Akureyri.net » Stjórnmál

Vaðlaheiðargöng standa ekki undir sér að mati meirihluta umhverfis- og samgöngunefndar

Páll Jóhannesson — Thu, 02 Feb 2012 09:09:24 +0000

Að mati Umhverfis- og samgöngunefndar standa Vaðlaheiðargöng ekki undir sér samkvæmt þeim gögnum sem yfir liggja um fyrirhugaða framkvæmd. Að mati nefndarinnar eru mörg verkefni brýnni og leggur nefndin til að göngin fari á samgönguáætlun og bygging gangnanna séu of áhættusöm fyrir skattgreiðendur og hið opinbera. Guðfríður Lilja Grétarsdóttir, Ólína Þorvarðardóttir, Mörður Árnason, Ásmundur Einar Daðason og Atli Gíslason voru henni sammála, auk Þórs Saari, sem er áheyrnarfulltrúi í nefndinni. Á móti voru Þuríður Backman, Árni Johnsen og Róbert Marshall.
Sigmundur Ernir Rúnarsson þingmaður Samfylkingarinnar í norð/austur kjördæmi segir að þessa afstöðu nefndarinnar komi sér ekki á óvart, hann hafi vitað af henni. Hann segir Fjármálaráðherra vissan í málinu og það verði lagt fyrir þing þar sem þá reyni á þingmeirihluta, sem Sigmundur telur nægan, en best væri að hann væri sem sterkastur.

Ekkert nýtt hefur komið fram í málinu sem gefur tilefni til afturköllun

Páll Jóhannesson — Tue, 31 Jan 2012 14:38:05 +0000

Almennur félagsfundur Samfylkingarinnar á Akureyri, haldinn 30. janúar 2012, leggst gegn þingsályktunartillögu Bjarna Benediktssonar um afturköllun ákæru á hendur Geir H. Haarde. . Ekkert nýtt hefur komið fram í málinu sem gefur tilefni til afturkölluna og því hvetur fundurinn þingmenn flokksins til að greiða atkvæði gegn henni.Félagsfundur hvetur einnig þá þingmenn Samfylkingarinnar sem sátu í ríkisstjórn Geirs H. Haarde að sýna þá dómgreind og siðferðisþrek að taka ekki þátt í meðferð þingályktunartillögunnar heldur kalla inn varamenn sína.

Almennur félagsfundur Samfylkingarinnar á Akureyri, haldinn 30. janúar 2012, gerir þá kröfu til þingmanna flokksins úr kjördæminu að þeir sjái til þess að sæti þeirra séu ávallt skipuð á þingi þegar þeir eru fjarverandi skv. reglum Alþingis. Sérstaklega er þetta mikilvægt þegar sýnt er að stórpólítískt málefni verða til afgreiðslu eins og gerðist í síðustu viku.

Almennur félagsfundur Samfylkingarinnar á Akureyri, haldinn 30. janúar 2012, áréttar mikilvægi þess að þingmenn flokksins vinni þétt saman að framgangi þeirra verkefna sem samið var um í stjórnarsáttmálanum svo sem endurskoðun stjórnarskráarinnar, endurskoðun fiskveiðistjórnunarkerfisins og aðildarumsókn að ESB.

Ríkisstjórnin hefur náð umtalsverðum árangri við endurrreisn samfélagsins eftir það efnahagslega hrun sem varð hér haustið 2008. Félagsfundurinn hvetur þingmenn kjördæmisins til að standa þétt að baki ríkisstjórninni, bæði í orði og verki.

Þingmenn Samfylkingarinnar mæta á fund í kvöld um landsdómsmálið

Páll Jóhannesson — Mon, 30 Jan 2012 15:54:34 +0000

Í kvöld verður haldinn félagsfundur í Samfylkingarfélaginu á Akureyri og þar verður landsdómsmálið til umræðu og má eflaust búast við heitum umræðum. Fundurinn er haldinn í kjölfar þess að 13 félagar í Akureyrarfélaginu sendu frá sér yfirlýsingu í liðinni viku þar sem þeir hörmuðu vinnubrögð þingmanna flokksins í málinu þar sem þeir bar ekki gæfa til að standa saman. Þingmenni Samfylkingarinnar í norðaustur kjördæminu þeir Kristján L. Möller, Sigmundur Ernir Rúnarsson og Jónína Rós Guðmundsdóttir mæta til fundarins. Sigmundur Ernir Rúnarsson sagði að vissulega mætti búast við einhverjum gæti orðið heitt í hamsi, en ég mun tala fyrir mína afstöðu sem ákærandi í þessu máli. Fundurinn verður haldinn í Lárusarhúsi og hefst kl. 20

