Akureyri fram í Íþróttahöllinni. Hátíðin er glæsileg og allur undirbúningur hennar er á höndum nemenda sjálfra og tekur nokkrar vikur, þegar allt er talið, að því er fram kemur í tilkynningu. Tugir nemenda vinna að skreytingum og margir hópar nemenda vinna að því að semja og æfa alls kyns skemmtiefni, hljóðfæraleik, dans, söng og leik. Aðrir hópar sjá um að skipuleggja veislusalinn í höllinni, leggja á borð og skreyta, tæknimenn sjá til þess að allir fái notið þess sem í boði verður. Öll þessi störf eru undir regnhlíf stjórnar Hugins, skólafélags MA. Formaður Hugins, inspector scholae er Vilhjálmur Bergmann Bragason.

Rétt er að nefna að í ár er 80 ára afmæli skólafélagsins Hugins og því verður árshátíðin enn stórbrotnari en venjulega. Hátt í þúsund manns, nemendur, kennarar og starfsfólk, munu mæta í hátíðarbúningi í höllina og njóta kvöldsins saman. Veitingahúsið Bautinn sér um matinn, en nemendur sjá um að þjóna til borðs, leika tónlist undir borðum og flytja skemmtidagskrá. Kvöldinu lýkur svo með dansleik en þar leikur hljómsveitin Gus Gus fyrir dansi í aðalsal, en Þuríður formaður og hásetarnir leika fyrir gömlum dönsum á efri hæðinni.

Árshátíð MA er stærsta vímulausa hátíð sem haldin er árlega á Íslandi. Hugtakið vímulaus hátíð þýðir í Menntaskólanum á Akureyri að þátttakendur hvorki neyta áfengis eða annarra vímugjafa á hátíðinni né koma þangað eftir að hafa neytt þeirra annars staðar. Það er fréttnæmt, segir í tilkynningunni, og hlýtur að teljast til góðra frétta. Góðar fréttir af ungu fólki eru ekki síður fréttir en þegar einhver vandræði koma upp. Nemendur MA telja það forréttindi að fá tækifæri til að njóta vímulausrar stórhátíðar þegar eðlilegt er talið að fólk á þessum aldri skemmti sér með öðru móti.

Nemendur VMA tóku þátt í söngvakeppni starfsbrauta framhaldsskóla á Selfossi sl. fimmtudag. Níu lið öttu kappi og er skemmst frá því að segja að framlag Verkmenntaskólans, lagið „Ég er eins og ég er”, bar sigur úr býtum.

Um 20 nemendur fóru létt með það að flytja litskrúðugt og líflegt atriði á sviði og nutu dyggrar aðstoðar annarra nemenda og starfsfólks brautarinnar sem fóru á kostum í stuðningi sínum, segir á www.vma.is

Kynningardagur fyrir foreldra og forráðamenn nýnema í Menntaskólanum á Akureyri verður laugardaginn 20. október. Kynningin verður í Kvosinni á Hólum og í kennslustofum þar og hefst klukkan 14.

Á kynningardeginum verður sagt stuttlega frá skólanum og skólastarfinu, nemendur segja frá félagsstarfinu og því 
fjölbreytilega og þroskandi lífi sem nemendum býðst að taka þátt í utan kennslustunda, og forráðamenn fá færi á að hitta umsjónarkennara barna sinna og ræða við þá og fræðast af þeim.

Í hléi verður hlaðborð með kaffiveitingum í boði nemenda 3. bekkjar, en að lokum verður blásið til aðalfundar FORMA, Foreldrafélags MA.

Samband MA við foreldra og forráðamenn nemenda eykst með ári hverju, ekki síst eftir breytingar á reglum um forræði yfir unglingum. Allir bekkir skólans eiga sér umsjónarkennara og fyrstubekkingar og nemendur annars bekkjar jafnan tvo. Umsjónarkennararnir hafa viðtalstíma, sem auglýstir eru á Vef MA og foreldrum og forráðamönnum, gefst færi á að hitta þá á viðtalstímum eða hafa símasamband, ef ræða þarf einhver hagsmunamál nemendanna.

Nemendavernd í skólanum er mjög mikil. Starfandi er forvarnafulltrúi og tveir náms- og starfsráðgjafar, en á vegum þeirra er meðal annars veitt þjónusta vegna margvíslegra persónulegra mála, sem nemendur eiga við að etja, til dæmis dyslexíu. Nemendaverndin hefur vaxið mjög á undanförnum árum og þjónusta við nemendur þar með aukist.

