Akureyri.net

Fréttir eftir þennnan höfund

Landsfundur UVG á Akureyri

Skrifað 02. október 2008 klukkan 03:34 | Helgi Már | Fréttir |

Landsfundur Ungra vinstri grænna verður á Akureyri helgina 4.-5. október. Ný stjórn verður kjörin á fundinum. Formaður og varaformaður undanfarinna tveggja ára munu ekki bjóða sig ekki fram til áframhaldandi stjórnarsetu. Því er ljóst að mikil nýliðun mun verða og jafnvel spennandi kosningar, segir í fréttatilkynningu. Eitt framboð hefur nú þegar borist í til formanns en framboðsfrestur stendur fram að kosningum á sunnudag.

Fundurinn verður settur kl. 10:00 laugardaginn 4. október í félagsheimili Karlakórs Akureyrar-Geysis í Lóni, Hrísalundi.

Listhlaupsmót um helgina

Skrifað 02. október 2008 klukkan 03:31 | Helgi Már | Íþróttir |

Haustmót í Listhlaupi á skautum verður haldið í Skautahöllinni á Akureyri 3.-5. október 2008. Listhlaup á skautum er ört vaxandi íþrótt á Íslandi og augljóst á áhorfi á íþróttina, t.d. á Ólympíuleikum, að áhugi almennings er til staðar. Um 90 ungmenni á aldrinum 8 – 22 ára keppa á mótinu. Þau eru frá Skautafélagi Akureyrar, Skautafélaginu Birninum og Skautafélagi Reykjavíkur.

Nánar á www.skautasamband.is

Miðar á Músagildruna seljast vel

Skrifað 02. október 2008 klukkan 03:27 | Helgi Már | Menning |

Leikfélag Akureyrar frumsýnir þann 18. október næstkomandi hið víðfræga leikrit Músagildran eftir Agöthu Christie. Þetta er í fyrsta sinn sem leikritið er sett upp í íslensku atvinnuleikhúsi en verkið hefur verið sýnt í London í samfellt 56 ár eða síðan 1952 og er það heimsmet! Sýningarnar í London eru orðnar yfir 23.000.
Agatha Christie hefur verið kölluð Drottning glæpasögunnar og hafa komið út eftir hana hundruðir spennusagna og leikrita. Samkvæmt tölum frá UNESCO hafa aðeins Biblían og verk Shakespears selst meira en bækur Christie sem hafa selst í alls 4 milljörðum eintaka.

Íslenskun Músagildrunnar og leikgerð er í höndum Gísla Rúnars Jónssonar en leikstjóri er Þór Tulinius. Leikarar: Aðalsteinn Bergdal, Anna Svava Knútsdóttir, Einar Örn Einarsson, Jóhanna Friðrika Sæmundsdóttir, Lilja Guðrún Þorvaldsdóttir, Sindri Birgisson, Viktor Már Bjarnason og Þráinn Karlsson.

Söguþráður Músagildrunnar: “Óveður geisar um sunnanvert landið. Hópur ferðalanga verður innlyksa yfir páskana í Skíðaskálanum í Hegradölum. Veður fer versnandi, snjórinn hleðst upp – og fyrr en varir taka líkin að hlaðast upp. Ekki líður á löngu uns gestirnir átta sig á að morðinginn er á meðal þeirra.” – Linnulaus spenna fram á síðustu mínútu og óvænt endalok!

Dregið í bikarkeppninni í blaki

Skrifað 01. október 2008 klukkan 11:47 | Helgi Már | Íþróttir |

Í gær var dregið í riðla í Brosbikarnum í blaki 2009. Undankeppni 1 fer fram í íþróttahúsinu í Ólafsvík í Snæfellsbæ dagana 10. og 11. október og verður spilað í tveimur riðlum hjá körlunum og tveimur hjá konunum. Samtals taka 14 lið þátt í bikarnum að þessu sinni, 8 kvennalið og 6 karlalið.

Dregið var samkvæmt nýrri reglugerð um bikarkeppnina, sem samþykkt var á stjórnarfundi um daginn. Tveimur efstu liðunum í deildarkeppninni á síðustu leiktíð var raðað í riðla A og B og síðan dregið úr hatti.

Í karlaflokki var dregið svona:
Riðill A: Stjarnan, UMFG, Þróttur R.
Riðill B: KA, Fylkir, HK.
Í Ólafsvík verða tvær umferðir spilaðar og efstu liðin úr riðlunum fara beint í undanúrslitaleikina. Efsta liðið úr riðli A fer í leik 1 og efsta liðið í B fer í leik 2.