Samfylkingin á Akureyri fundar um landsdómsmálið

Páll Jóhannesson — Thu, 26 Jan 2012 13:21:51 +0000

Samfylkingin á Akureyri boðar til almenns félagsfundar mánudaginn 30. janúar kl. 20 í húsnæði félagsins, Lárusarhúsi v/Eiðsvallagötu 18.
Aðalumræðuefnið verður landsdómsmálið og til fundarins koma þingmenn Samfylkingarinnar í kjördæminu; Kristján L. Möller, Sigmundur Ernir Rúnarsson og Jónína Rós Guðmundsdóttir. Sjá nánar á www.xsakureyri.isFundurinn var áður boðaður 2. febrúar en honum hefur nú verið flýtt.
Samkvæmt 10. gr. reglna um fundarsköp félagsins skulu tillögur og ályktanir hafa borist stjórn a.m.k. 1 sólarhring fyrir boðaðan fund.
Stjórn Samfylkingarinnar á Akureyri

Félagar úr Samfylkingunni á Akureyri harma vinnubrögð þingmanna flokksins

Páll Jóhannesson — Tue, 24 Jan 2012 10:44:16 +0000

Eftirfarandi félagar Samfylkingarinnar á Akureyri harma að þingmönnum flokksins bar ekki gæfa til að standa saman um að taka tillögu Sjálfstæðisflokksins um hið svonefnda Landsdómsmál af dagskrá þingsins enda Alþingi búið að afgreiða málið til dómstóla.Undirritaðir lýsa ennfremur furðu sinni á að þingmenn okkar í kjördæminu sáu enga ástæðu í þessu viðkvæma máli til að ræða afstöðu sína við stuðningsmenn flokksins rétt eins og hún sé þeirra einkamál. Opin og gagnsæ umræða er undirstaða þess að flokknum takist að ná því markmiði að skapa lýðræðislegra þjóðfélag með opinni og skapandi umræðu.
Ragnar Sverrisson
Guðný Hrund Karlsdóttir
Tryggvi Gunnarsson
Hallur Heimisson
Unnar Jónsson
Jóhann Jónsson
Logi Már Einarsson
Pétur Maack Þorsteinsson
Friðbjörg Jóhanna Sigurjónsdóttir
Jón Ingi Cæsarsson
Valdís Anna Jónsdóttir
Sædís Gunnarsdóttir
Hermann J. Tómasson

Ályktun frá stjórnarfundi og opnum félagsfundi svæðisfélags VG á Akureyri

Páll Jóhannesson — Fri, 20 Jan 2012 00:18:42 +0000

Stjórn svæðisfélags VG á Akureyri og opinn félagafundur svæðisfélagsins skora á þingmenn VG að vera samkvæmir sjálfum sér og taka ekki þátt í því að misbeita lýðræðinu með því að endurtaka atkvæðagreiðslur þar til breytt niðurstaða fæst. Landsdómur er eina tæki stjórnsýslunnar sem þessi þjóð getur beitt til að gera upp ábyrgð ráðherra gagnvart henni og á meðan aðrar leiðir og betri hafa ekki verið tryggðar þá er það skylda þingmanna VG að standa með þjóðinni og stjórnarskránni.

Sveitarstjórn Eyjafjarðarsveitar tilbúin að auka hlutafé sitt í Vaðlaheiðargöngum

Páll Jóhannesson — Wed, 18 Jan 2012 16:54:53 +0000

Í dag er sagt frá því á vef Eyjafjarðarsveitar www.eyjafjardarsveit.is að sveitastjórn Eyjafjarðarsveitar hafi lýst yfir vilja til að auka hlutafé í Vaðlaheiðargöngum allt að tvöföldun frá því sem áður var lofað. Þetta vilja menn gera til að leggja sitt af mörkum við að koma þessari framkvæmd sem fyrst í framkvæmd. Jafnfram skorar sveitarstjórn Eyjafjarðarsveitar á ríkisstjórn Íslands að samþykkja ríkisábyrgð á fjármögnun ganganna svo hægt sé að hefja framkvæmdir sem allra fyrst. Þar er m.a. bent á þá staðreynd að ríkissjóður fái u.þ.b. 3 – 3,5 milljarða í beinar tekjur af framkvæmdinni á byggingartíma ganganna fari svo að í þessa framkvæmd verði ráðist. Ennfremur bendir sveitarstjórn á það að mjög litlu fé sé varið til vegamála á landsbyggðinni þrátt fyrir síauknar álögur á bifreiðaeigendur.

