Menntaskólanum á Akureyri var slitið í 129. sinn þann 17. júní. Jón Már Héðinsson skólameistari brautskráði 158 stúdenta. Fulltrúar afmælisstúdenta fluttu ávörp. Elstur þeirra var Ármann Snævarr fyrrum háskólarektor, en 70 ár eru liðin frá því að hann og bekkjarfélagar hans luku stúdentsprófi. Fulltrúi 60 ára stúdenta var Einar Pálsson, en Tryggvi Gíslason flutti kveðju fyrir hönd 50 ára stúdenta.

Nánar á www.ma.is

Saga Menntaskólans á Akureyri, fjórða bindi, er að koma út þessa dagana. Föstudaginn 13. júní klukkan 10.30 verða opnaðir fyrstu kassarnir af þessu nýja bindi og fyrstu eintökin afhent.

Saga MA kom út í þremur bindum í tilefni að 100 ára afmæli skólans árið 1980, þegar eitt hundrað ár voru liðin frá endurvakningu hins norðlenska skóla á Möðruvöllum í Hörgárdal 1880 og fimmtíu ár voru liðin frá því skólinn fékk
leyfi til að brautskrá stúdenta 1930.

Fjórða bindið spannar söguna frá því um 1980 fram um 2005, eða næsta aldarfjórðunginn eftir fyrstu bindin þrjú.

Ritstjóri þessa bindis Sögu MA er Jón Hjaltason en ritnefnd ásamt honum skipuðu Jón Már Héðinsson skólameistari, Sigríður Steinbjörnsdóttir, Úlfar Hauksson og Valdimar Gunnarsson. Myndaritstjórn annaðist Sverrir Páll Erlendsson og Lára Ólafsdóttir gerði skrár. Tryggvi Gíslason fyrrverandi skólameistari safnaði efni til sögunnar og ritaði drjúgan hluta hennar.

Útkomu bókarinnar hefur seinkað nokkuð því vinnsa hennar tók heldur lengri tíma en til stóð. Margir hafa þegar greitt fyrir bókina og í bókarlok er Tabula gratulatoria með nöfnum áskrifenda. Bókin verður til sölu í tengslum við Skólahátíð MA eftir helgina.

Menntaskólanum á Akureyri verður slitið við hátíðlega athöfn þriðjudaginn 17. júní. Athöfnin verður í Íþróttahöllinni á Akureyri og hefst klukkan 10.00. Húsið verður opnað gestum klukkan 9.00.

Að þessu sinni brautskráir skólameistari, Jón Már Héðinsson, 159 stúdenta, en þeir hafa aldrei í sögu skólans verið fleiri.
Við skólaslit munu fulltrúar nokkurra afmælisárganga flytja skólanum ávörp. Í hópi þeirra er Ármann Snævarr, fyrrverandi háskólarektor, en sjötíu ár eru frá því hann lauk stúdentsprófi frá skólanum.

Skólahátíð Menntaskólans á Akureyri er gríðarlega fjölmenn hátíð sem setur mikinn svip á bæjarlífið á Akureyri dagana í kringum 17. júní ár hvert. Til bæjarins koma gamlir nemendur skólans og fagna tímamótum sem standa á heilum og hálfum tug ára frá því þeir luku stúdentsprófi. MA-hátíðin er mesti samfagnaður afmælisárganganna og er haldinn að kvöldi 16. júní í Höllinni, en dagana á undan eru flestir hóparnir í alls kyns kynnisferðum og fögnuði í bænum og nágrenni hans. Gestir á MA-hátíð eru jafnan á bilinu 700-900.

