Vegir eru víðast hvar orðnir auðir, að því er fram kemur í tilkynningu frá Vegagerðinni. Þó eru hálkublettir á nokkrum leiðum.
Vegna hættu á slitlagsskemmdum eru þungatakmarkanir víða um land, en nánari upplýsingar eru veittar í síma 1777.

Stjórnir Saga Capital fjárfestingarbanka og VBS fjárfestingarbanka hafa ákveðið að fresta formlegum viðræðum sínum um sameiningu bankanna tveggja. Þetta er gert í ljósi þess mikla óvissuástands sem nú ríkir á mörkuðum, segir í tilkynningu frá fyrrnefnda fyrirtækinu.

Landsfundur Ungra vinstri grænna fór fram á Akureyri um helgina. Fundinn sátu 40 ungliðar frá öllum landshornum sem tóku þátt líflegum og frjóum umræðum sem skiluðu sér í fjölda ályktanna, endurbættri stefnuyfirlýsingu og hugmyndum fyrir komandi starfsár.

Á fundinum var Steinunn Rögnvaldsdóttir kjörinn formaður nýrrar stjórnar í stað Auðar Lilju Erlingsdóttur sem gengt hefur því embætti undanfarin tvö starfsár en gaf ekki kost á sér áfram.

Fundurinn fór fram í skugga þeirrar óvissu og umbrota sem ríkja í efnahagsmálum þjóðarinnar og einkenndust umræður á fundinum mjög af þeirri staðreynd, sem og ályktanir fundarins. Meðal annars var ályktað um hrun heimskapítalismans og stöðuna í efnahagsmálum. Einnig samþykkti fundurinn að leggja fram sparnaðaráætlun sem felur í sér fyrir nokkurra tugmiljarða sparnað í óþörfum verkefnum ríkissjóðs. Áætlunin verður kynnt á næstu dögum, segir í fréttatilkynningu.

Menningarráð Eyþings úthlutaði um helgina rúmlega 4 milljónum króna til menningarstarfs á starfssvæði Eyþings við hátíðlega athöfn í Ketilhúsinu á Akureyri. Þetta var í annað sinn sem úthlutað er styrkjum samkvæmt samstarfssamningi menntamálaráðuneytis, iðnaðarráðuneytis og sveitarfélaga í Eyþing um menningarmál.

Ávörp fluttu Sigrún Björk Jakobsdóttir, formaður menningarráðs Eyþings, og Guðný Helgadóttir, deildarstjóri í menntamálaráðuneytinu. Auk þeirra voru viðstaddir styrkþegar menningarráðs, sveitarstjórnarmenn og gestir.

Áherslur við úthlutun þessa árs eru meðal annars verkefni sem vekja athygli á sögustöðum og menningartengdum viðburðum. Verkefni sem tengjast aðventunni, verkefni sem auka þátttöku ungs fólks í menningarstarfi og uppsetning viðburða á fleiri en einum stað. Einnig leggur menningarráðið áherslu á samstarf milli aðila, byggðarlaga eða listgreina sem og verkefni sem fela í sér nýsköpun á sviði lista og menningarstarfs.

Samstarf ríkis og sveitarfélaga
Hinn 27. apríl 2007 undirrituðu öll sveitarfélögin í Eyþing samstarfssamning um  menningarmál. Tilgangur samningsins er að efla menningarstarf í Eyjafirði og Þingeyjarsýslum og beina stuðningi ríkis og sveitarfélaga í Eyþing við slíkt starf í einn farveg.

Menningarráð Eyþings
Menningarráð Eyþings er sjálfstætt ráð kosið af fulltrúum sveitarfélaga á samstarfssvæðinu. Hlutverk ráðsins er að standa fyrir öflugu þróunarstarfi í menningarmálum, hvetja til samstarfs og faglegra vinnubragða og stuðla að almennri vitund og þekkingu um málaflokkinn. Menningarráð Eyþings úthlutar fjármagni til menningarverkefna á starfssvæðinu samkvæmt samningi ríkis og sveitarfélaga í Eyþing um menningarmál og hefur eftirlit með framkvæmd þess samnings.

Föstudagskvöldið 3. október og aðfararnótt laugardagsins framkvæmdi lögreglan á Akureyri húsleitir í tveimur íbúðum á Akureyri. Í annarri íbúðinni fundust tæki og tól til fíkniefnaneyslu auk fíkniefnaleifa. Í hinni íbúðinni var lagt hald á 6 grömm af kannabisefnum og 3 grömm af ætluðu amfetamíni. Nokkrir voru yfirheyrðir vegna þessara mála en látnir lausir að því loknu.

Auk þessa voru tveir karlmenn handteknir við venjubundið eftirlit og fannst smáræði af kannabisefnum á báðum þeirra. Auk þess hafði annar þeirra kylfu í fórum sínum sem hald var lagt á. Síðan var einn ökumaður handtekinn vegna gruns um akstur bifreiðar undir áhrifum fíkniefna.

Lögreglan minnir á fíkniefnasímann 800-5005 þar sem koma má á framfæri upplýsingum um meint fíkniefnamisferli.

Vegna ræsagerðar verður hringvegurinn, þjóðvegur 1, um Moldhaugnaháls í Eyjafirði lokaður frá kl. 18 föstudaginn 3. október og fram eftir degi á laugardag. Hjáleið er um veg 816, Dagverðareyrarveg. Þetta kemur fram í tilkynningu frá vegagerðinni.