Öll framboð fá fulltrúa í nefndir bæjarins

Páll Jóhannesson — Tue, 17 Jan 2012 17:54:19 +0000

Á fundi bæjarstjórnar í dag munu flest framboð tilnefna áheyrnarfulltrúa í nefndum bæjarins sem þau hafa ekki aðalmann í. Þetta er gert vegna breytinga á sveitarstjórnarlögum sem tóku gildi 1. janúar s.l. Vegna þeirrar staðreyndar að fimm framboð fengu einn bæjarfulltrúa hvert þá hafa framboð ekki haft fulltrúa í öllum nefndum. Með þessum breytingum þá hafa framboð fulltrúa í öllum nefndum. Samkvæmt ákvörðun bæjarráðs þá skulu áheyrnarfulltrúar fá sömu greiðslu og aðrir áheyrnarfulltrúar sem eiga rétt í nefndum bæjarins. Samkvæmt heimildum Akureyri.net er kostnaður vegna þessara breytinga áætlaður um þrjár milljónir króna.

Auglýsir eftir atvinnustefnu ríkisstjórnarinnar

Jóhann Jónsson — Thu, 15 Dec 2011 11:42:20 +0000

Magnús Þór Ásgeirsson fráfarandi framkvæmdarstjóri Atvinnuþróunarfélags Eyjafjarðar er í viðtali við Akureyri vikublað í dag þar sem hann fer yfir farinn veg og hann vandar ríkisstjórninni ekki tóninn. Hann tekur fyrir t.d. Grímsstaðamálið þar sem hann segist gáttaður á umræðunni og að umræða einkennist af vanþekkingu, útlendingahræðslu og uppblásnum þjóðernissósíalisma.

Í viðtalinu sem er aðgengilegt á akureyrivikublad.is fer hann yfir atvinnuástandið á Akureyri og telur hann helstu möguleika Akureyrar vera í ferðaþjónustu og framleiðslu til útflutnings. Hann ræðir um Vaxtarsamninginn sem er í raun samningslaus frá 2010 við iðnaðarráðuneytið og að lokum um Grímsstaðamálið og þá staðreynd að hann segist ekki hafa heyrt ennþá nein rök fyrir því að undanþágunni hafi verið hafnað.

Stjórn Akureyrarstofu lýsir furðu sinni á ákvörðun umhverfis- og samgöngunefndar Alþingis um Vaðlaheiðargöng

Jóhann Jónsson — Thu, 10 Nov 2011 17:48:51 +0000

Á fundi stjórnar Akureyrarstofu í gær miðvikudaginn 9. nóvember fagnaði stjórnin því að forsendur fyrir Vaðlaheiðargöngum hafa ekki breyst og því væri ljóst að framkvæmdir geta hafist á árinu 2012 eins og áður hafði verið ákveðið. Stjórnin lýsti áfram furðu sinni á ákvörðun umhverfis- og samgöngunefndar Alþingis um að senda málið til úttektar hjá Ríkisendurskoðun. Málið sé nú á lokastigi en það mun óhjákvæmilega fresta málinu um ótiltekinn tíma. Forsendur framkvæmdarinnar eru byggðar á vinnu sem fram fór þegar viðræður við lífeyrissjóðina um samgönguframkvæmdir áttu sér stað og hafa ekkert breyst síðan þá.

Þá sá nefndin ekki ástæðu til að kalla eftir úttekt Ríkisendurskoðunar.
Því er óskiljanlegt af hverju það er gert nú þegar tilboð liggja fyrir og séð er fram á að framkvæmdir geti hafist. Bættar samgöngur eru forsenda búsetu og byggðaþróunar. Stjórn Akureyrarstofu harmar áhugaleysi núverandi ráðherra samgöngumála um framkvæmdir við Vaðlaheiðargöng, sem munu bæta samgöngur og umferðaröryggi, efla innviði dreifðra byggða, stytta leiðir og sameina svæði. Stjórnin vonar að ekki verði brugðið fæti fyrir þessa nauðsynlegu framkvæmd sem mun hafa í för með sér jákvæða innspýtingu í atvinnulífið og minna atvinnuleysi.
Vaðlaheiðargöng gagnast ekki bara íbúum svæðisins heldur landsmönnum öllum. Íbúar svæðisins eru reiðubúnir að taka á sig að greiða veggjöld svo af framkvæmdum geti orðið til viðbótar þeim sköttum sem á þá eru lagðir. Stjórn Akureyrarstofu átelur einnig þá umræðu um að ríkið leggi fram fé úr ríkissjóði til framkvæmdarinnar. Hið rétta er að ríkið ábyrgist fjármögnun framkvæmdarinnar og því mun ekki koma til fé úr ríkissjóði. Því er framkvæmdin ekki að taka fé frá öðrum brýnum málefnum. Stjórn Akureyrarstofu skorar á Alþingi að ljúka þessu máli strax svo hægt sé að hefja framkvæmdir í upphafi árs 2012 eins og áður hafði verið ákveðið.

