Árni Páll Árnason, félags– og tryggingamálaráðherra, og Hermann Jón Tómasson, bæjarstjóri á Akureyri, undirrituðu í dag tvo nýja samninga ríkisvaldsins og Akureyrarkaupstaðar. Annars vegar er um að ræða samning um fjármögnun og uppbyggingu 45 hjúkrunarrýma á Akureyri sem koma í stað rýma í Kjarnalundi og hins vegar verður undirritaður samningur um málefni fatlaðra fyrir árið 2010 en stefnt er að yfirfærslu málaflokksins til sveitarfélagsins árið 2011.

Í samningnum um 45 hjúkrunarrými er kveðið á um að Akureyrarbær láti hanna og byggja nýtt hjúkrunarheimili en af hálfu félags- og tryggingamálaráðuneytisins fylgist Framkvæmdasýsla ríkisins með framkvæmdinni. Hámarksstærð rýmis er 75 m2 fyrir einstakling eða samtals 3.375 m2. Áætlaður heildarkostnaður er um 1,6 miljarðar kr.

Akureyrarbæ stendur til boða allt að 100% lán frá Íbúðalánasjóði til 40 ára fyrir framkvæmdinni. Félags- og tryggingamálaráðuneytið mun greiða Akureyrarbæ leigu næstu 40 árin fyrir u.þ.b. 85% af framkvæmda- og fjármagnskostnaði.

Staðsetning húsnæðisins verður ákveðin á fundi bæjarráðs miðvikudaginn 12. maí.

Samningurinn um málefni fatlaðra er fyrir árið 2010 og er framhald fyrri samninga við félags– og tryggingaráðuneytið um verkefnið. Samningsfjárhæð er 977,2 m.kr.

Margt bendir til þess að orsök eldsins í verksmiðjunni Glófa í gær megi rekja til rafmagnsleysisins sem hrjáði bæinn í gærkvöldi. Þetta segir Þorbjörn Haraldsson, slökkviliðsstjóri, í samtali við mbl.is í morgun. Engu er þó búið að slá föstu í þeim efnum, en Lögreglan á Akureyri rannsakar nú orsök brunans. Eldurinn kom upp í prjónavél, á sama tíma og rafmagn komst á aftur í bænum.

Greiðlega gekk að slökkva eldinn, og voru vörur og önnur verðmæti borin út til að bjarga þeim. Slökkviliðsmönnum yfirsást hinsvegar glóð í þaki hússins og blossaði eldurinn upp aftur skömmu síðar. Þurfti að rjúfa þak hússins til að komast að eldinum. Erfitt er að meta tjónið, en ljóst er að það er umtalsvert.

Miðað við spár um öskudreifingu lítur út fyrir að Akureyrarflugvöllur verði miðstöð millilandaflugs næstu daga. Fugvöllunum í Keflavík og Reykjavík hefur verið lokað, og aðgerðastjórn flyst hingað norður. Þetta kemur fram á fréttavefnum mbl.is.

Eldur kom upp að Hrìsalundi 1 laust fyrir klukkan 11 í kvöld. Húsnæðið er atvinnuhúsnæði og er þar sokkaverksmiðjan Glòfi til húsa. Slökkvilið hefur náð tökum á eldinum sem virðist ekki hafa verið mikill. Verið er að reykræsta húsið.

Hörmungar af völdum manna eða náttúru virðast ekki hafa áhrif á komur skemmtiferðaskipa til Akureyrar í sumar. Komurnar eru fleiri en undanfarin ár, skipin stærri og ferðamannatímabilið lengra. Fyrsta skipið af 62 sem væntanleg eru kemur þann 20. maí, eftir tæpar tvær vikur, og bæjarbúar mega búast við því að sjá skipin á pollinum alveg fram til 1. október. Þetta er talsvert lengra tímabil en í fyrra, en þá kom fyrsta skipið í byrjun júní, og það síðasta um miðjan september. Þá voru skipin 58 talsins.

Pétur Ólafsson, markaðsstjóri Akureyrarhafnar, segir höfnina ekki endilega hafa átt von á því að komunum myndi fjölga, enda eru skipin að verða stærri og stærri. Akureyrarhöfn heldur áfram öflugu kynningarstarfi í samvinnu við aðrar hafnir og aðila í ferðaþjónustu og að sögn Péturs eru ekki merki um annað en að þróunin haldi áfram á þessa leið næstu ár.

Leikfélag Akureyrar frumsýnir í kvöld gamanleikinn 39 þrep, eftir Patrick Barlow, sem byggður er á hinni þekktu kvikmynd Alfred Hitchcock, eftir samnefndri skáldsögu John Buchan. Þar takast fjórir leikarar á við 139 hlutverk, í hraðri og spennandi atburðarrás.

Leikararnir eru þau Atli Þór Albertsson, Björn Ingi Hilmarsson, Jóhann G. Jóhannson og Þrúður Vilhjálmsdóttir, en það er leikhússtýran María Sigurðardóttir sem leikstýrir. Hún segist spennt fyrir kvöldinu. “Það var fullt hús á prufunni í gær og það var þvílík gleði. Ég er bara mjög sátt og hlakka til að frumsýna í kvöld.”