Við skólaslitaathöfnina að morgni 17. júní eru jafnan um 1000 manns, ættingjar og vinir nýstúdenta og aðrir hollvinir skólans. Að kvöldi 17. júní er hátíðarsamkoma nýstúdenta í Höllinni þar sem saman koma um 1000 manns, nýstúdentar, fjölskyldur þeirra og vinir og kennarar og starfsfólk skólans. Bæði þar og á MA-hátíðinni kvöldið áður mun hljómsveitin Í svörtum fötum leika fyrir dansi.
Að lokinni brautskráningu er hefð að teknar séu hópmyndir af nýstúdentum í trjálundi norðan við Hóla. Klukkan 15-17 er svo Opið hús í Menntaskólanum, þar sem boðið er upp á léttar veitingar. Þar eru sýnd ýmis verk nemenda, bæði námsverkefni og myndlistarverkefni. Þá er á Suðurvistum í Gamla skóla opin sýning gamalla muna og kennslutækja. Fjölmargir koma í heimsókn í skólann að þessu tilefni, gamlir nemendur koma og skoða fornar slóðir og gleðjast í minningum liðinnar tíðar og nýstúdentar koma með fjölskyldum sínum um leið og þeir anda að sér í síðasta sinn þeim ilmi sem þeir hafa í vitum alla tíð síðan og dregur þá heim á tímamótum, eins og dæmin sanna.

Verkmenntaskólinn á Akureyri útskrifaði 144 nemendur frá skólanum á laugardaginn var. Í ræðu sinni kom Hjalti Jón Sveinsson skólameistari meðal annars inn á að þó skólinn væri nú opinberlega fullbyggður, þá væri ljóst að aðsókn að honum væri það mikil að enn þurfi að byggja nýjar álmur og nú stendur til að byggja sérstaklega yfir starfsbrautina.  Hjalti Jón talaði einnig um ný framhaldsskólalög og nýja, litla framhaldsskóla hér og þar um landið. Ræðu Hjalta Jóns má lesa á síðu Verkmenntaskólans, www.vma.is

Verðlaun voru afhent á Íslandsmóti iðngreina sem lauk í gömlu Laugardalshöllinni síðdegis í dag, laugardag. Sigurvegari í málmsuðu var Jevgenis Gujls, í trésmíði Ásgeir Arnór Stefánsson frá Iðnskólanum í Reykjavík, í pípulögn Kristófer Þorgeirsson frá Iðnskólanum í Hafnarfirði, í bifvélavirkjun Birkir Sigursveinsson, í bílamálun Ásbjörn Matti Birgisson, í bifreiðasmíði Reynir Harðarson, í múrverki Kristþór Ragnarsson frá Iðnskólanum í Reykjavík, í málaraiðn Gunnar Guðjónsson frá Iðnskólanum í Reykjavík, í dúklagningum Gústaf Benedikt Grönvold frá Iðnskólanum í Reykjavík, í hársnyrtingu Heiðrún Pálsdóttir frá Fjölbrautaskóla Suðurnesja, í grafískri miðlun Jóhann Geir Úlfarsson, nemi hjá Expo, í ljósmyndun Arnar Már H. Guðmundsson frá Iðnskólanum í Reykjavík og í rafvirkjun Gunnar Þórbergur Harðarson frá Iðnskólanum í Reykjavík.              

Verðlaunin afhenti Árni Már Heimisson, sem var Íslandsmeistari og Norðurlandameistari í pípulögnum 2007 og tók þátt í World Skills 2007, Heimsmóti iðngreina, í Japan fyrir Íslands hönd, fyrstur Íslendinga til að taka þátt í því móti.

Markmið Íslandsmóts iðngreina, sem Iðnmennt stendur fyrir, er að vekja athygli á iðn- og starfsmenntun, kynna almenningi iðngreinar – ekki síst ungu fólki – og vekja athygli á þeim tækifærum sem felast í námi og starfi í iðngreinum. Alls voru á mótinu fulltrúar um 20 iðn- og starfsgreina, en auk greinanna sem keppt var í voru kynningar á nokkrum greinum, auk þess sem iðn- og verkmenntaskólar landsins og Samband íslenskra framhaldsskólanema kynntu starfsemi sína. Íslandsmót iðngreina er undanfari og forkeppni einstakra keppnisgreina fyrir þátttöku í Euro Skills og World Skills sem er alþjóðleg keppni iðngreina. Meira var lagt í keppnisgreinarnar nú en áður og viðfangsefnin í flestum tilvikum veigameiri og meira krefjandi. Markmiðið með breyttu fyrirkomulagi er m.a. að auka þátttöku atvinnulífsins í mótinu og efla tengslin milli þess og iðnskólanna.