Heimild: xsakureyri.is

Hátt í 30 fundargestir gengu út af landsþingi

Örlygur Hnefill — Thu, 30 Sep 2010 16:58:58 +0000

Landsþing Sambands íslenskra sveitarfélaga hófst í Menningarhúsinu Hofi á Akureyri í morgun. Á þinginu verður meðal annars rætt um sameiningarkosti sveitarfélaga og leiðir stjórnmálanna til að öðlast traust almennings í landinu á ný. Ekki er víst að uppákoma sem varð við upphaf ávarps Ögmundar Jónassonar, ráðherra sveitarstjórnarmála, sé til þess fallin að auka traust á stjórnmálunum, en hann byrjaði ávarp sitt á landsþinginu á umræðu um ákæru á hendur Geir H. Haarde fyrrverandi forsætisráðherra. Um 30 fundargestir gengur úr salnum og sagði Þorbjörg Helga Vigfúsdóttir, borgarfulltrúi Sjálstæðisflokksins í Reykjavík að ummæli Ögmundar hefðu verið óviðeigandi og fólk hefði ekki viljað sitja undir þeim. Um 150 fulltrúar sitja á landsþinginu.

Kjörsókn ágæt á Akureyri

Jón Steinar — Sat, 06 Mar 2010 12:08:00 +0000

Kjörstjórn hafði í nógu að snúast í dag

Klukkan 11 höfðu 941 eða um 7,25% kjósenda á Akureyri skilað inn atkvæði sínu í þjóðaratkvæðagreiðslunni um Icesave, en til samanburðar höfðu 8,29% kosið á sama tíma í alþingiskosningunum í fyrra. 12.985 eru á kjörskrá á Akureyri. Enn sem komið er mun betri kjörsókn á Akureyri en í Reykjavík.

Helgi Teitur Helgason, formaður kjörstjórnar, sagði í samtali við Akureyri.net að kjörsókn virðist ætla að verða meiri en búist var við og að kjörstjórnin hefði ekki vitað almennilega við hverju var að búast, miðað við umræðuna síðustu daga og vikur.

Kosið er í Verkmenntaskólanum líkt og í síðustu alþingiskosningum.

Þrettán bjóða sig fram hjá Sjálfstæðisflokki

Ingimar Björn — Tue, 12 Jan 2010 04:58:08 +0000

Framboðsfrestur vegna prófkjörs Sjálfstæðisflokksins á Akureyri rann í gær, mánudaginn 11. janúar. Alls gáfu þrettán kost á sér, þar á meðal Sigrún Björk Jakobsdóttir, forseti bæjarráðs og Elín Margrét Hallgrímsdóttir, bæjarfulltrúi. Prófkjörið fer fram þann 13. febrúar næstkomandi. Eftirtaldir bjóða sig fram, og eru þeir listaðir í stafrófsröð:

