Árni Páll Árnason, félags– og tryggingamálaráðherra, og Hermann Jón Tómasson, bæjarstjóri á Akureyri, undirrituðu í dag tvo nýja samninga ríkisvaldsins og Akureyrarkaupstaðar. Annars vegar er um að ræða samning um fjármögnun og uppbyggingu 45 hjúkrunarrýma á Akureyri sem koma í stað rýma í Kjarnalundi og hins vegar verður undirritaður samningur um málefni fatlaðra fyrir árið 2010 en stefnt er að yfirfærslu málaflokksins til sveitarfélagsins árið 2011.

Í samningnum um 45 hjúkrunarrými er kveðið á um að Akureyrarbær láti hanna og byggja nýtt hjúkrunarheimili en af hálfu félags- og tryggingamálaráðuneytisins fylgist Framkvæmdasýsla ríkisins með framkvæmdinni. Hámarksstærð rýmis er 75 m2 fyrir einstakling eða samtals 3.375 m2. Áætlaður heildarkostnaður er um 1,6 miljarðar kr.

Akureyrarbæ stendur til boða allt að 100% lán frá Íbúðalánasjóði til 40 ára fyrir framkvæmdinni. Félags- og tryggingamálaráðuneytið mun greiða Akureyrarbæ leigu næstu 40 árin fyrir u.þ.b. 85% af framkvæmda- og fjármagnskostnaði.

Staðsetning húsnæðisins verður ákveðin á fundi bæjarráðs miðvikudaginn 12. maí.

Samningurinn um málefni fatlaðra er fyrir árið 2010 og er framhald fyrri samninga við félags– og tryggingaráðuneytið um verkefnið. Samningsfjárhæð er 977,2 m.kr.

Margt bendir til þess að orsök eldsins í verksmiðjunni Glófa í gær megi rekja til rafmagnsleysisins sem hrjáði bæinn í gærkvöldi. Þetta segir Þorbjörn Haraldsson, slökkviliðsstjóri, í samtali við mbl.is í morgun. Engu er þó búið að slá föstu í þeim efnum, en Lögreglan á Akureyri rannsakar nú orsök brunans. Eldurinn kom upp í prjónavél, á sama tíma og rafmagn komst á aftur í bænum.

Greiðlega gekk að slökkva eldinn, og voru vörur og önnur verðmæti borin út til að bjarga þeim. Slökkviliðsmönnum yfirsást hinsvegar glóð í þaki hússins og blossaði eldurinn upp aftur skömmu síðar. Þurfti að rjúfa þak hússins til að komast að eldinum. Erfitt er að meta tjónið, en ljóst er að það er umtalsvert.

Miðað við spár um öskudreifingu lítur út fyrir að Akureyrarflugvöllur verði miðstöð millilandaflugs næstu daga. Fugvöllunum í Keflavík og Reykjavík hefur verið lokað, og aðgerðastjórn flyst hingað norður. Þetta kemur fram á fréttavefnum mbl.is.

Eldur kom upp að Hrìsalundi 1 laust fyrir klukkan 11 í kvöld. Húsnæðið er atvinnuhúsnæði og er þar sokkaverksmiðjan Glòfi til húsa. Slökkvilið hefur náð tökum á eldinum sem virðist ekki hafa verið mikill. Verið er að reykræsta húsið.

Hörmungar af völdum manna eða náttúru virðast ekki hafa áhrif á komur skemmtiferðaskipa til Akureyrar í sumar. Komurnar eru fleiri en undanfarin ár, skipin stærri og ferðamannatímabilið lengra. Fyrsta skipið af 62 sem væntanleg eru kemur þann 20. maí, eftir tæpar tvær vikur, og bæjarbúar mega búast við því að sjá skipin á pollinum alveg fram til 1. október. Þetta er talsvert lengra tímabil en í fyrra, en þá kom fyrsta skipið í byrjun júní, og það síðasta um miðjan september. Þá voru skipin 58 talsins.