Menntaskólinn á Akureyri býður öllum foreldrum og forráðamönnum nýnema þetta haustið að koma á kynningardaginn og efla með því samband skólans og forráðamanna nemendanna.

Í gær tóku Árný Helga Reynisdóttir og Margrét Kristín Jónsdóttir á móti Evrópumerkinu, heiðursviðurkenningu fyrir nýbreytni í tungumálakennslu. Merkið er veitt á vegum framkvæmdastjórnar Evrópusambandsins og Menntamálaráðuneytisins og er nú veitt í sjötta sinn hérlendis.

Evrópumerkið, sem veitt er á Evrópskum tungumáladegi 26. september 2007, er skólanum mikil heiðursviðurkenning, en skólinn hlýtur það fyrir framúrskarandi árangur í þróunarverkefni á ferðamálakjörsviði málabrautar, þar sem samtvinnuð eru fjölmörg tungumál, saga, náttúru- og landafræði og byggist á samvinnu kennara ólíkra námsgreina.

Árný Helga, brautarstjóri málabrautar MA, og Margrét Kristín, umsjónarmaður ferðamálakjörsviðsins, tóku við Evrópumerkinu fyrir hönd skólans úr hendi menntamálaráðherra, Þorgerðar Katrínar Gunnarsdóttur, en jafnframt voru við athöfnina kynnt tvö önnur verkefni sem athyglisverð þóttu.

Á myndinni, sem er af vef MA, eru Jón Már Héðinsson skólameistari, Árný Helga Reynisdóttir, Þorvaldur Lúðvík Sigurjónsson forstjóri Saga Capital, sem heimsótti skólann í tilefni tungumáladagsins, og Margrét Kristín Jónsdóttir.

www.ma.is

Verkmenntaskólinn á Akureyri er búinn að bíða mjög lengi eftir að geta boðið upp á nám í bæði matartækni  og kjötiðnaði, sem fór fyrir nokkrum árum til Matvælaskólans í Kópavogi. Nú er skólinn loks kominn með þessar námsleiðir, sem báðar eru kenndar í lotum um helgar. Í kjötiðnaðarnáminu er um að ræða eingöngu bóklegt nám. Verklega námið þeirra er á vinnustöðunum sem eru Norðlenska, Kjarnafæði og Fjallalamb. Gert er ráð fyrir að bóklega hluta beggja námsleiðanna verði lokið á tveim önnum. Kjötiðnaðarnemarnir ljúka sínu námi hver á sinni kjötiðnaðarstöð og skólinn útskrifar þá að loknum verknámstíma þar. Frá þessu er sagt á www.vma.is

Vorannarpróf hófust í MA föstudaginn 24. maí. Síðustu dagar í skólanum báru það með sér að komið væri að lokum þessa skólaárs. Á þriðjudagsmorgun komu nemendur 4. bekkjar, stúdentsefnin, spariklæddir í skólann, en sú hefð hefur ríkt í allmörg ár að þeir beri sig af þeim myndarskap einn síðasta daginn sinn í skólanum. Þá héldu fjórðubekkingar veislu á Sal í Gamla skóla í löngu frímínútum, og buðu kennurum og starfsfólki í þá veislu, og það hefur líka tíðkast í allmörg ár. Sú hefð á reyndar rætur að rekja til þess að nemendur í félagsfræðideild buðu kennurum sínum í kaffi og kökur einhvern síðasta kennsludaginn fyrir vorpróf, segir í frétt á vef Menntaskólans.

Síðasti kennsludagur var svo miðvikudaginn 22. maí. Þá var að vísu ekki kennt lengi, en stúdentsefnin fóru á Sal í Gamla skóla og sungu þar af lyst, en yngri nemendur báru þau svo eitt og eitt út úr skólanum þar sem þeirra beið þrautabraut, sem endaði í svolítilli plastsundlaug, sem dugði til að rennbleyta nokkra. Að því loknu bjuggu stúdentsefni sig til að kveðja kennara, glæsibúin, samkvæmt hefðinni. Það gerðu þau í Kvosinni og fóru síðan ferð á heyvögnum dregnum af dráttarvélum og kvöddu nokkra kennara sem heima voru. Undir kvöld var svo kaffisamsæti í Kvosinni í boði skólafélagsins Hugins.

