Íslandsmót Skákfélaga er haldið í Brekkuskóla á Akureyri í dag föstudag og laugardag Mótið haldið norðan heiða í tilefni af 90 ára afmæli Skákfélags Akureyrar, sem var fyrir skömmu.  Um er að ræða sveitakeppni og er teflt í fjórum deildum. Í fyrstu deild tefla 8 sveitir og fer hver viðureign fram á 8 borðum.

Keppendur á mótinu eru tæplega 400 og er það er hið fjölmennasta sem háð hefur verið á Akureyri.
Meðal keppenda verða allir sterkustu skákmenn landsins, s.s. Jóhann Hjartarson, núverandi Íslandsmeistari, Hannes Hlífar Stefánsson og Héðinn Steingrímsson.  
Auk þess sem sveitirnar hafa erlenda meistara í sínum röðum. Gera má ráð fyrir að a.m.k. 15 stórmeistarar sitji að tafli í Brekkuskóla meðan mótið fer fram, þ.m.t. skákmenn frá Grikklandi, Frakklandi, Búlgaríu,Tékklandi, Hollandi, Litháen, Úkraínu Svíþjóð og Danmörku.

Mótið hefst klukkan 20.00 í Brekkuskóla á morgun og mun Sigrún Björk Jakobsdóttir bæjarstjóri á Akureyri setja mótið með því að leika fyrsta leiknum í viðureign heimamanna í Skákfélagi Akureyrar og Taflfélags Bolungarvíkur, sem teflir fram sterkustu sveitinni á mótinu.  
Nánari upplýsingar um mótið veita þeir Gylfi Þórhallsson (862 3820) og Áskell Örn Kárason (897 8055) frá Skákfélagi Akureyrar.

Einnig er upplýsingar að finna á á vefsíðunum www.skaksamband.is og heimasíðu Skákfélags Akureyrar www.skakfelag.muna.is

"Úr hafinu rís landið" er nafnið á hátíð sem tileinkuð er íslenskri menningu og verður haldin í Vasa í Finnlandi 16.-28. apríl nk. Leikfélagi Akureyrar hefur verið boðið að koma og sýna Falið fylgi eftir Bjarna Jónsson á hátíðinni. LA frumsýndi Falið fylgi, í leikstjórn Jóns Gunnars Þórðarsonar í janúar síðastliðnum og gekk sýningin fyrir fullu húsi fram í mars.

Á Íslandshátíðinni verða íslenskar myndlistarsýningar, íslenskir rithöfundar kynna verk sín,  Friðrik á Friðrik V mun kynna íslenska matarhefð, Stefán Sturla, leikstjóri, sem búsettur er í Vasa mun frumsýna Bláa hnöttinn eftir Andra Snæ Magnason í Borgarleikhúsinu í Vasa og leikmyndina hannar Vignir Jóhannsson myndlistarmaður sem einnig á verk á myndlistarsýningu í borginni. Tónlistarmenn úr Caput hópnum munu frumflytja íslensk verk ásamt Sinfóníuhljómsveit Vasaborgar undir stjórn Guðna Franzsonar. Sýndar verða íslenskar kvikmyndir og mun Baltasar Kormákur halda fyrirlestur um kvikmyndir sínar. Margt fleira mun verða á döfinni og má segja að borgin verði lituð af íslenskri menningu þessa daga. Verndari og heiðursgestur hátíðarinnar er frú Vigdís Finnbogadóttir fyrrverandi forseti Íslands.

Leikhópur Leikfélags Akureyrar heldur utan þann 16. apríl og sýnir Falið fylgi í Wasa leikhúsinu 19. og 21. apríl.

Menningarráð Eyþings úthlutar  í dag 19. mars 28 milljónum króna til menningarstarfs á starfssvæði Eyþings við hátíðlega athöfn í Menningarmiðstöð Þingeyinga – Safnahúsinu á Húsavík kl. 17.00. Þetta er í fjórða sinn sem úthlutað er styrkjum samkvæmt samstarfssamningi menntamálaráðuneytis, iðnaðarráðuneytis og sveitarfélaga í Eyþing um menningarmál.

Ávörp flytja Björn Ingimarsson formaður Menningarráðs Eyþings og Katrín Jakobsdóttir menntamálaráðherra.  Auk þeirra verða viðstaddir styrkþegar menningarráðs, sveitarstjórnarmenn og gestir.