Í kvennaflokki var dregið svona:
Riðill A: Þróttur N., HK Utd., KA, Þróttur R C.
Riðill B: HK, Þróttur R, Stjarnan, Fylkir.
Í Ólafsvík verður leikin einföld umferð, allir við alla í riðlunum. Efstu liðin úr riðlunum fara beint í undanúrslitaleikina. Efsta liðið úr riðli A fer í leik 1 og efsta liðið í B fer í leik 2.

Undankeppni 2 fer fram á Akureyri dagana 13.-14. febrúar og þar verður aðeins leikið í einum riðli í báðum flokkum. 4 lið verða í flokki karla og 6 lið í kvennaflokki. Fyrirkomulagið verður einföld umferð, allir spila við alla, tvö efstu liðin úr riðlunum fara í pott og dregið verður um hvort liðið spilar leik 1 eða 2 í undanúrslitunum.

Undanúrslit í Brosbikarnum verða laugardaginn 14. mars og úrslit sunnudaginn 15. mars.

Viðhorf útskrifaðra viðskiptafræðinga til HA

Skrifað 01. október 2008 klukkan 11:44 | Helgi Már | Háskólinn |

Föstudaginn 3. október verður haldin önnur viðskiptafræðimálstofa vetrarins. Þar mun Guðmundur Kr. Óskarsson, lektor við Háskólann á Akureyri, gera grein fyrir rannsókn sinni á útskrifuðum nemendum frá Háskólanum á Akureyri. Fyrirlesturinn fer fram í stofu R311
á Borgum við Norðurslóð og hefst kl. 12.10.

Friðrik Ómar á ferð

Skrifað 01. október 2008 klukkan 11:42 | Helgi Már | Tóneyrað |

Söngvarinn Friðrik Ómar Hjörleifsson er nú á ferð um landið og eftir vel heppnaða ferð um Austurland er ferðinni heitið norður á bóginn.

Miðvikudaginn 1. október verða tónleikar í Blönduóskirkju og fimmtudaginn 2. október verða styrktartónleikar í Ólafsfjarðarkirkju vegna sviplegs fráfalls Hrafnhildar Lilju Georgsdóttur. Allur ágóði af tónleikunum rennur í styrktarsjóð sem stofnaður var af vinum hinnar látnu.

Föstudaginn 3. október syngur Friðrik Ómar svo í Dalvíkurkirkju.

Flutt verða lög sem Vilhjálmur Vilhjálmsson gerði vinsæl auk annarra þekktra dægurlaga. Grétar Örvarsson sem leikur með á píanó. Allir tónleikarnir hefjast kl. 20:30.

Línan á Karólínu

Skrifað 01. október 2008 klukkan 11:37 | Helgi Már | Sýningar |

Ingunn St. Svavarsdóttir, Yst, opnar sýninguna "Línan – ferð á fyrirheits" á Café Karólínu laugardaginn 4. október 2008 klukkan 14.

Sýningin samanstendur af 19 römmuðum teikningum, sem unnar voru snemma á árunum 2007 og 2008 í New York og Newcastle. Um er að ræða spuna eða hugarflug, sem á sér stað í afslöppuðu leiðsluástandi, þar sem viðkomandi leitast við að þvælast sem minnst fyrir verknaðinum.

Ingunn St. Svavarsdóttir, Yst, sálfræðingur og fagurlista-verka-kona er nýskriðin úr skóla, var að ljúka 2ja ára námi sínu í Master of Fine Art frá Newcastle University á Bretlandi nú í september 2008. Hún nam áður við Myndlistaskólann á Akureyri og
útskrifaðist af Fagurlistabraut 2002. Yst vinnur ýmist tví- eða þrívíð verk; teikningar, málverk, skúlptúra, lágmyndir og
innsetningar. Þetta er 9. einkasýning Ystar, sem hefur helgað sig myndlistinni alfarið í heilan áratug og sýnt bæði hérlendis og erlendis.

Sýningin stendur til 31. október 2008.

Fíkniefni fundust við húsleit

Skrifað 01. október 2008 klukkan 01:43 | Helgi Már | Fréttir |

Lögreglan á Akureyri framkvæmdi húsleit í íbúð á Akureyri í gærkvöldi og lagði hald á 3 grömm af kannabisefnum og 1 gramm af amfetamíni auk tækja og tóla til fíkniefnaneyslu. Í íbúðinni hafði farið fram neysla fíkniefna skömmu áður en lögreglu bar að garði. Alls voru átta aðilar í íbúðinni og viðurkenndu tveir þeirra að eiga efnin. Fólkið var látið laust að loknum skýrslutökum og málið telst upplýst.