Pétur Ólafsson, markaðsstjóri Akureyrarhafnar, segir höfnina ekki endilega hafa átt von á því að komunum myndi fjölga, enda eru skipin að verða stærri og stærri. Akureyrarhöfn heldur áfram öflugu kynningarstarfi í samvinnu við aðrar hafnir og aðila í ferðaþjónustu og að sögn Péturs eru ekki merki um annað en að þróunin haldi áfram á þessa leið næstu ár.

Íslandsmót Alþjóðasambands líkamsræktarmanna fór fram um helgina í Íþróttahöllinni á Akureyri. Fjölmennt var meðal áhorfenda og keppenda á Íslandsmótinu sem haldið var í fimmtánda skipti um Páskana í töluverðum snjóþunga. Snjókoma aðfararnótt laugardagsins, snjóflóð og ófærð settu strik í reikninginn fyrir nokkra keppendur. Allir nema tveir náðu þó að mæta til keppni þegar upp var staðið. Þetta Íslandsmót var um margt sérstakt þar sem öll þekktustu nöfnin í líkamsræktargeiranum mættust á sviði. Það stefndi því fyrirfram í spennandi úrslit.

Rannveig Kramer stóð uppi sem Íslandsmeistari í fitness kvenna, Gauti Már Rúnarsson varð Íslandsmeistari í fitness karla, Margrét Hulda Karlsdóttir varð Íslandsmeistari í módelfitness og Magnús Bess Júlíusson í vaxtarrækt. Nánar er fjallað um mótið á www.fitness.is

Nýlega kom upp dæmi á Akureyri þar sem kona þurfti að ná sambandi við lögreglu, en þegar komið var á lögreglustöðina var hún mannlaus og aðeins miði í glugga móttökunnar þar sem fólki var bent á að hringja í 112 ef það þyrfti á aðstoð að halda. Ólafur Ásgeirsson, aðstoðaryfirlögregluþjónn á Akureyri, segir í samtali við Akureyri.net að hann telji að „stöðin sé vel mönnuð en það getur alveg komið upp að við séum allir úti, það þarf svo lítið til.“

Hann segir að í nútímasamfélagi séu 90% landsmanna með síma á sér öllum stundum og ættu því að geta hringt í 112 ef eitthvað bjátar á. „Auðvitað veit ég að það gæti einhver komið hérna inn símalaus, en ef hann væri nú í miklum vandræðum þá gæti hann labbað hérna í næsta hús og fengið að hringja í lögregluna”, segir Ólafur. Hann telur samt sem áður að þjónustustig Lögreglunnar sé mjög hátt og jafnvel hærra en tíðkast í nágrannalöndum okkar.

Hann segir að uppi hafi verið hugmyndir um að setja síma í anddyri afgreiðslunnar sem væri beintengdur við Lögregluna sem fólk gæti nýtt sér í neyðarástandi, en sagði að slíkt yrði að öllum líkindum eyðilagt fljótlega, líkt og gert var við alla þá almenningssíma sem settir voru upp á Akureyri á sínum tíma.

Nokkur niðurskurður hefur verið hjá Lögreglunni undanfarið og ekki hefur verið hægt að ráða í þær stöður sem losna og hefur lögregluþjónum því fækkað á Akureyri. Sameining lögregluembætta er líkleg á næstunni og munu þá Húsavík, Akureyri, Sauðárkrókur og húnavatnssýsla sameinast í eitt lögregluembætti. Ólafur telur að sameiningin muni hafa í för með sér samlegðaráhrif sem séu öllum til góðs.

Ólafur segist vera ánægður með Lögregluna í dag en auðvitað væri gott að vera með meiri mannskap. Ólafur hefur starfað sem lögregluþjónn í 46 ár en hann mun láta af störfum í næsta mánuði eftir farsælan feril.

Mynd: Akureyri.net/Jón Steinar

Veitingastaðnum Friðrik V var í gærkvöldi lokað, en staðurinn hefur verið starfandi á Akureyri í 9 ár. Eigandi veitingahússins, Friðrik Valur Karlsson, segir í viðtali við Akureyri.net að eftir hrunið hafi hallað undan fæti í rekstrinum og hafi eigendurnir ekki viljað draga úr gæðum staðarins, því hafi þessi ákvörðun verið tekin.