Menningarráðið leggur jafnan áherslu á að þau verkefni sem hljóta styrki efli á einhver hátt samstarf og/eða samvinnu í menningarmálum á Norðausturlandi eða dragi fram menningaleg sérkenni svæðisins.   Áherslur við úthlutun þessa árs eru meðal annars verkefni sem stuðla að samvinnu atvinnumanna í listum og leikmanna, verkefni sem hvetja til samvinnu ólíkra þjóðarbrota í samstarfi við Íslendinga, verkefni sem efla þekkingu og fræðslu á sviði menningar og lista og verkefni sem efla atvinnustarfsemi á sviði menningar og lista.

Í dag var ritað undir samstarfssamninga Ungmennafélags Íslands og Landsmótsnefndar við fimm fyrirtæki vegna 26. Landsmóts UMFÍ á Akureyri 9.-12. júlí á Akureyri í sumar. Aðalstyrktaraðilar Landsmótsins eru  Alcoa Fjarðaál og KEA, en einnig leggja Icelandair Group, Saga Capital og Landsbankinn mótshaldinu lið með myndarlegum hætti.
Í ár eru hundrað ár liðin frá því að fyrsta landsmót ungmennafélaganna var haldið  á Akureyri og verður þessara tímamóta minnst með ýmsum hætti á mótinu í sumar.  Miðpunktur mótshaldsins verður á nýjum íþróttaleikvangi Akureyrarbæjar á félagssvæði Íþróttafélagsins Þórs, en óhætt er að segja að íþróttamannvirki Akureyrar verði meira og minna undirlögð alla mótsdagana og ýmsir aðrir viðburðir sem tengjast Landsmótinu gera það að verkum að Akureyri mun iða af mannlífi mótsdagana.
Gert er ráð fyrir að keppendur á Landsmótinu verði á annað þúsund og gestir 10-20 þúsund.  Keppnisgreinarnar á mótinu verða um tuttugu auk átta starfsgreina, fimm kynningargreina og íþróttagreina fyrir eldri ungmennafélaga.
“Samstarfssamningar við þessi fimm fyrirtæki eru ein af mikilvægum forsendum þess að við getum haldið glæsilegt Landsmót UMFÍ á Akureyri í sumar og minnst þess að hundrað ár eru liðin frá því að fyrsta landsmótið var haldið, einmitt hér í bænum. Í þeim efnahagslega ólgusjó sem yfir landið hefur gengið á liðnum mánuðum hefur síður en svo  verið sjálfgefið að  fá fyrirtæki til samstarfs um viðburð eins og Landsmót UMFÍ, en við höfum notið mikils skilnings og velvilja hjá þessum samstarfsfyrirtækjum og fyrir það erum við afar þakklát.  Það er greinilegt að mikill vilji er til þess að slá skjaldborg um viðburð eins og landsmótin. Nú er það verkefni okkar mótshaldara að standa fyrir glæsilegu og eftirminnilegu afmælislandsmóti og við munum sannarlega leggja okkur fram um það,” segir Kristján Þór Júlíusson, formaður Landsmótsnefndar UMFÍ 2009.

Rambar þjóðin á barmi fasisma? Hefur viðmót Íslendinga í garð útlendinga breyst eftir efnahagashrun? Finna útlendingar búsettir á Íslandi fyrir óvild í sinn garð? Eru margir útlendingar í efnahagsfjötrum á Íslandi?

Borgarafundur í Deiglunni á Akureyri fimmtudagskvöldið 19. mars klukkan 20:00 -22:00

Framsaga:
Héðinn Björnsson, Íslendingur
Sigurður Kistinsson, dósent við Háskólann á Akureyri Radek B. Dudziak, starfsmaður Alþjóðastofu.
Pallborð:
Paul Nikolov, varaþingmaður VG
Ágúst Torfi Hauksson,framkvæmdastjóri Brims Soffía Gísladóttir, forstöðumaður Vinnumálastofnunar.

Fimmtán frambjóðendur gáfu kost á sér til framboðs í kjör um 8 efstu sæti framboðslista Framsóknarflokksins í  Norðausturkjördæmi vegna alþingiskosninganna 25. apríl 2009.

Kosið var um sætin á aukakjördæmisþingi sem haldið var á Egilsstöðum en utankjörfundaratkvæðagreiðsla fór einnig fram á fjölmörgum stöðum í kjördæminu.

