Katrín Júlíusdóttir iðnaðarráðherra tilkynnti stjórnendum Alcoa á Íslandi í morgun að viljayfirlýsing ríkisstjórnarinnar vegna álvers á Bakka yrði ekki framlengd. Núverandi viljayfirlýsing sem ríkisstjórnin gerði við sveitarstjórn Norðurþings og Alcoa um álver á Bakka við Húsavík rennur úr gildi á fimmtudag.

Iðnaðarráðherra segir að stofna eigi sérstakt félag um orkuöflun vegna álvers á Bakka við Húsavík. Félaginu sé ætlað að afla nýs fjár svo hægt verði að hefja rannsóknarboranir strax á næsta ári. Gert er ráð fyrir að félagið semji síðan við þá sem hafa áhuga á að nýta orkuna, hvort sem það verði Alcoa eða einhver annar. Ráðherra leggur þó áherslu á að ekki sé verið að útiloka samstarf með Alcoa, heldur sé ætlunin að koma málinu í fastari skorðu.

Stefnt er að því að sameina sýslumannsembættin fimm á Norðurlandi. Ragna Árnadóttir dómsmálaráðherra hefur þegar kynnt sýslumönnum landsins hugmyndir um að sýslumannsembættum landsins verði fækkað úr 24 í sjö. Þetta kom fram í fréttum Ríkisútvarpsins í kvöld.

Sýslumenn sitja nú á fimm stöðum á Norðurlandi, á Blönduósi, Sauðárkróki, Siglufirði, Akureyri og Húsavík. Ef hugmyndirnar verða að veruleika má gera ráð fyrir að hið nýja embætti verði með aðal aðsetur á Akureyri, en samkvæmt hugmyndinni er stefnt að því að útibú verði á hinum stærri stöðum þar sem nærþjónusta er veitt.

Framkvæmdastjóri KEA hefur skrifað undir styrktarsamninga við Íþróttafélagið Þór og Knattspyrnufélag Akureyrar um styrk til félaganna næsta árið. Um er að ræða heildarsamninga sem taka til allra deilda félaganna. KEA hefur lengi stutt við íþróttafélögin en á samningstímanum verður KEA einn af aðalstyrktaraðilum félaganna.

Sigfús Helgason skrifaði undir samninginn fyrir hönd Þórs og Stefán Gunnlaugsson fyrir hönd KA. Þeir sögðu báðir þegar undirritun fór fram að þessir samningar væru afar þýðingarmiklir fyrir uppbyggingu og starf félaganna en virkir iðkendur beggja félaganna eru hátt í tvö þúsund talsins. Halldór Jóhannsson, framkvæmdastjóri KEA, segir þetta vera framhald á þeim stuðningi sem KEA hefur veitt þessum íþróttafélögum hin síðari ár.

Nánar »

Orkustofnun barst síðla dags í gær erindi frá Sagex Petroleum, þar sem sameiginleg umsókn félagsins og Linda Exploration um sérleyfi til rannsókna og vinnslu kolvetnis á Drekasvæðinu er dregin tilbaka. Frestur til að sækja um leyfi rann út 15. maí síðastliðinn og voru umsækjendurnir þrír. Aker Exploration sem sótti einnig um hafði þegar dregið sína umsókn til bakavegna breyttrar stefnumörkunar hjá fyrirtækinu í kjölfar samstarfs og síðar samruna við annað fyrirtæki, að því er fram kemur á vefsíðu Orkustofnunnar.

Í ljósi þessa mun Orkustofnun ekki veita sérleyfi á þessu ári samkvæmt skilmálum fyrsta útboðs á sérleyfum til rannsókna og vinnslu kolvetnis á Drekasvæðinu. Stefna um framhaldið verður mótuð á næstunni af viðkomandi stjórnvöldum.

Nánar »

Héraðsdómur Norðurlands eystra hefur dæmt 22 ára karlmann í fjögurra mánaða skilorðsbundið fangelsi fyrir sérstaklega hættulega líkamsárás á Akureyri í maí síðastliðnum. Maðurinn sló konu á þrítugsaldri með glerglasi í andlitið á skemmtistaðnum Kaffi Akureyri, með þeim afleiðingum að konan hlaut sár víðsvegar á höfði og andliti.

Dómurinn er skilorðsbundinn til tveggja ára, en maðurinn hefur ekki komist í kast við lögin áður. Var það metið honum til refsilækkunnar, en einnig að hann játaði sakagiftir fúslega við alla meðferð málsins og féllst á bótaskyldu. Lögmaður konunnar gerði kröfu um 500 þúsund króna bætur en maðurinn var dæmdur til að greiða konunni 223 þúsund krónur í bætur ásamt vöxtum. Þá skal maðurinn greiða laun verjanda síns, en þau námu tæplega 90 þúsund krónum.

Nánar »