Í gærkvöld lauk þriðja krullumóti vetrarins hjá Krulludeild Skautafélags Akureyrar. Mótið sem nú var að ljúka heitir Gimli Cup og er þar keppt um veglegan bikar sem gefinn var af Vestur-Íslendingunum Alma og Ray Sigurdsson í Gimli í Manitóba í tilefni af opnun Skautahallarinnar árið 2000. Fyrst var keppt um bikarinn 2001 og er mótið nú því það níunda í röðinni.

Átta lið úr röðum Krulludeildar SA tóku þátt í mótinu nú og voru það Skytturnar sem stóðu uppi sem sigurvegarar, unnu sex leiki af sjö. Í öðru sæti urðu Mammútar, unnu fimm leiki, og í þriðja sæti Garpar með fjóra vinninga. Þetta er annað mótið sem Skytturnar vinna á þessu keppnistímabili en fyrr í haust varð liðið Akureyrarmeistari í krullu.

Nánar »

Sex leikmenn frá KA hafa verið valdir í U19 landslið Íslands í blaki, sem leikur þessa dagana á NEVZA mótinu í Danmörku. Í karlaliðið voru valdir þeir Árni Björnsson, Daniel Sveinsson, Jóhann Eiríksson og Sigurbjörn Friðgeirsson. Í kvennaliðið voru valdar systurnar Guðrún Margrét Jónsdóttir og Auður Anna Jónsdóttir.

Flestir leikmanna KA hafa áður spilað með U17 eða U19 landsliðum en þó munu Daníel Sveinsson og Sigurbjörn Friðgeirsson spila sína fyrstu landsleiki á mótinu í Danmörku. Þjálfarar liðanna eru reyndir og auk þess að þjálfa U19 landsliðin eru þeir báðir A landsliðsþjálfararnir Íslands, Michael Overhage fyrir karlana og Apostol Apostolov fyrir konurnar.

Átta norðlenskar skáksveitir kepptu á Íslandsmóti skákfélaga sem fór fram í Reykjavík um helgina. Þar voru tefldar fjórar umferðir af sjö. Í fréttum Ríkisútvarpsins á Akureyri í gær kom fram að A-sveit Skákfélags Akureyrar keppnir nú í fyrsta sinn í 2. deild, en sveitin féll úr fyrstu deildinni í fyrra. Sveitin er efst í deildinni , með 18,5 vinninga. B-sveit félagsins er í þriðja sæti í 3ju deild, með 14 vinninga. Skákfélagið Goðinn úr Þingeyjarsýslu er í öðru sæti í 4. deild með 17 vinninga. Skákfélag Siglufjarðar er í 11. sæti með 14 vinninga.

Næstkomandi miðvikudagskvöld verður haldinn aðalfundur Handboltafélags Akureyrar og strax í kjölfarið hefst árleg leikmannakynning.

Aðalfundurinn hefst klukkan 20:00 og fer fram í sal veitingahússins Greifans á efri hæð. Á dagskrá eru venjuleg aðalfundarstörf. Klukkan 21:00 hefst síðan á sama stað hin árlega leikmannakynning. Allir stuðningsmenn Akureyrar Handboltafélags hjartanlega velkomnir. Í boði verða léttar veitingar.

Þórey Edda leiðbeinir upprennandi frjálsíþróttafólki á Laugum í dag. Mynd: Ingólfur Sigfússon

Frjálsíþróttaskóli UMFÍ starfar þessa dagana á Laugum í Reykjadal. Ungmennin í skólanum fengu óvænta heimsókn í dag þegar Þórey Edda Elísdóttir frjálsíþróttakona mætti á svæðið. Hún var síðan með þeim á seinni æfingu dagsins þar sem farið var í stangarstökk, sem er hennar aðalgrein eins og flestir vita.

Þórey Edda var ánægð með stangarstökksaðstöðuna á Laugum en stangarstökksbúnaðurinn var vígður á Sumarleikum HSÞ árið 2007. Það voru Sparisjóður Suður Þingeyinga og þrjú aðildarfélög HSÞ sem gáfu búnaðinn. Mikla rigningu gerði meðan á æfingunni stóð en létu hinir upprennandi stangarstökkvarar það ekki á sig fá og tóku við leiðbeiningum frá íþróttastjörnunni af miklum áhuga.

Félagsmenn Fjarðar fögnuðu sigrinum ákaft. Myndin er af heimasíðu félagsins.