Lögreglan minnir á fíkniefnasímann 800-5005 þar sem hægt er að koma á framfæri upplýsingum um meint fíkniefnamisferli.

Stóðréttir í Svarfaðardal um helgina

Skrifað 01. október 2008 klukkan 01:39 | Helgi Már | Fréttir |

Hrossasmölun í Holárafrétt og Sveinsstaðaafrétt í Svarfaðardal verður nú um helgina. Hrossin verða rekin að Tungurétt laugardaginn 4. október og samkvæmt upplýsingum Þorsteins Hólm Stefánssonar fjallskilastjóra er stefnt að því að stóðið verði komið til réttar kl. 13:00.

Á laugardagskvöldið verður svo stóðréttardansleikur að Rimum í Svarfaðardal þar sem “hið heilaga dalvíska þríeyki” Matti Matt, Beggi Kára og Sverrir Þorleifs halda uppi fjörinu frá kl. 23:00 og fram á rauðan morgun.

KEA gefur FSA ómskoðunartæki

Skrifað 30. september 2008 klukkan 08:11 | Helgi Már | Fréttir |

Halldór Jóhannsson, framkvæmdastjóri KEA, afhenti í gær Sjúkrahúsinu á Akureyri (FSA) 10 milljónir króna að gjöf til kaupa á ómskoðunartæki til notkunar á myndgreiningardeild.

Tækið er af gerðinni Siemens S-2000 og er í hópi fullkomnustu og bestu ómskoðunartækja sem fáanleg eru í heiminum. Það leysir af hólmi eldra tæki sem ekki fullnægði kröfum sem gerðar eru til slíkra tækja í dag. Tækið er notað til allra almennra ómrannsókna ásamt æða- og inngripsrannsóknum.

Að sögn forstöðulæknis myndgreiningardeildar, Arnar Orra Einarssonar, gera myndgæði tækisins ásamt einfaldari og hraðari myndvinnslu, það að verkum að allar æðarannsóknir verða einfaldari og mun auðveldara er að framkvæma ástungur og önnur inngrip, sem hraða greiningu sjúkdóma og veita sjúklingum meira öryggi.

Halldór Jóhannsson segir að það sé von KEA að gjöfin komi að góðum notum því það sé mikilvægt að sjúkrahúsið sé öflugt og vel tækjum búið, en þetta sé ekki í fyrsta skipti sem félagið færi sjúkrahúsinu gjafir til kaupa á tækjabúnaði og að öllum líkindum ekki það síðasta.

Halldór Jónsson, forstjóri FSA þakkaði forsvarsmönnum KEA þann hlýhug sem félagið hefur sýnt sjúkrahúsinu með góðum gjöfum sem nýst hafa til tækjakaupa.

Mynd: Arnar Orri Einarsson kynnir nýja ómskoðunartækið. Talið lengst frá vinstri: Hannes Karlsson formaður KEA, Þorvaldur Ingvarsson framkvæmdastjóri lækninga, Halldór Jóhannsson framkvæmdastjóri KEA, Halldór Jónsson forstjóri FSA, Vignir Sveinsson, framkvæmdastjóri fjármála og rekstrar, og Ólína Torfadóttir framkvæmdastjóri lækninga.

Föstudagsfreistingar Tónlistarfélagsins hefjast á ný

Skrifað 30. september 2008 klukkan 08:07 | Helgi Már | Tóneyrað |

Tónlistarfélag Akureyrar efnir til mánaðarlegra hádegistónleika í vetur í samvinnu við veitingastaðinn [RUB23]. Fyrstu föstudagsfreistingar haustsins verða í Ketilhúsinu 3. október 2008 kl. 12.15 þegar Aladár Rácz leikur Píanósvítur no. 1 og 2 eftir Ríkharð Örn Pálsson. Á meðan á tónleikum stendur er boðið upp á súpu frá Einari á [RUB23].