Alls greiddu 928 atkvæði.

 
1. Birkir Jón Jónsson, alþingismaður, með 505 atkvæði í 1. sæti.
2. Höskuldur Þór Þórhallsson, alþingismaður, með 647 atkvæði í 1.-2. sæti.
3. Huld Aðalbjarnardóttir menningar-og fræðslufulltrúi Norðurþings, með 509 atkvæði í 1.-3. sæti.
4. Sigfús Karlsson, framkvæmdastjóri, með 340 atkvæði í 1.-4. sæti.
5. Svanhvít Aradóttir, forstöðuþroskaþjálfi, með 448 atkvæði í 1.-5. sæti.
6. Hallveig Björk Höskuldsdóttir, leiðtogi í málmvinnslu Alcoa, með 463 atkvæði í 1.-6. sæti.
7. Þórarinn Ingi Pétursson, bóndi og tamningamaður, með 497 atkvæði í 1.-7. sæti.
8. Anna Kolbrún Árnadóttir, sérkennari,með 397 atkvæði í 1.-8. sæti.

Nú um helgina fór fram prófkjör Sjálfstæðisflokksins í Norðausturkjördæmi. Við lok kjörfundar voru 3949 manns á kjörskrá, en alls kusu 2041 eða 51,7%. Auðir og ógildir seðlar voru 41.

Í fyrsta sæti varð Kristján Þór Júlíusson, Tryggvi Þór Herbertsson í öðru sæti og Arnbjörg Sveinsdóttir í því þriðja. Röð manna varð eftirfarandi:

1. í fyrsta sæti Kristján Þór Júlíusson með 1477 atkvæði
2. (í 1.-2. sæti) Tryggvi Þór Herbertsson með 971 atkvæði
3. (í 1.-3. sæti) Arnbjörg Sveinsdóttir með 868 atkvæði
4. (í 1.-4. sæti) Björn Ingimarsson með 816 atkvæði
5. (í 1.-5. sæti) Soffía Lárusdóttir með 999 atkvæði
6. (í 1.-6. sæti) Anna Guðný Guðmundsdóttir með 1220 atkvæði

Upplýsingaþjónustan Halló Norðurlönd vekur athygli á námskeiði ætluðu fólki sem hyggur á flutning til Norðurlandanna. Um er að ræða stutt námskeið þar sem farið verður yfir helstu atriði sem hafa þarf í huga við flutning, til að mynda varðandi skráningu, atvinnu og húsnæði auk þess sem þátttakendum gefst færi á að bera fram spurningar. Þjónusta Halló Norðurlanda og heimasíða verður einnig kynnt.
Námskeiðið verður haldiðí Deiglunni, Kaupvangsstræti 23 á Akureyri Fimmtudaginn 26. mars kl. 17.00 (Námskeiðið stendur yfir í 1 – 2 klukkustundir).
Námskeiðið er ókeypis, öllum opið og hentar þeim sem hyggja á atvinnu í þessum löndum, halda þangað til náms eða annarra erindagjörða. Hafa ber í huga að nauðsynlegt er að skrá sig á námskeiðið fyrir 23. mars í síma 511 1808 eða á netfangið hallo@norden.is.

Á föstudagskvöld handtók lögreglan á Akureyri rúmlega fertuga konu vegna gruns um fíkniefnamisferli. Í framhaldinu var gerð húsleit á heimili hennar þar sem fundust rúmlega 70 grömm af kannabisefnum. Konan viðurkenndi að eiga efnin og að hafa ætlað þau til sölu. Hún var látin laus eftir yfirheyrslu og telst málið upplýst.

Lögreglan minni á fíknefnasímann 800-5005 þar sem koma má á framfæri upplýsingum um fíkniefnamál.

Á föstudagskvöldið handtók lögreglan á Akureyri rúmlega fertuga konu vegna gruns um fíkniefnamisferli. Í framhaldinu var gerð húsleit á heimili hennar þar sem fundust rúmlega 70 grömm af kannabisefnum. Konan viðurkenndi að eiga efnin og að hafa ætlað þau til sölu. Hún var látin laus eftir yfirheyrslu og telst málið upplýst.

Lögreglan minni á fíknefnasímann 800-5005 þar sem koma má á framfæri upplýsingum um fíkniefnamál.