Aðspurður hvort að það sé ekki markaður fyrir fínni veitingastaði á Akureyri segir Friðrik: „Eigum við ekki að segja að þetta sé eins og knattspyrnulið, það hefur ekkert við striker að gera ef allir hinir eru varnarmenn.“ Hann segir að matarmenning bæjarins sé verr sett í dag. „Við erum allt í lagi, ekki frábær.“

Hann telur einnig áherslur bæjarstjórnar í þessum málum einkennilegar og vísar þá til þess að þeir „hlaupi til þegar að skyndibitakeðja sýnir áhuga á að opna stað í bænum en vilji ekkert fyrir þau gera.“

Friðrik segir aðdraganda lokunarinnar hafi verið langan og í raun hafi öndunarvélinni bara verið kippt úr sambandi. Hann segir sig og eiginkonu sína þurfa að bera þungann af fjárhagsvanda fyrirtækisins og segist hann vera óviss um hvort þau hjónin haldi húsinu.

Friðrik sér þó ekki eftir neinu og segist vera stoltur þrátt fyrir lokun staðarins, hann hafi haft þann draum fyrir 10 árum að opna heimsklassaveitingastað á Akureyri „og það tókst.“ Hann segist ekki vita hvað komi næst hjá sér eða starfsfólki sínu. „Þetta er ákveðið verkefni sem þarf að klára, en þetta er allt hæfileikaríkt fólk sem á ekki að eiga í neinum vandræðum með að fá vinnu.“

Menntamálaráðherra hefur skipað Láru Stefánsdóttur menntunarfræðing á Akureyri sem skólameistara nýs framhaldsskóla við utanverðan Eyjafjörð. Stefnt er að opnun skólans í haust og hefur Lára þegar hafið störf. “Þetta er spennandi tækifæri til að búa til nýjan og skapandi skóla sem þjónar samfélaginu við Eyjafjörð,” sagði Lára í samtali við Akureyri.net í dag. Hún segir mörg verkefni framundan, enda þurfi að manna skólann af kennurum og nemendum fyrir haustið og móta námsáætlun. Lára var ráðin úr hópi níu umsækjenda.

Fimmtugur karlmaður, Hans Alfreð Kristjánsson, var í dag dæmdur í þriggja ára fangelsi í Héraðsdómi Norðurlands eystra fyrir sérstaklega hættulega líkamsárás en hann stakk annan mann með hnífi ofarlega á brjóstkassann með þeim afleiðingum að hann hlaut þriggja sentimetra langan skurð. Árásin átti sér stað á Hafnarstræti á Akureyri í júní í fyrra. Auk fangelsisdómsins þarf maðurinn að greiða fórnarlambinu 400 þúsund krónur í miskabætur.

Hans Alfreð játaði brot sitt við yfirheyrslur en dró játninguna til baka fyrir dómi. Þá neitaði hann sakargiftum og sagði að um slysaverknað hefði verið að ræða. Dómarinn tók hins vegar undir með ákæruvaldinu og sakfelldi manninn.

Þegar Hans Alfreð framdi glæpinn var hann á reynslulaus eftir að hafa apflánað dóm fyrir morðtilraun árið 2006.

Nánar »

Guðmundur Baldvin Guðmundsson hlaut 66 prósent gildra atkvæða í fyrsta sæti á lista Framsóknarflokksins í prófkjöri flokksins í gær. Petrea Ósk Sigurðardóttir varð í öðru sæti. Alls greiddu 1.106 einstaklingar atkvæði í prófkjörinu sem var opið öllum þeim sem kosningarétt hafa í sveitarfélaginu í sveitarstjórnarkosningunum sem fram fara þann 29. maí næstkomandi. Gild atkvæði voru 1.064 en auð og ógild 42.

Nánar »