Anna Guðný Guðmundsdóttir iðjuþjálfi og háskólanemi

Björn Ingimarsson hagfræðingur

Elín Margrét Hallgrímsdóttir símenntunarstjóri og bæjarfulltrúi

Huld S. Ringsted verslunarrekandi

Kolbrún Sigurgeirsdóttir grunnskólakennari

Kristinn Frímann Árnason bústjóri

Njáll Trausti Friðbertsson flugumferðarstjóri og viðskiptafræðingur

Ólafur Jónsson héraðsdýralæknir

Ragnar Sigurðsson laganemi og formaður Félags stúdenta við Háskólann á Akureyri

Sigrún Björk Jakobsdóttir bæjarfulltrúi

Sigurður Guðmundsson verslunarmaður

Svavar Hannesson vátryggingaráðgjafi

Unnsteinn Jónsson verksmiðjustjóri

Framboð til prófkjöra streyma inn

Ingimar Björn — Wed, 06 Jan 2010 18:39:42 +0000

Það styttist í prófkjör stjórnmálaflokkana fyrir komandi sveitarstjórnarkosningar, en prófkjör Samfylkingarinnar fer fram 30. janúar næstkomandi. Verður það rafrænt og opið. Hermann Jón Tómasson, bæjarstjóri, tilkynnti í dag að hann ætli að gefa kost á sér í 1. sæti á lista flokksins. Þá hefur Jón Ingi Cæsarsson, formaður Samfylkingarinnar á Akureyri og varabæjarfulltrúi, gefið kost á sér í 3. til 5. sæti. Aðrir hafa ekki opinberað framboð. Kosið verður um fyrstu fimm sætin, en sérstök uppstillinganefnd mun raða upp í þau sæti sem eftir standa.

Eðlilegt að annar háskólinn sé utan höfuðborgarsvæðisins

Ingimar Björn — Fri, 05 Jun 2009 11:47:31 +0000

Háskólinn á Akureyri. Mynd/Bjarki Sigursveinsson.

Á fundi sínum í gær, 4. júní, lýsti Bæjarráð Akureyrar sig mótfallið hugmyndum um að Háskólinn á Akureyri verði gerður að útibúi frá háskóla með höfuðstöðvar í Reykjavík. Mikil mótstaða hefur verið við þessar hugmyndir á Akureyri og sagði Þorsteinn Gunnarsson, rektor HA, hugmyndirnar aðför að háskólamenntun á landsbyggðinni í samtali við Akureyri.net fyrir skemmstu. Bæjarráð telur hugmyndirnar ógna hinu mikilvæga hlutverki og sérstöðu skólans, og telur eðlilegt að ef aðeins yrðu tveir háskólar í landinu yrði annar þeirra staðsettur utan höfuðborgarsvæðisins.

Í bókun bæjarráðs segir: “Bæjarráð Akureyrar fjallaði um málefni Háskólans á Akureyri og lýsir sig mótfallið hugmyndum um að Háskólinn á Akureyri verði gerður að útibúi frá háskóla með höfuðstöðvar í Reykjavík. Frá árinu 1987 hefur HA verið leiðandi í uppbyggingu háskólamenntunar á landsbyggðinni og skilað miklum fjölda háskólamenntaðs fólks sem gegnir mikilvægu hlutverki við uppbyggingu atvinnulífs um allt land. Náið samstarf háskólans og samfélagsins hefur verið eitt aðalsmerki HA og sjálfstæði háskólans hefur gert honum kleift að bregðast fljótt við nýjum áskorunum, verkefnum og hugmyndum og tengja rannsóknastarfið þeim málum sem brenna á nærsamfélaginu. Háskólinn á Akureyri er jafnframt leiðandi í uppbyggingu fjarnáms um allt land og hefur veitt miklum fjölda fólks tækifæri til að stunda háskólanám án tillits til búsetu og áform eru um að efla það enn frekar. HA hefur gengið í gengum mikla endurskipulagningu á sínum rekstri og þar hefur náðst að skapa hagkvæma rekstrareiningu sem rekin hefur verið innan ramma fjárlaga síðastliðin ár. Með auknu samstarfi við aðra háskóla geta ýmsir möguleikar skapast á enn frekari hagræðingu í rekstri skólans. Með því að leggja af yfirstjórn Háskólans á Akureyri og stýra skólanum frá miðlægri stofnun í Reykjavík væri hinu mikilvæga hlutverki og sérstöðu háskólans ógnað og á það getur bæjarráð ekki fallist. Ef aðeins á að gera ráð fyrir 2 háskólum í landinu er eðlilegt að annar sé utan höfuðborgarsvæðisins.”

Þrjúhundruð strikuðu yfir Kristján Þór

Örlygur Hnefill — Sat, 02 May 2009 18:07:33 +0000

Kristján Þór Júlíusson oddviti Sjálfstæðismanna.

Talsvert var um útstrikanir í Norðausturkjördæmi í Alþingiskosningunum um síðustu helgi. All strikaði 301 kjósandi yfir nafn Kristjáns Þórs Júlíussonar sem leiddi lista Sjálfstæðisflokks, 277 strikuðu yfir nafn Birkis Jóns Jónssonar leiðtoga Framsóknar og yfir nafn Kristjáns Möller oddvita Samfylkingarinnar striuðu 233. Þá strikuðu 148 yfir nafn Sigmundar Ernis Rúnarssonar sem skipaði annað sæti á Samfylkingu. Útstrikanir voru þó hvergi það margar að það hefði áhrif á röð framboðslista.