Alvaran tók svo við og próf standa fram í júní. Fyrsti bekkur lýkur prófum 6. júní en aðrir 7. og 8. nema þeir sem þurfa að taka sjúkra- eða endurtökupróf, segir ennfremur á www.ma.is þaðan sem myndin er fengin.

Tíu nemendur Menntaskólans á Akureyri urðu meðal þeirra tuttugu efstu í þýskuþrautinni, sem fram fór fyrr á önninni. Tveir nemendur MA hljóta að launum árangurs síns að fara til Þýskalands í sumar. Þýskuþrautin fór fram í framhaldsskólunum þann 28. febrúar. Aðrir í hópi tuttugu efstu nemenda eru úr MR, MH og VÍ. Verðlaunaafhending verður í Reykjavík laugardaginn 28. apríl. Öllum þeim sem eru í verðlaunasætum hefur verið sent boðskort á athöfnina. Svala Lind Birnudóttir, sem var í 3. sæti í keppninni, og Arnhildur Hálfdánardóttir, sem varð fjórða, munu báðar fara til dvalar í þýskumælandi landi í sumar. Aðrir hljóta bókagjafir að launum fyrir árangur sinn. Frá þessu er sagt á heimasíðu MA.

Þeir tíu nemendur MA, sem stóðu sig svona vel í keppninni eru:
Svala Lind Birnudóttir
Arnhildur Hálfdánardóttir
Erla Karlsdóttir
Kolfinna Snæbjarnardóttir
Theodóra Rún Baldursdóttir
Harpa Baldursdóttir
Sigurlaug Hanna Hafliðadóttir
Sólrún Barbara Friðriksdóttir
Hermann Þór Hauksson og
Rúnar Sverrisson

Myndin er af síðu MA og var tekin á Skólatorginu þar. Harpa var vant við látin.

VMA sendi fulltrúa á Íslandsmót iðnnema til keppni í trésmíði, málmsuðu, málun og rafvirkjun. Mótið fór fram í Kringlunni í Reykjavík. Stóðu þeir sig ljómandi vel og voru skólanum til sóma, segir í frétt á vef skólans. VMA hlaut flest samanlögð stig í rafvirkjun og höfnuðu fulltrúar skólans, þeir Alexander Björnsson og Árni Friðrik Sigurðsson, í þriðja og fjórða sæti í keppni einstaklinga. Í málmsuðukeppninni tóku þátt fyrir hönd VMA þeir Jakob Valgarð Óðinsson og Eðvarð Þór Helgason sem gerði sér lítið fyrir hlaut fyrsta sætið í logsuðu.

Fulltrúar Verkmenntaskólans í trésmíðinni voru Birkir Árnason og Elvar Rúnarsson auk þess sem Heiðar Halldórsson keppti í húsamálun.

www.vma.is

Nemendur 4. bekkjar í Menntaskólanum á Akureyri vinna verkefni í lífsleikni, sem tengjast því að kanna hvar þeir geti gert gagn og lagt eitthvað af mörkum í samfélaginu. Málaflokkarnir sem nemendur vinna að eru margvíslegir en stærstu verkefnin eru unnin í samvinnu við Barnaheill, Rauða krossinn og Öldrunarheimili Akureyrar, að því er fram kemur á heimasíðu MA.

Síðast talda verkefnið kallast Kynslóðir mætast og er samstarfsverkefni Menntaskólans á Akureyri, Öldrunarheimila Akureyrar, Eyjafjarðarprófastsdæmis, Glerárkirkju og Akureyrarkirkju. Í verkefninu taka þátt um 40 nemendur MA og 40 eldri borgarar. Verkefnið hófst á samverustund á Hlíð fimmtudaginn 15, mars. Þar fengu nemendur kynningu á starfsemi Öldrunarheimila Akureyrar og kjölfar þess hittu þeir félaga sína úr hópi eldri borgara. Boðið var upp á kaffi og með því, flutt tónlist og lesið upp. Umræðuefnin á fundinum voru spennandi, unga fólkið og eldri borgararnir ræddu og kynntu þau mál sem helst brenna á þessum aldurshópum og söfnuðu í hugmyndabanka um það sem vel er get og annað sem betur mætti fara.