Nýjar hugmyndir að breyttu skipulagi miðbæjarins á Akureyri voru kynntar á blaðamannafundi í Ráðhúsinu í dag. Unnið er áfram eftir verðlaunatillögu Graeme Massie, þó með nokkuð breyttum áherslum. Tillögurnar voru kynntar í bæjarráði í morgun en allt kynningarferli er eftir og er áætlað að því ljúki snemma á næsta ári. Meðal helstu breytinga eru að gert er ráð fyrir að Glerárgata verði þrengd úr fjórum akreinum í tvær, umtalsverðri uppbyggingu atvinnu- og íbúðarhúsnæðis, nýtingu bílastæða í miðbænum verður breytt og síki/vatnasvæði mun ná frá Torfunefsbryggju inn að bakhlið gamla Apóteksins við Hafnarstræti. Ekki hefur verið tekin endanleg ákvörðun um útfærslur á endanlegu dýpi á síki/vatnasvæði.

Nýjar áherslur
Bæjaryfirvöld á Akureyri hafa á síðustu misserum unnið að fjölbreyttum verkefnum til að styrkja miðbæ Akureyrar. Markmiðið er að miðbærinn hafi sterkt aðdráttarafl fyrir íbúa, ferðamenn og fyrirtæki. Fleira fólk geti búið í og við miðbæinn og þar verði fjölbreyttari þjónusta og atvinnustarfsemi. 

Hinar nýju áherslur byggja m.a. á íbúaþingi þar sem landsmet var slegið og um 1650 manns komu í íþróttahöllina á Akureyri til að ræða um miðbæinn og tækifæri þar. Frekari úrvinnsla byggðist á tillögu frá Graeme Massie Architects (GMA) sem hlutskörpust var í hugmyndasamkeppni um skipulag miðbæjarins sem sjálfseignarstofnunin, „Akureyri í öndvegi“ stóð fyrir. GMA brugðust í sinni tillögu við óskum bæjarbúa um „meira skjól og sól“ með því að leggja til að sjávarsíki næði frá Bótinni að Hafnarstræti. Þannig snúa þeir miðbænum í raun austur-vestur og mynda skjólsæl sólrík rými meðfram síkinu. Með þessu eru einnig áréttuð einstök einkenni Akureyrar, þar sem sjórinn og ströndin eru dregin inn í miðbæinn en sjórinn hefur tengst bæjarlífinu í gegnum tíðina. Þannig myndast sterk tengsl á milli landslags og menningar.

Nú liggur fyrir deiliskipulagstillaga sem byggir á ofangreindum tillögum, sem þverpólitískur stýrihópur bæjarins hefur unnið að með Graeme Massie Architects sem skipulagshönnuðum, ásamt ráðgjafarfyrirtækinu Alta, umferðarskipulagssérfræðingum frá Alan Baxters Associates og Línuhönnun.

Helstu breytingar í miðbænum
Áhersla er lögð á að skapa aðlaðandi og eftirsótt rými, sem byggja á menningu Akureyrar, sögu, náttúrulegu umhverfi, landslagi og strandlengju. Þannig eru áréttuð einstök einkenni í miðbænum.

Gert er ráð fyrir nýjum 3 – 5 hæða byggingum með yfir 150 nýjum íbúðum og allt að 16.000 fermetrum af atvinnuhúsnæði auk bílastæðakjallara undir húsum.

Tengsl miðbæjar við Pollinn og menningarhúsið verða styrkt og síki/vatnasvæði lagt frá Bótinni að Skipagötu með tjörn þaðan að gamla Apótekinu, þar sem sólrík og skjólsæl rými munu verða beggja vegna. Braunshús verður flutt og
þannig myndast göngutenging að Hafnarstræti og Skátagilinu.

Götum verður breytt, þ.e. bílastæði verða meðfram þeim og göturýmin um leið gerð meira aðlaðandi með nýju yfirborði og meiri gróðri.

Áhersla er lögð á góðar göngu- og hjólaleiðir og meðal annars yfirbyggð hjólastæði í miðbænum.

Glerárgatan verður öruggari og henni breytt í aðlaðandi borgarstræti frá Kaupvangsstræti að gatnamótum við Strandgötu. Á þessu svæði verður hún þrengd úr fjórum akreinum í tvær, en um leið tryggt að hægt verði að snúa til baka ef þörf krefur. Með þessu verða Pollurinn og menningarhúsið Hof órjúfanlegur hluti miðbæjarins.

Bílastæðum fyrir almenning mun ekki fækka, þeim verður fjölgað meðfram götum og síðan liggja fyrir tillögur að bílastæðahúsi eða bílastæðakjallara sem munu fullnægja þörfinni.

Uppbygging að hefjast
Ráðgert er að fyrir liggi samþykkt deiliskipulagstillaga á fyrri hluta næsta árs. Þá verður þegar hafist handa um framkvæmdir, þar sem nú þegar liggja fyrir áform um byggingu hótels og íbúða á svæðinu norðan við síki/vatnasvæði. 

Áætlaðar tekjur bæjarins af gatnagerðargjöldum verða yfir einn milljarður króna og verða þær að hluta til nýttar til að fjármagna nauðsynlegar lykil framkvæmdir. Með þessum hugmyndum vilja bæjaryfirvöld tryggja að miðbærinn verði til framtíðar uppspretta hugmynda og tækifæra á sviði menningar, lista og viðskipta, með það fyrir augum að styrkja mannlíf og um leið atvinnulíf á Akureyrarsvæðinu öllu.