Hin árlega úthlutun úr Afreks- og styrktarsjóði Akureyrar fer fram í hófi sem haldið verður í Íþróttahöllinni á Akureyri á morgun, þriðjudaginn 29. desember, klukkan 16.15. Þar verða afhent viðurkenningarskjöl Íþróttaráðs Akureyrar til hvers félags fyrir sig.

Árangur akureyskra íþróttamanna var góður á árinu. Samkvæmt upplýsingum sem borist hafa til stjórnar sjóðsins hafa 128 íslandsmeistaratitlar unnist á árinu og einnig voru margir Akureyringar valdir til leiks með landsliðum í hinum ýmsu íþróttagreinum. Það er von Íþróttaráðs að þessir glæsilegu afreksmenn, þjálfarar þeirra og forystumenn íþróttahreyfinga á Akureyri sjái sér fært að koma til athafnarinnar. Góðar veitingar verða fram bornar í boði Akureyrarbæjar.

Vel á þriðja tug snjóruðningstækja hafa verið að störfum á götum Akureyrar undanfarna daga en sjó hefur kyngt niður hér í bænum síðan á þorláksmessu og mældist sjötíu og sex sentimetra nýfallinn snjór í gærmorgun. Mikill fjöldi fólks hefur verið í bænum yfir hátíðirnar og hefur verið nokkuð erilsamt hjá lögreglu. Lögregla þurfti að loka Leiruveginum rétt austan Akureyrar á aðfangadagskvöld vegna slæmrar færðar og ofankomu, en um 10 ökumenn festu bifreiðar sínar við Leirubrúna og tók um hálftíma að losa þær af staðnum.

Jólatréskógur mun spretta upp nú um helgina í Minjasafninu á Akureyri. Íslendingar byrjuðu að skreyta heimili sín með jólatrjám á seinni hluta 19. aldar. Jólatré hafa í gegnum tíðina verið útfærð á margan hátt en yfirleitt var leitast við að hafa heimagerðu trén sem líkust grenitrjám. Bernskujólatrén, sem félagar úr Laufáshópnum hafa grafið uppúr pússi sínu eða gert eftirlíkingar af, setja jólalegan blæ á sýninguna fram til 20. desember.

Í aðventunni á safninu má sjá leikföng sem sjálfsagt hafa glatt margt barnshjartað einhver jólin fyrr á tíðum og þau bera með sér anda liðinna tíma í sýningunni Allir krakkar, allir krakkar – líf og leikir barna. Í henni má einnig sjá jólaskreytta skólastofu frá því í kringum 1950 og unglingaherbergi frá 7. áratug síðustu aldar eða kannski mætti segja herbergi krakka sem eru rétt að fylla fjórða tuginn og þeirra sem eru rétt kominn yfir á fimmtugsaldurinn. Jólaljós, jólalegar ljósmyndir og gömul jólakort ásamt fróðleik um drauma barna má auk þess sjá á Minjasafninu í aðventunni.

Nánar »

Samfylkingin á Akureyri stillir upp lista sínum fyrir bæjarstjórnarkosningarnar í vor með opnu rafrænu prófkjöri. Þetta var ákveðið á félagsfundi Samfylkingarinnar á Akureyri í gærkvöldi.

Í prófkjörinu verður kosið um efstu fimm sætin á lista flokksins í kosningunum. Auk þess var á fundinum kosin uppstillingarnefnd sem ætlað er að stilla upp í sæti 6 til 22 á framboðslistanum að loknu prófkjöri.

Í dag verður venju samkvæmt haldið upp á fullveldisdaginn 1. desember í Háskólanum á Akureyri. Dagurinn hefur jafnan verið tileinkaður stúdentum enda taka þeir virkan þátt í dagskránni. Að þessu sinni hefst dagskráin á málþingi sem tileinkað er fullveldinu og ber yfirskriftina Fullveldi ríkis: jafnrétti, stjórnlög og framtíð. Að málþinginu loknu hefst hátíðardagskrá við Íslandsklukkuna þar sem Stefán B. Sigurðsson, rektor flytur ávarp og fyrrum rektor HA, Þorsteinn Gunnarsson hringir Íslandsklukkunni. Þá mun kór Glerárkirkju syngja fyrir viðstadda og svo er öllum boðið inn í matsal HA í heitt kakó og smákökur. Á bókasafninu opnar myndlistamaðurinn Brynhildur Kristinsdóttir sýninguna Minningar breytast í myndir og ljóð.

Nánar »

Félagslegir trúnaðarmenn Einingar-Iðju sem starfa í fiskvinnslu á Eyjafjarðarsvæðinu skora á stjórnvöld að auka kvóta nú þegar. Þetta kemur fram í ályktun sem fundur þeirra sendi frá sér í gær. Í ályktuninni segir að ljóst sé að mörg fyrirtæki munu loka í lengri tíma ef ekkert verður að gert og setur það störf fiskvinnslufólks í hættu.

“Óöryggi starfsfólks í undirstöðuatvinnugrein þjóðarinnar er ekki forsvaranleg í því ástandi sem nú er. Fundurinn hvetur til þess að sú umræða sem er í þjóðfélaginu um sjávarútvegsmál verði á faglegum nótum, ekki handahófskennd, því á bakvið útveginn er starfsfólk og þeirra lífsafkoma,” segir jafnframt í ályktuninni.

Góðgerðavika félagsmiðstöðvanna á Akureyri hófst í gær og stendur til 5. desember. Í þessari viku láta fulltrúar félagsmiðstöðvanna gott af sér leiða á marga vegu, til dæmis munu ungmennin safna matvælum fyrir Mæðrastyrksnefndi, fötum fyrir Rauða krossinn og syngja fyrir vistmenn á Dvalarheimilinu Hlíð. Góðgerðavikan nær síðan hámarki á laugardag en þá verður jólamarkaður í Rósenborg. Þar munu krakkarnir vera með ýmsan varning til sölu og einnig selja kakó og vöfflur. Allur ágóði jólamarkaðarins rennur óskiptur til Mæðrastyrksnefndarinnar á Akureyri.

Tvær sundkonur úr Óðni, Erla Hrönn Unnsteinsdóttir og Hildur Þórbjörg Ármannsdóttir, kepptu um helgina með landsliði Íslands í tveggja þjóða keppni Íslendinga og Færeyinga í sundi. Keppnin fór fram ytra og höfðu gestgjafarnir betur með 101 stigi gegn 79. Erla Hrönn og Hildur stóðu sig með miklum sóma eins og við var að búast og setti Erla Hrönn Akureyrarmet i 50 m baksundi, 31,51.

Þær kepptu báðar í 50 m baksundi, Erla fór á 31,51 sem fyrr segir og Hildur á 31,80. Þá keppti Hildur einnig í 50 m skriðsundi (28,71) og 100 m baksundi 1;12,94. Þá voru þær báðar í boðsundunum. Sextán keppendur voru valdir til þátttöku að afloknu Íslandsmótinu í 25 metra laug fyrir rúmri viku. Samkvæmt fréttum hefur ferðin verið afar skemmtileg í alla staði og gestrisni Færeyinga einstök, nema kannski í lauginni. Liðið er væntanlegt heim í dag, mánudag.