Tónlistaratriðin í dagskránni voru margvísleg. Audrey Freyja Clarke söng við undirleik Daníels Starrasonar og Sigurðar Óla Guðmundssonar, sem léku á gítar og síðar bættust í hóp hljóðfæraleikara Jón Björn Vilhjálmsson með harmónikku og Sigurður Helgi Oddsson á píanó, og þessi sveit lék meðal annars undir fjöldasöng. Stjarna dagskrárinnar í augum nemendanna var þó Sigríður Schiöth, sem lét sig ekki muna um það 92 ára gömul að syngja einsöng við píanóundirleik.

Þetta er í annað sinn sem verkefni af þessu tagi er ýtt úr vör, en í fyrra var frumraunin, sem tókst svo vel að ákveðið var að halda þessu áfram, segir á heimasíðunni. Alma Oddgeirsdóttir tók myndina sem fengin er af www.ma.is

Nú á vorönn sitja 29 nemendur á öðru ári á félagsfræðibraut MA valáfangann FÉL 313 í félagsfræði þróunarlanda. Nokkrir góðir gestir hafa komið í heimsókn til nemenda og haldið fróðleg erindi um hina fjölbreytilegustu þætti þróunarmála, að því er fram kemur á heimasíðu Menntaskólans. Í febrúar kom Hilmar Þór Hilmarsson, kennari við HA, og fjallaði um Alþjóðabankann. Nú í mars hafa þau Gestur Hrólfsson, Guðný Björnsdóttir og Hafsteinn Jakobsson frá Rauða krossinum komið í tíma og fjallað um alþjóðastarf Rauða kross Íslands og vinadeildarsamstarf Norðurlandsdeildar RKÍ við Mósambík í Afríku. Fyrir helgina kom svo Kári Fannar Lárusson, nemi í samfélags- og hagþróunarfræðum við HA. Kári sagði nemendum meðal annars frá ferðalögum sínum til Nigaragva, Kína, Tíbet Nepal og Mexíkó og sýndi fjölmargar myndir sem hann hefur tekið á ferðum sínum. Myndir hans frá Nicaragva hafa undanfarið verið til sýnis á ganginum milli Hóla og Gamla skóla og er ein þeirra hér, fengin af vef MA.

Þessum gestum hefur verið vel tekið af nemendum og heimsóknir af þessu tagi eru afar góð viðbót við hefðbundið skólastarf. Búast má við talsverðum heimsóknum stjórnmálamanna á félagsfræðibraut á næsti vikum, en hefð er fyrir slíkum innlitum í aðdraganda kosninga, segir í fréttinni á heimasíðu Menntaskólans á Akureyri, www.ma.is

Samskipti Menntaskólans á Akureyri við skóla í öðrum löndum hafa vaxið á undanförnum árum. Um er að ræða margvísleg samskipti, í sumum tilfellum náms- og kynnisferðir nemenda, í öðrum tilfellum samskiptaverkefni þar sem aðallega er um að ræða skipulagsvinnu kennara með þátttöku nemenda að einhverju leyti og einnig hrein kennaraskipti í takmarkaðan tíma.

Um nokkurra ára skeið hefur Menntaskólinn á Akureyri átt samskipti við skóla í Finnlandi. Finnlandssamskiptin hafa undið utan á sig, að því er fram kemur á heimasíðu Menntaskólans, og í vikunni fór Þorlákur Axel Jónsson kennari í ferð til Oulu í Finnlandi og verður þar fram á sunnudagskvöld að vinna að þróunarverkefni, sem Minerva-áætlun Sókratesar Evrópusambandsins styrkir. Verkefnið heitir: “How to support collaborative learning in various learning contexts” og í því tekur þátt einn skóli í hverju landi: Finnlandi, Ungverjalandi, Englandi, Pólland og Ítalíu auk okkar. Í þessu verkefni er meðal annars fjallað um gildi vinnudagbóka (portfolio) í kennslu og þjálfun kennara í notkun þeirra.