Líkt og undanfarin ár sá Iðnmennt um almennan undirbúning og skipulagningu mótsins en að þessu sinni sáu AP almannatengsl um kynningarmál og framkvæmd viðburðarins. Að skipulagningu keppnisgreina komu Félag hársnyrtisveina, Félag íslenskra snyrtifræðinga, Félag pípulagningameistara, Félag vélstjóra og málmtæknimanna, Rafiðnaðarsamband Íslands og IÐAN – fræðslusetur. Aðalbakhjarlar mótsins voru Samtök iðnaðarins og menntamálaráðuneytið. Mótið í ár var haldið í tengslum við sýninguna Verk og vit 2008.

Einhver mesta tilbreyting í starfi Menntaskólans á Akureyri er Ratatoskur, opnir dagar. Ratatoskur verður á mánudag og þriðjudag. Kennt er samkvæmt stundaskrá fyrstu tvo tímana báða dagana en að því loknu er stundaskránni varpað fyrir róða. Þá standa nemendum til boða fjölmörg námskeið og fyrirlestrar. Þeir þurfa að safna stigum í þessari dagskrá og skila lágmarksfjölda eininga. Enginn ætti að vera í vandræðum með að skila yfirfullu korti því tækifærin eru afar mörg, eins og sjá má ef dagskráin er skoðuð á vef nemenda, muninn.is.

Það er stjórn Hugins, skólafélags MA, sem skipuleggur og undirbýr þessa viðamiklu dagskrá.

Frétt af www.ma.is

Í löngu frímínútum í gær komu góðir gestir og færðu Menntaskólanum á Akureyri hina miklu og fögru Borgundarhólmsklukku úr búi Sigurðar skólameistara. Sigurður Guðmundsson var skólameistari á árunum 1921-1948, en veturinn 1927-28 gáfu nemendur og kennarar skólans honum þessa klukku í tilefni af fimmtugsafmæli hans. Um þetta leyti var einnig farið að brautskrá stúdenta frá skólanum. Klukkan var á heimili þeirra Sigurðar skólameistara og Halldóru Ólafsdóttur, en kom við fráfall þeirra í hlut sonar þeirra, Guðmundar Ingva Sigurðssonar og konu hans Kristínar Þorbjarnardóttur. Þau færa skólanum klukkuna að gjöf til minningar um Sigurð og Halldóru, og jafnframt silfurskjöld með upphleyptri mynd af skólanum, sem nemendur skólans gáfu Sigurði skólameistara sjötugum síðasta starfsár hans, veturinn 1947-1948, skrifar svp á heimasíðu MA.

Þar segir ennfremur: „Börn Guðmundar Ingva og Kristínar, Þórunn, Þórður Ingvi og Sigurður afhentu gripina góðu og með þeim í hópi var Sigurður Ólafsson kennari, en þau eru bræðrabörn. Alnafni Sigurðar skólameistara, Sigurður Guðmundsson landlæknir hafði orð fyrir hópnum og vonaðist til að þessi gamla en góða klukka flytti skólanum góðan anda. Jón Már skólameistari þakkaði góðar gjafir og bað nemendur að finna klukkunni stað þar sem hún myndi njóta sín best.“

www.ma.is

Miðvikudaginn 27. febrúar kl. 11-15 kynna háskólar landsins námsframboð sitt fyrir næsta skólaár. Kynningin fer fram í VMA. Á staðnum verða Háskóli Íslands og Kennaraháskóli Íslands, Háskólinn á Akureyri, Háskólinn á Bifröst, Háskólinn á Hólum, Háskólinn í Reykjavík, Landbúnaðarháskóli Íslands og Listaháskóli Íslands, eða öllu heldur fulltrúar þessara skóla.

Gott tækifæri gefst þarna fyrir áhugasama til að skoða yfir 500 námsleiðir sem háskólarnir bjóða upp á.

Í dag færði Húsasmiðjan Verkmenntaskólanum á Akureyri hæðarmæli/ laser af fullkomnustu gerð að gjöf. Húsasmiðjan og Verkmenntaskólinn á Akureyri hafa í mörg ár átt gott og farsælt samstarf. Nemendur skólans hafa komið reglulega í heimsóknir til Húsasmiðjunnar og fengið tilsögn og upplýsingar um það sem Húsasmiðjan hefur upp á að bjóða. Þá hefur Húsasmiðjan áður fært Verkmenntaskólanum gjafir sem aðallega hafa verið verkfæri sem nemendur nota við iðnnám sitt, að því er fram kemur í fréttatilkynningu.