Þór og Stjarnan í kvöld

Skrifað 29. september 2008 klukkan 12:57 | Helgi Már | Íþróttir |

Í kvöld fer fram leikur úrvalsdeildarliða Þórs og Stjörnunnar í Poweradebikarnum í körfubolta. Leikurinn fer fram í íþróttahðllinni og hefst kl. 18:30. Meira má lesa um leikinn og liðin á www.thorsport.is

Styrktartónleikar Aflsins

Skrifað 29. september 2008 klukkan 12:55 | Helgi Már | Tóneyrað |

Aflið – samtök gegn kynferðis og heimilisofbeldi á Norðurlandi – heldur styrktartónleika í Sjallanum þann 2. október næstkomandi. Margir góðir tónlistarmenn leggja samtökunum lið og má þar nefna Hvanndalsbræður, Hund í óskilum, Sigga kaptein, Eyþór Inga, Einar Ágúst, Helga og hljóðfæraleikarana, Umsvif og Sniglabandið. Skúli Gautason verður kynnir.

Málefnið er brýnt, segir í tilkynningu, en samkvæmt ársskýrslu Aflsins var 75% aukning í hópavinnu á síðasta ári og fer fjöldinn vaxandi. Aflið er 6 ára gömul grasrótarsamtök þar sem öll vinna hefur að mestu verið í sjálfboðavinnu.

Styrktartónleikarnir eru nú að verða árviss atburður. Húsið er opnað kl. 20.30 og hefjast tónleikarnir stundvíslega kl. 21.21. Forsala verður í Pennanum á Glerártorgi og er miðaverð 2000 kr.

Röksemdir að láni

Skrifað 29. september 2008 klukkan 10:46 | Helgi Már | Háskólinn |

Lögfræðitorg: Fyrirlestur þriðjudaginn 30. september 2008 kl. 12:00 L 201 Sólborg v/Norðurslóð. "Röksemdir að láni."

Á síðasta áratug liðinnar aldar birtu feminískir þjóðréttafræðingar kenningar um ábyrgð ríkja á ofbeldi gegn konum. Í erindi sínu á Lögfræðitorgi ber dr. Rachael Lorna Johnstone þessar kenningar saman við lögfræðileg rök bandarískra stjórnvalda í "stríðinu gegn hriðjuverkum", sem hófst í kjölfar atburðanna í New York 11. september 2001. Hún kemst að þeirri niðurstöðu að þarna sé um að ræða hreina endurvinnslu á hugtökum og kenningum feminista. Eigi að síður telur Rachael að litlar líkur séu á breytingum á ábyrgð ríkja á athöfnum einstaklinga og hópa sem fara sínu fram á tímum upplausnar og átaka. Máli sínu til stuðnings bendir hún á að hefðbundnar hugmyndir um ábyrgðaleysi ríkja virðist ráðandi á fjölmörgum svæðum þar sem Bandaríkjamenn reyna að koma í veg fyrir hryðjuverk.

Haukarnir sterkari

Skrifað 29. september 2008 klukkan 08:52 | Helgi Már | Íþróttir |

Haukar sigruðu Akureyri með 37 mörkum gegn 28 í N1-deild karla í handknattleik um helgina. Á heimasíðu Akureyrar handboltafélags segir m.a.: "Haukarnir byrjuðu betur en leikmenn Akureyrar voru seinir í gang en virtust þó vera að komast vel inn í leikinn í stöðunni 5-3 þegar Hörður Fannar fékk vítakast og tækifæri á að minnka muninn í eitt mark, en Jónatan skaut yfir markið og í kjölfarið skoruðu Haukarnir fimm mörk í röð og staðan orðin afleit 10-3.

Næstu mínútur hélst þessi munur 6-7 mörk, Akureyri á tímabili tveim mönnum færri en undir lok fyrri hálfleiks kom ágætur sprettur hjá Akureyrarliðinu og náðu þeir að minnka muninn niður í fjögur mörk 17-13, en Haukar áttu síðasta mark hálfleiksins og leiddu því í hálfleik 18-13.

Vörn Akureyrar var engan veginn nógu grimm lengst af og fyrir vikið var markvarslan lítil á meðan Gísli Guðmundsson átti fínan leik í Haukamarkinu.

Framan af síðari hálfleik hélt barningurinn áfram, munurinn 4-5 mörk Haukum í vil þar til að Sigurbergur Sveinsson hrökk í gang hjá Haukum og tók að raða inn mörkum með langskotum án þess að Hafþór kæmi nokkrum vörnum við. Jesper kom í markið og stóð vaktina síðasta korterið, hann átti nokkrar fínar vörslur en það dugði ekki til og Haukar sigldu örugglega framúr og náðu tíu marka forystu 35-25 á meðan lítið gekk í sóknarleik Akureyrarliðsins. Svo fór að lokum að Haukarnir unnu öruggan sigur 37-28."

Meira á www.akureyri-hand.is