Í vikunni fór fjögurra manna hópur úr Menntaskólanum á Akureyri til Toledo á Spáni og verður í þeim leiðangri fram á sunnudagskvöld. Í þeirri ferð eru kennararnir Lára Þórarinsdóttir og Róbert F. Sigurðsson og nemendurnir Heiða Björg Guðjónsdóttir 3. A og Linda Björk Rúnarsdóttir 3. B. Þau munu taka þátt í áfangastefnu í Evrópusamstarfsverkefni sem COMENIUS styrkir. Verkefnið ber nafnið “Past Into Present: Discovering and Understanding Each Other Through Our History and Culture.” Í því er fjallað meðal annars um sagnfræðitengda ferðaþjónustu, en þátttökulönd í því verkefni auk Íslands eru Portúgal, Spánn, Ítalía, Tékkland, Pólland og Slóvakía. Meðal þess sem gert verður á fundinum er að lagðar verða fram tillögur og hugmyndir að kynningarbæklingum, sem nemendur hafa unnið að undanfarið og nemendurnir sem héðan fara eru einmitt á ferðamálasviði málabrautar og hafa unnið að þessu í því námi sínu, að því er fram kemur á www.ma.is .

Árshátíð nemenda VMA fór mjög vel fram s.l. föstudagskvöld. Mjög margir gæddu sér á kvöldverðinum og nutu skemmtidagskrár þeirrar sem boðið var upp á. Góð þátttaka var einnig meðal kennara en Númi húsvörður var heiðursgestur samkomunnar, að því er fram kemur á heimasíðu Verkmenntaskólans.

Dansleikurinn með hljómsveitinni Í svörtum fötum fór mjög vel fram og var nemendum til mikils sóma, svo og þeim kennurum skólans sem lögðu þar hönd á plóg við eftirlit og gæslu, segir ennfremur.

Hrafnhildur Sigurgeirsdóttir og Ómar Kristinsson fengu sérstakar þakkir fyrir störf við undirbúning og framkvæmd þessa stóra viðburðar sem og allir þeir nemendur sem lögðu hönd á plóg svo þetta mætti takast sem best.

Gunnar Jónsson framkvæmdastjóri KA lauk lofsorði á nemendur og vildi taka fram að „þeir sem nemendur og kennarar sem undirbjuggu hátíðina og gengu frá á eftir stóðu sig með einstakri prýði og var mjög gaman að sjá þann metnað og þá miklu vinnu sem var lögð í árshátíðina. Allur viðskilnaður þeirra við húsið er þeim til mikils sóma.“

Sjá www.vma.is þaðan sem myndin er fengin.

Lið Menntaskólans á Akureyri keppir við lið Verzlunarskóla Íslands í Íþróttahöllinni á Akureyri annað kvöld, föstudagskvöld. Keppnin verður sýnd beint í Sjónvarpinu. Höllin verður opin klukkan 19.30 – 20.00, en þá verður skellt í lás því á því andartaki hefst útsending, að því er fram kemur í frétt á heimasíðu Meenntaskólans.

Þar kemur einnig fram að mikill hugur sé í Menntaskólanemum og þeir muni flykkjast að og styðja lið sitt. Takmarkið sé vissulega að halda hljóðnemanum heima enda fari hann mjög vel í anddyri Hóla. Að sunnan kemur fylking Verzlunarskólanema til að styðja sitt lið, og það má því búast við fjöri og fagnaðarlátum í Höllinni, segir ennfremur í fréttinni. Nýja Gettu betur-liðið í MA er skipað þeim Örnu Hjörleifsdóttur, Svölu Lind Birnudóttur og Konráð Guðjónssyni. Myndina af þeim, sem fengin er af MA-vefnum, tók Vilhelm Ernir Ívarsson.

Söngkeppni VMA fór fram á fimmtudagskvödið sl. sigurvegari kvöldsins var Eyþór Ingi Gunnlaugsson með lagið Perfect Strangers eftir Deep Purple. Í öðru sæti voru Katla og Kolla, þær sungu lagið The Blowers Daughter með Damien Rice og Í þriðja sæti var Stefán Þór, hann sat einn á sviðinu með gítarinn sinn og söng lagið Plush með Stone Temple Pilots.
Símakosninguna unnu Pálmi og Höskuldur, þeir sungu lagið Hleyptu okkur heim, betur þekkt sem Another Brick in the Wall með Pink Floyd.
Allt gekk mjög vel fyrir sig og var keppnin glæsileg í alla staði. Þetta kemur fram á heimasíðu nemendafélags VMA http://www.thorduna.is
Ljósmyndari akureyri.net var á staðnum og myndir úr keppninni verða settar hér inná síðuna á næstu dögum.