Í verkinu segir frá hinum dekraða glaumgosa Richard Hannay, sem er vanur ljúfu lífi bresku yfirstéttarinnar. Hann sogast skyndilega inn í æsispennandi atburðarás þar sem við sögu koma morð, svikulir leyniþjónustumenn, brjálaðir prófessorar, Skotar og vitaskuld íðilfagrar konur.”

Sýningin er flókin, og skiptingar margar, en eftir þrotlausar æfingar er allt orðið klárt fyrir kvöldið. Að sögn Maríu eru fjórir leikarar á sviðinu, en fimmti leikarinn sé ekki síður áberandi, þó ekki sjáist hann mikið. “Fimmti leikarinn í sýningunni er eiginlega Gunnar Sigurbjörnsson, hljóðmaður. Hljóðmyndin í sýningunni er gríðarlega mikil og Gunnar á heiðurinn af henni. Það má því segja að hljóðmyndin sé fimmti leikarinn í sýningunni.”

39 þrep verða frumsýnd í kvöld eins og áður sagði, en næstu sýningar verða 9, 10, 14. og 15. janúar. Miða má nálgast á heimasíðu Leikfélagsins, leikfelag.is, eða í síma 4600-200.

Valdís Anna Jónsdóttir hefur gefið kost á sér í 3.- 5. sæti í prófkjöri Samfylkingarinnar á Akureyri sem fer fram dagana 29. – 30. janúar næstkomandi.

Valdís Anna hefur verið virkur félagi í Samfylkingunni frá árinu 2005 og hefur þar gegnt mörgum trúnaðarstörfum. Hún var formaður Sölku, félags ungra jafnaðarmanna á Akureyri á árunum 2006 til 2008 auk þess sem hún var varaformaður Ungra Jafnaðarmanna á landsvísu árin 2006 og 2007. Þá hefur hún einnig verið varamaður í íþróttaráði og samfélags- og mannréttindaráði Akureyrarbæjar.

Helstu baráttumál Valdísar snúa að ungu fólki í því árferði sem í dag er; standa vörð um Háskólann á Akureyri, skapa atvinnutækifæri á Akureyri til að halda því efnilega fólki sem hér er, að sveitarfélagið bjóði upp á þjónustu fyrir barnafólk á viðráðanlegu verði og að kjör þeirra sem minna mega sín verði ekki skert frekar.

Valdís Anna er þjónustufulltrúi við Landsbankann á Akureyri. Hún er í sambúð með Ásgeiri Friðrikssyni smiði og eiga þau soninn Jón Friðrik.

Norðurorka hefur fyrir milligöngu Saga Capital Fjárfestingarbanka gert samning um sölu á 32% hlut sínum í hlutafélaginu Þeistareykjum ehf. til Landsvirkjunar.

Eftir kaupin á Landsvirkjun 64% hlut í félaginu en aðrir hluthafar eru Orkuveita Húsavíkur og Þingeyjarsveit.

Fyrir hlutinn eru greiddar 4,5 milljónir dollara að aflokinni áreiðanleikakönnun og 11 milljónir dollara til viðbótar þegar orkuvinnsla hefst á umráðasvæði Þeistareykja, þó ekki fyrr en að tíu árum liðnum. Það var fyrirtækjaráðgjöf Saga Capital sem hafði milligöngu um viðskiptin sem ráðgjafi og fulltrúi Norðurorku.

Þeistareykir hafa frá árinu 2001 staðið að rannsóknum á möguleikum jarðhitasvæðisins að Þeistareykjum til jarðhitanýtingar. Hefur félagið fjárfest verulega í því skyni. Boraðar hafa verið 6 djúpar rannsóknarholur frá þremur borteigum á austanverðu svæðinu með góðum árangri, en samtals afkasta holurnar gufu sem jafngildir um 45 MW raforkuframleiðslu. Vísbendingar eru um að þar sé veruleg framleiðslugeta til viðbótar enda er jarðhitasvæðið á Þeistareykjum talið vera eitt af stærri jarðhitakerfum Íslands.

Helgin var annasöm hjá Slökkviliði Akureyrar, en alls var liðið kallað fimmtán sinnum til starfa um helgina. 

Þrettán sinnum voru sjúkrabílar kallaðir til, þar af í sjö almenna flutninga en inn á milli komu upp sex neyðarflutningar. F-1 sjúkraflug kom upp á laugardagsmorgun og var sá aðili fluttur til Reykjavíkur. Dælubíll liðsins var kallaður út um klukkan hálf tvö aðfararnótt sunnudags vegna mikils vatnsleka í sumarbústað,  en á meðan því var sinnt komu upp tveir neyðarflutningar. Loks var Slökkvilið Akureyrar kallað út vegna umferðarslyss í Fnjóskadal á sjötta tímannum í gær.  Dælubíll með björgunarklippur ásamt þremur sjúkrabílum voru sendir á staðinn.  Þaðan voru þrír fluttir á slysadeild FSA.