Íþróttafélagið Fjörður úr Hafnarfirði sigraði nokkuð örugglega í bikarkeppni Íþróttasambands fatlaðra sem haldin var í Sundlaug Akureyrar á laugardaginn. Mótshaldið var í umsjón Óðins og gekk vel í alla staði. Um 60 keppendur frá fjórum félögum voru skráðir til leiks. Matur og gisting voru í boði í Brekkuskóla og nýttu flestir sér það, og skapaðist skemmtileg stemning í skólanum. Í tengslum við mótið voru einnig opnar æfingabúðir undir stjórn landsliðsþjálfara ÍF.

Fjörður var handhafi bikarsins frá því í fyrra og ætlaði greinilega ekki að láta hann af hendi. Fjörður hlaut samtals 13.122 stig og Íþróttafélagið Ösp hlaut 8.745 stig og náði 2. sætinu örugglega. Baráttan var harðari um bronsið og að lokum munaði aðeins 60 stigum á Íþróttafélagi Fatlaðra í Reykjavík, sem hlaut 5.768 stig, og Sundfélaginu Óðni með 5.708 stig.

Jón Heiðar Jónsson, þjálfari hjá Óðni sagist vera sáttur eftir helgina en þetta var í fyrsta sinn sem Óðinn tók þátt í bikarkeppninni. „Við vorum að keyra þetta mikið á óvönum sundmönnum og var of mikið um ógildingar sem við þurfum að laga. En við stefnum ótrauð á verðlaunasæti að ári,“ sagði Jón Heiðar.

Þetta var í fyrsta skipti sem mótið er haldið utan höfuðborgarsvæðisins. „Ég hef ekki heyrt annað en ánægjuraddir eftir helgina enda lögðum við hjá Óðni metnað okkar í að halda mót sem sómi væri að,“ sagði Ása Birgisdóttir, formaður Óðins.

Hjón urðu í fyrsta sæti en mæðgur í öðru sæti. Mynd/ÖHÖ

Fyrsta umferð Bleika Toppbikarsins var haldin á Jaðarsvelli við Akureyri í gærkvöldi og var spilað í blíðskaparveðri og sól. Fyrirkomulagið var Texas Scramble punktakeppni með forgjöf og fékk sigurliðið þátttökurétt á lokamótinu sem haldið verður í Borgarnesi síðar í sumar. Hjónin Fylkir Þór Guðmundsson og Matthea Sigurðardóttir urðu hlutskörpust að þessu sinni en þau spiluðu frábært golf og fengu 46 punkta. Í öðru sæti urðu mæðgurnar Guðlaug María  og Petrea Jónasdóttir með 43 punkta. Í þriðja sæti voru Heimir Örn Árnason og Hjalti Þór Pálmason með 41 punkt og í fjórða og síðasta verðlaunasætinu voru Árný Lilja og Rafn Ingi með 39 punkta.

Bleiki Toppbikarinn er fjáröflunarverkefni Krabbameinsfélagsins og Vífilfells í samvinnu við GSÍ. Allur ágóði af verkefninu verður nýttur til eflingar leitarstarfs á vegum Krabbameinsfélagsins.

Í ár var kynnt sú nýjung að öll lið fengu eina bleika kúlu og áttu að slá til skiptis og keppt var um hver kæmi kúlunni lengst án þess að týna henni. Sigurvegarar í þessari skemmtilegu keppni urðu þau sömu og unnu mótið en það voru þau Fylkir Þór Guðmundsson og Matthea Sigurðardóttir.

Nánar »

Innan Óðins æfa bæði fatlaðir og ófatlaðir sundmenn. Myndin er af heimasíðu félagsins.

Nú um helgina heldur Sundfélagið Óðinn á Akureyri Bikarkeppni ÍF í sundi í samstarfi við Íþróttasamband fatlaðra. Þetta er í fyrsta sinn sem mótið er haldið utan höfuðborgarsvæðisins og jafnframt í fyrsta sinn sem Óðinn heldur mót á landsvísu fyrir fatlaða sundmenn.

Óðinn hefur þá sérstöðu meðal íþróttafélaga að innan raða félagsins æfa og keppa bæði fatlaðir og ófatlaðir.Á mótið eru skráðir rúmlega 40 keppendur frá 4 félögum. Bikarkeppnin sjálf er á laugardaginn og hefst keppni kl. 11 í Sundlaug Akureyrar. Þá verða einnig opnar æfingabúðir í tengslum við mótið á föstudag og sunnudag í Sundlaug Akureyrar undir stjórn landsliðsþjálfara Íþróttasambands fatlaðra.