Rétt um 1500 manns sitja nú þjóðfund í Laugardalshöll í Reykjavík, en fundurinn er sá fyrsti sinnar tegundar í heiminum. Þar er samankominn þverskurður þjóðarinnar, valinn af handahófi úr þjóðskrá, til þess að móta framtíðarsýn, byggða á skýrum sameiginlegum grunngildum. “Nú verðum við að hætta að hugsa í flokkum og bæjarfélögum. Þetta eru gildin okkar sem við erum að velja og fólkið kemur allsstaðar að af landinu. Hér drögum við okkur ekki í dilka, heldur vinnum saman sem ein þjóð, óháð því hvort við komum af höfuðborgarsvæðinu eða landsbyggðinni.” segir Sigríður Kristín Hrafnkelsdóttir, lýðheilsufræðingur, sem er einn af maurunum sem gefa vinnu sína í þágu fundarins.

Akureyringar eiga eins og aðrir sína fulltrúa á þjóðfundinum. Blaðamaður akureyri.net er staddur í fjölmiðlamiðstöð fundarins og hefur rekist á fjölmarga norðanmenn, bæði almenna fundarmenn, hópstjóra og sjálfboðaliða. Sunna Valgerðardóttir er ein þeirra. Hún segir jákvæðni og samstöðu einkenna fundinn. “Það er líka ekki sjálfgefið að fólk nenni að vakna klukkan níu á morgnana og jafnvel fara yfir hálft landið, en hér virðast það ekki skipta máli.”

Blaðamaður mun fylgjast með framvindu fundarins í dag, en niðurstöður í rauntíma ásamt beinni útsendingu af fundinum má nálgast á vefslóðinni thjodfundur.is. Einnig má nálgast myndir á Flickr síðu fundarins og myndskeið á Youtube.

Stúlkan sem lögreglan á Akureyri og Barnaverndarnefnd Eyjafjarðar lýstu eftir fyrr í kvöld, er komin fram á Akureyri, heil á húfi. Lögreglan þakkar liðsinnið.

Lögreglan á Akureyri og Barnaverndarnefnd Eyjafjarðar lýsa eftir Emilíönu Andrésardóttur, sem fór að heiman frá sér í gærkvöldi, 12. nóvember. Eftir það hefur ekkert til hennar spurst.

Emilíana er 13 ára. Hún er um 160 cm há og dökkhærð. Síðast þegar vitað var, var hún klædd í svartar Puma buxur, svarta hettupeysu, í svarta skó með bleikum reimum og bleikum röndum.

Þeir sem geta gefið upplýsingar um ferðir Emilíönu eða vita hvar hún er stödd eru beðnir um að hafa samband við lögregluna á Akureyri í síma 464 7705.

Menningarráð Eyþings úthlutaði á mánudaginn 12. október fimm milljónum króna til menningarstarfs á starfssvæði Eyþings við hátíðlega athöfn í Grenivíkurskóla. Þetta er í fimmta sinn sem úthlutað er styrkjum samkvæmt samstarfssamningi menntamálaráðuneytis, iðnaðarráðuneytis og sveitarfélaga í Eyþing um menningarmál.

Ávörp fluttu Björn Ingimarsson formaður Menningarráðs Eyþings og Karítas H. Gunnarsdóttir skrifstofustjóri menningarmála í mennta- og menningarmálaráðuneytinu. Auk þeirra voru viðstaddir styrkþegar menningarráðs, sveitarstjórnarmenn og gestir.

Menningarráðið leggur jafnan áherslu á að þau verkefni sem hljóta styrki efli á einhver hátt samstarf og/eða samvinnu í menningarmálum á Norðausturlandi eða dragi fram menningaleg sérkenni svæðisins. Áherslur við úthlutun þessa árs eru meðal annars verkefni sem stuðla að samvinnu atvinnumanna í listum og leikmanna, verkefni sem hvetja til samvinnu ólíkra þjóðarbrota í samstarfi við Íslendinga, verkefni sem efla þekkingu og fræðslu á sviði menningar og lista og verkefni sem efla atvinnustarfsemi á sviði menningar og lista.

Aflþynnuverksmiðja Becromal hóf starfsemi sína föstudaginn 21. ágúst, á Krossanesi. Undirbúningur hefur gengið vel, en rétt tvö ár eru liðin frá því að raforkusamningur var undirritaður. Nú hafa tvær vélar verið gangsettar og fyrstu vörurnar runnið út, en alls verða 64 vélasamstæður í gangi þegar framleiðslan kemst á flug. Um 20 vélasamstæður verða komnar í gang um áramót, en líklega mun taka um ár að koma framleiðslu á fullt á öllum vélasamstæðum.

Verksmiðjan er sú lang stærsta sinnar tegundar í Evrópu, og er fyrsta græna stóriðjan á Íslandi. Engin mengun fylgir verksmiðjunni og engin spilliefni. Eina losunin frá verksmiðjunni er sjór sem er endurnýttur til að kæla vélarnar.

Heildarfjöldi starfsmanna í verksmiðjunni er um 90 en þegar hafa 30 manns tekið til starfa. Mikill meirihluti þeirra verða Íslendingar. Heildarfjöldi starfa þegar allt verður komið í fullan gang – ásamt afleiddum störfum – er talinn verða nærri þrjú hundruð.

Pósthúsið sem hefur verið til húsa að Skipagötu 10 flytur föstudaginn 28.ágúst í nýtt húsnæði, í Strandgötu 3, Akureyri. Á nýjum stað er aukið til muna aðgengi og þjónusta við viðskiptavini sem og aðstaða starfsfólks.

Í Skipagötunni og í Hafnarstrætinu hafa verið póstafgreiðslur allt frá árinu 1944. Eftir um 65 ár á sama staðnum flyst pósthúsið í nýtt og glæsilegt húsnæði í Strandgötu 3, Akureyri og er fyrsti starfsdagur á nýjum stað föstudagurinn 28.ágúst.

Ný afgreiðsla þjónar viðskiptavinum mun betur m.t.t. aðgengis og er aðstaða starfsfólks betri, sem og að móttaka og afhending stærri sendinga er mun aðgengilegri.

Í tilefni opnunar er gestum og gangandi boðið í kaffi og kökur á föstudag og laugardag um leið og tilvalið er að kíkja á úrvalið í nýja pósthúsinu. Opið er á laugardaginn frá kl. 10-14, annars er opið alla virka daga frá kl. 9-18.