Þorsteinn E. Arnórsson þjónustufulltrúi hjá Einingu-Iðju er um þessar mundir að kynna réttindi og skyldur á vinnumarkaði fyrir yngstu nemendur Verkmenntaskólans á Akureyri. Þorsteinn mun fara í 13 heimsóknir í skólann, en hver heimsókn stendur yfir í tvær kennslustundir. Þetta er sjötta árið í röð sem félagið er með slíka kynningu í skólanum og segir Þorsteinn að starfsmenn Einingar-Iðju hafi tekið eftir mikilli breytingu til batnaðar hvað unga fólkið er orðið virkara hvað þessi mál snertir. “Það veit nú betur hvar það á að spyrjast fyrir um réttindi sín og eins vita þau mun betur en áður hverju þau eiga rétt á. Þegar krakkarnir fara út á vinnumarkaðinn þá skiptir miklu máli að þekkja og vita um réttindi sín.” Frá þessu er greint á vef Einingar-Iðju, þaðan sem myndin er fengin.

Þorsteinn segir að í þessum heimsóknum sé farið yfir gildi þess að vera í stéttarfélögum og eins er farið yfir almenn réttindi og skyldur á vinnumarkaði. “Undirtektir unglinganna eru mjög góðar og skapast oft góðar umræður um þessi mál,” segir Þorsteinn og bætir við að þessi fræðsla skipti heilmiklu máli. “

www.ein.is

Í kvöld fer árshátíð Menntaskólans á Akureyri fram í Íþróttahöllinni. Hátíðin er glæsileg og allur undirbúningur hennar er á höndum nemenda sjálfra og tekur nokkrar vikur, þegar allt er talið, að því er fram kemur í tilkynningu. Tugir nemenda vinna að skreytingum og margir hópar nemenda vinna að því að semja og æfa alls kyns skemmtiefni, hljóðfæraleik, dans, söng og leik. Aðrir hópar sjá um að skipuleggja veislusalinn í höllinni, leggja á borð og skreyta, tæknimenn sjá til þess að allir fái notið þess sem í boði verður. Öll þessi störf eru undir regnhlíf stjórnar Hugins, skólafélags MA. Formaður Hugins, inspector scholae er Vilhjálmur Bergmann Bragason.

Rétt er að nefna að í ár er 80 ára afmæli skólafélagsins Hugins og því verður árshátíðin enn stórbrotnari en venjulega. Hátt í þúsund manns, nemendur, kennarar og starfsfólk, munu mæta í hátíðarbúningi í höllina og njóta kvöldsins saman. Veitingahúsið Bautinn sér um matinn, en nemendur sjá um að þjóna til borðs, leika tónlist undir borðum og flytja skemmtidagskrá. Kvöldinu lýkur svo með dansleik en þar leikur hljómsveitin Gus Gus fyrir dansi í aðalsal, en Þuríður formaður og hásetarnir leika fyrir gömlum dönsum á efri hæðinni.

Árshátíð MA er stærsta vímulausa hátíð sem haldin er árlega á Íslandi. Hugtakið vímulaus hátíð þýðir í Menntaskólanum á Akureyri að þátttakendur hvorki neyta áfengis eða annarra vímugjafa á hátíðinni né koma þangað eftir að hafa neytt þeirra annars staðar. Það er fréttnæmt, segir í tilkynningunni, og hlýtur að teljast til góðra frétta. Góðar fréttir af ungu fólki eru ekki síður fréttir en þegar einhver vandræði koma upp. Nemendur MA telja það forréttindi að fá tækifæri til að njóta vímulausrar stórhátíðar þegar eðlilegt er talið að fólk á þessum aldri skemmti sér með öðru móti.

Nemendur VMA tóku þátt í söngvakeppni starfsbrauta framhaldsskóla á Selfossi sl. fimmtudag. Níu lið öttu kappi og er skemmst frá því að segja að framlag Verkmenntaskólans, lagið „Ég er eins og ég er”, bar sigur úr býtum.

Um 20 nemendur fóru létt með það að flytja litskrúðugt og líflegt atriði á sviði og nutu dyggrar aðstoðar annarra nemenda og starfsfólks brautarinnar sem fóru á kostum í stuðningi sínum, segir á www.vma.is