Ákveðið hefur verið að sameina útsendingar svæðisstöðva Ríkisútvarpsins á Norðurlandi og Austurlandi. Nýr frétta- og dægurmálaþáttur hefur göngu sína þriðjudaginn 24. nóvember, sendur út á svæðinu frá Hrútafirði til Hornafjarðar. Útsendingin lengist frá því sem nú er og verður frá klukkan 17.20 til 18.00, mánudaga til föstudaga. Það þýðir að nú bætast mánudagar við svæðisútsendingar á Austurlandi.

“Á Akureyri og Egilsstöðum starfar öflugur hópur af reyndu fólki, fimm fréttamenn, auk tæknimanna og svæðisstjóra. Með sameiningu eru lagðir saman þessir kraftar og um leið næst fram betri nýting á mannskap og meiri yfirferð á svæðinu öllu. Þetta gefur um leið meira svigrúm til ítarlegri fréttaumfjöllunar, auk þess sem sameining eykur möguleikann á að þau svæði sem liggja fjærst svæðisstöðvunum tveimur fái aukna athygli.” segir í fréttatilkynningu frá Ríkisútvarpinu. Minnstu mátti muna að svæðisbundnar fréttaútsendingar leggðust af seint á síðasta ári vegna niðurskurðar. Eftir kröftug mótmæli var fallið frá þeirri ákvörðun.

Jafnhliða sameiningu svæðisútsendinga á Norður- og Austurlandi hefur göngu sína nýr fréttatími klukkan 11 á morgnana á Rás 2. Fréttirnar verða sagðar frá Akureyri og lögð áhersla á fréttir frá öllum svæðisstöðvum Ríkisútvarpsins og fréttariturum um land allt. Þessum nýja fréttatíma er ætlað að undirstrika mikilvægi fréttaöflunar á landsbyggðinni, en er um leið skref í þá átt að sérvinna fréttir fyrir Rás 2.

Í morgun hófst snjóframleiðsla á skíðasvæðinu í Hlíðarfjalli ofan Akureyrar og verður hún keyrð áfram af fullum krafti næstu daga og vikur. Eftir fádæma milt veðurfar fram eftir hausti eru nú loksins komnar aðstæður sem henta til framleiðslunnar en frost þarf að vera að lágmarki 4 gráður.

Veðurspáin framundan lofar góðu og segist Guðmundur Karl Jónsson, forstöðumaður skíðasvæðisins, þess fullviss að nú loksins sé kominn vetur. Stefnt er að því að opna skíðasvæðið um næstu mánaðamót og standa vonir til að aðsókn verði engu minni núna en hún var í fyrra. Þá komu 74.000 gestir í Hlíðarfjall og var opið í 163 daga frá því í byrjun nóvember fram í maí.

Lögreglan á Akureyri leitar að vitnum að árekstri sem varð þann 11. nóvember síðastliðinn. Áreksturinn varð á Þórunnarstræti  við Gléráreyrar (sunnan Glerártorgs) um klukkan 17.40. en um var að ræða hvíta Kia Sportage bifreið og bláaToyota Hiace sendibifreið.

Þeir sem kynnu að hafa verið vitni að árekstrinum eru beðnir um að hafa samband við lögregluna á Akureyri í síma 464 7700.

Rétt um 1500 manns sitja nú þjóðfund í Laugardalshöll í Reykjavík, en fundurinn er sá fyrsti sinnar tegundar í heiminum. Þar er samankominn þverskurður þjóðarinnar, valinn af handahófi úr þjóðskrá, til þess að móta framtíðarsýn, byggða á skýrum sameiginlegum grunngildum. “Nú verðum við að hætta að hugsa í flokkum og bæjarfélögum. Þetta eru gildin okkar sem við erum að velja og fólkið kemur allsstaðar að af landinu. Hér drögum við okkur ekki í dilka, heldur vinnum saman sem ein þjóð, óháð því hvort við komum af höfuðborgarsvæðinu eða landsbyggðinni.” segir Sigríður Kristín Hrafnkelsdóttir, lýðheilsufræðingur, sem er einn af maurunum sem gefa vinnu sína í þágu fundarins.

Akureyringar eiga eins og aðrir sína fulltrúa á þjóðfundinum. Blaðamaður akureyri.net er staddur í fjölmiðlamiðstöð fundarins og hefur rekist á fjölmarga norðanmenn, bæði almenna fundarmenn, hópstjóra og sjálfboðaliða. Sunna Valgerðardóttir er ein þeirra. Hún segir jákvæðni og samstöðu einkenna fundinn. “Það er líka ekki sjálfgefið að fólk nenni að vakna klukkan níu á morgnana og jafnvel fara yfir hálft landið, en hér virðast það ekki skipta máli.”

Blaðamaður mun fylgjast með framvindu fundarins í dag, en niðurstöður í rauntíma ásamt beinni útsendingu af fundinum má nálgast á vefslóðinni thjodfundur.is. Einnig má nálgast myndir á Flickr síðu fundarins og myndskeið á Youtube.